“اپات ايتىپ كەلمەيدى” دەيدى اتام قازاق. جۋىردا جامبىل وبلىسى اۋماعىنداعى 20 ادامنىڭ ءومىرىن قيعان جول-كولىك وقيعاسى وسى ءسوزدى ەرىكسىز قينالىسپەن تاعى ءبىر ەسكە ءتۇسىردى. وسىعان وراي ءوتكەن سەنبىدە ىشكى ىستەر مينيسترلىگىنىڭ ءباسپاسوز قىزمەتى باق وكىلدەرى ءۇشىن ارنايى شۇعىل بريفينگ ۇيىمداستىردى.
– 31 شىلدەدە شامامەن تاڭعى ساعات بەس جارىمدا مەركە قالاسىنان 10 شاقىرىم جەردەگى الماتى – تاشكەنت تاس جولىنىڭ 339-ىنشى شاقىرىمىندا شىمكەنت قالاسىنان الماتىعا بەت العان “مەرسەدەس-بەنتس” قالاارالىق اۆتوبۋسى “نورت-بەنتس” ماركالى جۇك كولىگىمەن سوقتىعىسقان. كولىكتەر سوقتىعىسقان كەزدە ءورت تۋىنداپ, ناتيجەسىندە كولىكتەر تولىعىمەن جانىپ كەتكەن. وقيعا ورنىندا 20 ادام, ونىڭ ىشىندە اۆتوبۋستىڭ 18 جولاۋشىسى, اۆتوبۋس جۇرگىزۋشىسى جانە جۇك كولىگىنىڭ جۇرگىزۋشىسى قايتىس بولدى. الدىن-الا دەرەكتەر بويىنشا اۆتوبۋستا 49 جولاۋشى بولعان.
مەركە اۋداندىق ورتالىق اۋرۋحاناسىنا 23 جولاۋشى جەتكىزىلىپ, ولارعا مەديتسينالىق كومەك كورسەتىلدى. ولاردىڭ التاۋى, ونىڭ ءىشىندە ءتورت وزبەكستان ازاماتى ءارتۇرلى دەنە جاراقاتتارىمەن اۋرۋحاناعا جاتقىزىلدى.
كولىك قۇرالدارىنىڭ يەلەرى جانە قايتىس بولعان جۇرگىزۋشىلەردىڭ جەكە باستارى انىقتالدى. سونىمەن قاتار قايتىس بولعان جولاۋشىلاردى انىقتاۋ بويىنشا ءىس-شارالار جۇرگىزىلىپ جاتىر. مينيسترلىك باسشىلىعىنىڭ تاپسىرماسى بويىنشا ءىىم جول پوليتسياسى كوميتەتى توراعاسىنىڭ ءمىندەتىن اتقارۋشى پوليتسيا پولكوۆنيگى نيكولاي كالاشنيكوۆ وسى وڭىرگە اتتانىپ كەتتى. قازىرگى ۋاقىتتا وقيعا ورنىندا جامبىل وبلىسى ءىىد-ءنىڭ تاجىريبەلى قىزمەتكەرلەرىنەن قۇرالعان ارنايى تەرگەۋ توبى جۇمىس ىستەۋدە. جول-كولىك وقيعاسىنىڭ سەبەپتەرى انىقتالۋدا. الدىن-الا دەرەكتەر بويىنشا جۇك كولىگىنىڭ جۇرگىزۋشىسى رولدە قالعىپ كەتىپ, قارسى كەلە جاتقان اۆتوبۋسپەن سوقتىعىسقان.
جۇرگىزىلگەن تالداۋدا كورسەتىلگەندەي, تەحنيكالىق قاۋىپسىزدىكتى جانە جۇرگىزۋشىلەردىڭ جۇمىس ۋاقىتى مەن دەمالىس رەجىمىنىڭ ساقتالۋى ءۇشىن اۆتوكولىك كاسىپورىندارى مەن جۇك جانە جولاۋشىلاردى تاسىمالداۋ كولىكتەرى يەلەرىنىڭ جاۋاپكەرشىلىگىن زاڭنامالىق دەڭگەيدە كۇشەيتۋ قاجەت دەلىنگەن ءىىم-ءنىڭ ءباسپاسوز قىزمەتىنىڭ بەرگەن مالىمەتتەرىندە.
ءابدىراحمان قىدىربەك.