استانا. 13 ناۋرىز. الماتىدا «نۇر وتان» پارتياسى اتىنان ەل پرەزيدەنتتىگىنە ۇسىنىلعان ۇمىتكەر – ەلباسى نۇرسۇلتان نازارباەۆتىڭ سايلاۋ ناۋقانىنا قولداۋ كورسەتۋ ماقساتىندا قالالىق قوعامدىق شتاب قۇرىلدى. بۇل تۋرالى «قازاقپارات» حابارلادى.
نۇرسۇلتان نازارباەۆتىڭ باستى سەنىمدى وكىلى جانە رەسپۋبليكالىق قوعامدىق شتابىنىڭ جەتەكشىسى مۇحتار قۇل-مۇحاممەدتىڭ ۇيعارىمىمەن الماتى قالالىق قوعامدىق شتابىنىڭ جەتەكشىسى بولىپ الماتى قالالىق ءماسليحاتىنىڭ دەپۋتاتى, «تۇران» ۋنيۆەرسيتەتىنىڭ رەكتورى راحمان الشانوۆ تاعايىندالدى.
بۇگىن شتابتىڭ العاشقى وتىرىسىندا راحمان الشان ۇلى قاتىسۋشىلارعا الداعى جۇمىستار جونىندە باياندادى.
«سايلاۋعا قاتىستى قوعامدىق شتاب قۇرىلدى. وسى جۇمىسقا قاتىسۋعا كەلىسىم بەرگەندەرىڭىزگە ۇلكەن راحمەت! سىزدەر ەندى ەلباسىنىڭ سەنىمدى وكىلىسىزدەر. جۇمىسىمىز رەسمي تۇردە الداعى 24 ناۋرىزدا باستالىپ, ءبىر اي ۋاقىتقا سوزىلادى. ال 25 ناۋرىز - سايلاۋ الدىنداعى تىنىشتىق تاۋلىگى بولىپ سانالادى. ءبىز بۇگىنگى شتابتىڭ قۇرامىنا قوعامنىڭ ءتۇرلى سالالارىنىڭ وكىلدەرىن, قوعامعا بەلگىلى تۇلعالاردى جينادىق. الدىمىزدا ماڭىزدى جۇمىستار كۇتىپ تۇر. الماتى قالاسىندا ميلليونعا جۋىق سايلاۋشىلار بار. سوندىقتان الداعى ءبىر اي مەرزىم ىشىندە ءتۇرلى ەڭبەك ۇجىمدارىمەن, ءبىلىم جانە دەنساۋلىق ساقتاۋ سالالارىنىڭ قىزمەتكەرلەرىمەن, جوعارى وقۋ ورىندارىنىڭ ستۋدەنتتەرىمەن جانە باسقا ۇجىمدارمەن كەزدەسىپ, ۇگىت-ناسيحات جۇمىستارىن جۇرگىزۋىمىز كەرەك», – دەدى ر.الشانوۆ.
ايتا كەتەيىك, الماتى قالالىق قوعامدىق شتابىنىڭ قۇرامىنا بارلىعى 50 ادام توپتاستىرىلدى. ولار 3 ادامنان 16 توپقا ءبولىندى. ولاردىڭ ىشىندە ى.التىنسارين اتىنداعى №159 مەكتەپ-گيمنازياسىنىڭ ديرەكتورى اياگۇل ميرازوۆا, الماتى قالالىق ءماسليحاتىنىڭ دەپۋتاتى, «لوكوموتيۆ» اق فيليالىنىڭ ديرەكتورى بولات وسپانوۆ, قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتاەۆا, «گەنەرالدار كەڭەسى» رەسپۋبليكالىق قوعامدىق ۇيىمى تورالقاسىنىڭ توراعاسى رۇستەم قايداروۆ بار.
قازىرگى تاڭدا الماتى قالاسىندا بارلىعى 523 سايلاۋ ۋچاسكەسى بار. ءاربىر سايلاۋ ۋچاسكەسىندە قالالىق شتاب تاراپىنان ءۇش سەنىمدى وكىلدەن بولادى. سونىمەن قاتار قالانىڭ 8 اۋدانىندا ەلباسى ن.نازارباەۆتىڭ كانديداتۋراسىن قولداۋ ماقساتىندا قوعامدىق شتابتار قۇرىلادى.
جولدىباي بازار.
دەرەك, سۋرەت: «قازاقپارات».