سۋ تاسقىنىنان زارداپ شەككەن اۋىل تۇرعىندارىنا سوڭعى ۇيلەردىڭ كىلتتەرى تاپسىرىلدى
جاقسى جۇمىستان ادام جانى راحاتقا بولەنەدى. قانداي دا ءبىر جاۋاپتى ءىستى ورايى كەلسە سارسەنبىنىڭ ساتىندە باستايتىن ءوڭىر باسشىسى قىزىلاعاش اۋىلىنداعى قونىس تويىنا سوڭعى نۇكتە قوياتىن ءساتتى وسىلاي ورايلاستىردى. سوڭعى ءتورت ايعا جۋىق ۋاقىتتا اتقارىلعان جۇمىس ۇشان-تەڭىز. بىرەۋ سەنىپ, بىرەۋ سەنبەيتىندەي. اسىرەسە, قۇرىلىسشىلاردىڭ ءسوزى – از, ءىسى – ساز ەكەندىگىن قاز-قاتار تىزىلگەن ادەمى ۇيلەر مەن كوشە, حالىققا مادەني-تۇرمىستىق قىزمەت كورسەتەتىن عيماراتتار ايشىقتايدى. اۋىل ەرتەگىدەي جاڭارعان, جاسارعان. كەشەگى الاپات سۋ تاسقىنىنان جاپا شەككەن حالىقتىڭ ءتان جاراسىن ۋاقىت ەمدەيدى. ويتكەنى, تاسقىن تالايدىڭ ءومىرىن قيدى, وتباسىن ويراندادى. ەل-جۇرت اۋىرتپالىق سوڭىندا جاقسىلىقتىڭ بارلىعىنا سەندى. ويتكەنى, ەلباسىنىڭ تاپسىرماسىن ورىنداۋداعى وبلىس باسشىسى مەن قازاقستاندىقتاردىڭ دەمەۋ, قولداۋ كورسەتۋى ناتيجەسىندە ارنايى قورعا 7 ملرد. تەڭگە ءتۇسىپ, قۇرىلىس جۇمىستارىنا ىسكەر كومپانيالار تارتىلدى.
مىنە, كۇنى كەشە قىزىلاعاش اۋىلىن قالپىنا كەلتىرۋ جۇمىستارى تولىعىمەن اياقتالىپ, بارلىعى 465 ءۇي جاڭادان سالىنسا, 30 ءۇي كۇردەلى جوندەۋدەن ءوتتى. ەلىمىزدە ءححى عاسىردا تۇتاس ءبىر اۋىل قايتا ءتۇلەپ, ساۋلەتى مەن سىمباتى كەلىسكەن ەلدى مەكەنگە اينالىپ شىعا كەلدى. قونىس تويىندا جاڭا ۇيلەرمەن قاتار ورتا مەكتەپ, ەمحانا, ءۇش قاباتتى ەسكى مەكتەپ-ينتەرنات عيماراتتارى كۇردەلى جوندەۋدەن ءوتىپ, پايدالانۋعا بەرىلدى. قىزىلاعاشتىقتاردىڭ ەڭسەلەرى كوتەرىلىپ, مەرەيلەرى تاسىدى. بۇگىنگى قىزىلاعاشتى بۇرىنعى اۋىلمەن سالىستىرمايسىڭ. تاسقىننان كەيىن ورنىندا لاي مەن قوقىس قالعان مەكەندەگى سىمباتى كەلىسكەن, زاماناۋي قۇرىلىس ماتەريالدارى پايدالانىلعان ۇيلەر, كوشەلەر, جاپىراعىن جەل تەربەگەن سايالى باقپەن كومكەرىلگەن ەلدى مەكەندى رەسپۋبليكا كولەمىندە كەزدەستىرمەسىمىز انىق.
جيىن ءىلياس جانسۇگىروۆ اتىنداعى ورتا مەكتەپتەن باستالدى. عيمارات 1969 جىلى سالىنعان. تاسقىنعا سىر بەرمەگەن ءبىلىم شاڭىراعىنىڭ قابىرعالارى زاقىمدانباعانىمەن, ىرگەتاسى ءمۇجىلىپ, بولمەلەرى ب ۇلىنگەن ەدى. قۇرىلىستى “ارلان” جانە “اسك اۋىلقۇرىلىسى” جاۋاپكەرشىلىگى شەكتەۋلى سەرىكتەستىكتەرى جۇرگىزىپ, جوندەۋ جۇمىستارىنا بولىنگەن 226 ملن. تەڭگە تولىق يگەرىلىپتى. مۇنداعى فيزيكا, بيولوگيا, حيميا, ينفورماتيكا, مۋزىكا جانە باسقا كابينەتتەر قاجەتتى وقۋ قۇرال-جابدىقتارىمەن قامتىلىپ, ۇستازدار جاڭا وقۋ جىلىنا دايىندىقتارىن باستاپ كەتكەن. مەكتەپ اۋلاسىندا ءۇش بلوكتان تۇراتىن وقۋ كورپۋسى, كۇردەلى جوندەۋدەن وتكەن سپورت, اكت زالى وقۋشىلاردىڭ سالاماتتى ءومىر سالتىن قالىپتاستىرۋىنا جاعداي جاسايتىنى انىق. ءبىلىم شاڭىراعىنىڭ اۋماعى اباتتاندىرىلىپ, باسكەتبول, ۆولەيبول الاڭدارى جاسالىپ, اينالاعا قاراعاي, بوزارشا, قايىڭ, تەرەك, جەمىس اعاشتارى وتىرعىزىلسا, القىزىل گۇلزارلار كوز تارتادى. وبلىس باسشىسى سەرىك ۇمبەتوۆ باستاعان جۇرتشىلىق عيماراتتىڭ ءسان-سالتاناتىنا ريزاشىلىقتارىن ءبىلدىرىپ, ودان ءارى “نۇرشۋاق” بالاباقشاسىنا ايالدادى.
اۋىلدا سوڭعى جيىرما جىلدان بەرى بۇلدىرشىندەر مەكەنى بولماعان. وڭتايلاندىرۋ كەزىندە جەكەشەلەندىرىلگەن ءۇش قاباتتى مەكتەپ-ينتەرنات ءۇيىنىڭ ەكى قاباتىن ءبۇلدىرشىندەرگە, ءۇشىنشى قاباتىن جاس ۇستازدار مەن دارىگەرلەرگە باسپاناعا لايىقتاپ, قايتا جوندەلىپ, كوپشىلىك تىلەگى جۇزەگە اسىرىلىپتى. مەكتەپكە دەيىنگى بالالار مەكەمەسىنىڭ الدىندا نارەستەسىن كوتەرگەن انا, نەمەرەسىن جەتەكتەگەن اجە, تاعى باسقالاردىڭ قاتارى كوپ. وبلىس اكىمى ولارمەن ەمەن-جارقىن اڭگىمەلەسىپ, جاعداي سۇراستى. – بالاباقشاداعى تاربيەنىڭ ورنى بولەك. بۇگىن كەلىندەر دە, ءبىز دە قۋانىشتىمىز. كوپتەگەن ايەلدەر بالالارىن باعىپ, جۇمىسقا شىعا الماي وتىرعان. ەندى ولاردىڭ دا قولى ۇزاردى. نەمەرەمىزدى باقشاعا بەرىپ, ءبىز دە قۋانىپ جاتىرمىز, دەيدى نەمەرەلەرى ايجان مەن ارسەندى جەتەكتەگەن تىلەش جارقىمباەۆا.
الماتى قالاسىنداعى “راحات” اكتسيونەرلىك قوعامى قالپىنا كەلتىرۋ جۇمىستارىن جۇرگىزگەن ەكى قاباتتى ەمحانا ءۇيى دە جوندەلىپ, ىشكى ارلەۋ, سىرلاۋ جۇمىستارى ۇقىپتىلىقتى تانىتسا, ىشكى قاجەتتىلىكتەر تولىقتاي جاڭارتىلىپتى. دارىگەرلىك امبۋلاتورياعا “جەدەل جاردەم” كولىگىن قايىرىمدى جاندار تاپسىرىپتى. مەديتسينالىق قۇرال-جابدىقتارمەن جاراقتاندىرىلعان كابينەتتەر حالىققا قىزمەت كورسەتۋىن باستاپ كەتكەن. كۇندىز ەم قابىلدايتىن كابينەتكە كەلگەندەردى دە كەزدەستىردىك.
اۋىلداعى وسىنداي قۇرىلىس جۇمىستارىن كورگەن كوپشىلىك جايناعان جاستار كوشەسىندە ورنالاسقان مادەنيەت ۇيىنە جينالدى. كەڭ, ءارى جارىق عيماراتتا بوس ورىن جوق. مىنبەرگە كوتەرىلگەن وبلىس اكىمى سەرىك ۇمبەتوۆتى جۇرتشىلىق قوشەمەتپەن قارسى الدى.
– بۇگىنگى قۋانىشقا جەتەمىز بە, جەتپەيمىز بە دەپ قينالعان ءساتتەر ارتتا قالدى. ونى ۇمىتۋ ءمۇمكىن ەمەس, دەپ تەبىرەنە سويلەدى باسشى. سىزدەردىڭ جابىققان ءجۇزدەرىڭىز بەن قامىققان كوڭىلدەرىڭىزدى كورگەندە ءبارى ورنىنا كەلەدى, باسپانالى بولاسىزدار, دەپ ۋادە بەرگەن ەدىك. ەلباسىنىڭ قايعىلى وقيعانى ەستىسىمەن ۇكىمەتكە جەدەل تاپسىرما بەرىپ, حالىقتى جۇمىلدىرۋى ناتيجەسىندە 4 ايدا قىرۋار شارۋا اتقارىلدى. شىلدەدە قۇرىلىس جۇمىستارى اياقتالادى, دەگەنگە سەنبەگەندەر دە بولدى. مىنە, بۇگىن سونىڭ ناتيجەسىنە كوز جەتتى. سالتاناتتى شاقتا بىرىنشىدەن سىزدەردىڭ اتتارىڭىزدان مەملەكەت باسشىسىنا, ۇكىمەتكە, باسقا دا قايىرىمدىلىق قولىن سوزعان قازاقستاندىقتارعا شىن كوڭىلدەن العىس ايتامىن. الىپ-قاشپا اڭگىمەگە جول بەرمەي, قىزىلاعاشتاعى جاعدايدىڭ اق-قاراسىن حالىققا جەتكىزگەن بۇقارالىق اقپارات قۇرالدارى وكىلدەرىنە دە العىس ايتقان ارتىق ەمەس. اۋىلدىڭ شىعىسىنداعى ساياباقتىڭ جانىنان تاسقىن قۇرباندارىنا ەسكەرتكىش تۇرعىزۋ جۇمىستارى اياقتالىپ قالدى. ونىڭ دا تياناعى كەلەر كۇن جاقىن. قىزىلاعاشتىڭ ەندىگى تاعدىرى وزدەرىڭىزدىڭ قولدارىڭىزدا. بۇگىنگى اسەم كەلبەتىنەن ايىرماي, اۋىل كوركى ءۇشىن ءبىر كىسىدەي ۇلەس قوسساڭىزدار نۇر ۇستىنە نۇر, دەگەن سەرىك ابىكەن ۇلى سالتاناتتى جاعدايدا باقجامال نۇرمۇحامبەتوۆا, حاليدا اتاباەۆا, زينايدا ساقىپبەكوۆا, دوسىمبەك نارلان, ءادىل رىسداۋلەتوۆ, تۇرسىن ازات باستاعان تۇرعىندارعا جاڭا باسپانانىڭ كىلتىن تاپسىردى.
وبلىستىق ارداگەرلەر ۇيىمى كەڭەسىنىڭ توراعاسى ەگەۋبەك دالعاباەۆ, قىزىلاعاشتاعى اجەلەر انسامبلىنىڭ جەتەكشىسى باقجامال نۇرمۇحامبەتوۆا حالىق اتىنان ەلباسىنا, وبلىس اكىمىنە, قۇرىلىسشىلارعا جۇرەكتەرىنەن شىققان اتالىق, انالىق العىستارىن جەتكىزدى.
جيىندا جەتىسۋ حالقىنىڭ اتىنان تاسقىننان زارداپ شەككەن قىزىلاعاش اۋىلىن قالپىنا كەلتىرۋگە اتسالىسقان قازاقستاندىقتارعا العىس ايتىپ, ۇندەۋ تاستاۋ جونىندە دە باستاما كوتەرىلدى. ويتكەنى, تاسقىننان كەيىنگى جاڭارعان ەلدى مەكەن كوپ ۇلتتى قازاقستانداعى بىرلىك پەن ىنتىماقتى ايعاقتايدى. وسىلايشا قىزىلاعاشتا سوڭعى قونىس تويى ءوتىپ, اۋىل تۇرعىندارى قۋانىشتارىن كوپپەن ءبولىستى.
كۇمىسجان بايجان.
الماتى وبلىسى.