استانا. 4 ءساۋىر. شىمكەنت قالاسىنداعى №12 مەكتەپتىڭ مۇعالىمدەرى اتالمىش ءبىلىم مەكەمەسىندە ورىن العان زاڭسىز ارەكەتتەردى جاريالادى. بۇل تۋرالى 365info.kz حابارلادى.
مۇعالىمدەردىڭ ايتۋلارىنشا, ديرەكتور مەكتەپتى اتتەستاتسيادان وتكىزۋ ءۇشىن ءار قىزمەتكەردىڭ ايلىعىنىڭ 30 پايىزىن العان. مەكەمە باسشىسى ۇستازداردان باستاپ, ەدەن تازالاۋشىلارعا دەيىنگى جۇزشاقتى ادامنان الىنعان كوميسسيانىڭ قولىنا ۇستاتادى. بىراق كوميسسياعا قىرۋار قارجى بەرىلگەنىنە قاراماستان, مەكتەپ اتتەستاتسيادان وتپەي قالادى. تەكسەرۋشىلەر الگى اقشانى ازسىنعان سەكىلدى.
جالپى, جۇزدەي قىزمەتكەردەن 2 ملن.-عا جۋىق تەڭگە جينالىپتى. ەندى مۇعالىمدەر اقشانى وزدەرىنە قايتارىپ بەرۋدى تالاپ ەتۋدە.
وسى جاعداياتتان كەيىن ۇجىم ەكىگە جارىلعان. ولاردىڭ ءبىر توبى مەكتەپ باسشىسىن جاقتاپ وتىر. ال ديرەكتور بۇعان بايلانىستى تۇسىنىك بەرۋدەن باس تارتقان.
ايتا كەتەيىك, مەكتەپتەگى ورەسكەل ارەكەتتى دالەلدەيتىن, ياعني ديرەكتوردىڭ اقشا جيناعانىن راستايتىن بەينەماتەريالدار بارشىلىق كورىنەدى.
قازىرگى تاڭدا ءتيىستى ورىندار اتالمىش ماسەلەگە قاتىستى تەكسەرۋ جۇمىستارىن باستاپ كەتتى.
جولدىباي بازار.
دەرەك, سۋرەت: vk.com.