كەشە استانا قالاسىنداعى “استانالىق” بيزنەس ورتالىعىندا ايماقتىق تەحنوپاركتەردى دامىتۋ تاقىرىبى بويىنشا ءباسپاسوز ءماسليحاتى وتكىزىلدى. ونى يندۋستريا جانە جاڭا تەحنولوگيالار مينيسترلىگى ينجينيرينگ جانە تەحنولوگيالار ترانسفەرتى ورتالىعىنىڭ اتقارۋشى ديرەكتورى بولات مەنشىك, ورتالىقتىڭ ستراتەگيالىق جوسپارلاۋ دەپارتامەنتىنىڭ ديرەكتورى ءومىرجان ءتاشىموۆ جانە “ۇلتتىق يننوۆاتسيالىق قور” اق باسقارماسى توراعاسىنىڭ ورىنباسارى انۋاربەك سۇلتانعازين جۇرگىزدى.
بۇگىنگى تاڭدا ينجينيرينگ جانە تەحنولوگيالار ترانسفەرتى ورتالىعىنا قاراستى يننوۆاتسيالىق دامۋ ينستيتۋتىنداعى جاڭا قىزمەت كورسەتۋ ءتۇرى – تەحنولوگيالىق بيزنەس-ينكۋباتورلار توڭىرەگىندەگى جۇمىستار بىرتىندەپ قارقىن الىپ كەلەدى. مەملەكەت باسشىسىنىڭ تىكەلەي باستاماسىمەن قولعا الىنىپ وتىرعان بۇل ماقساتتى جۇمىستار ەڭ الدىمەن وسى سالادا ەلىمىز ايماقتارىن كوتەرۋگە باعىتتالعان. سول سەبەپتى ول وبلىستارداعى تەحنولوگيالىق پاركتەر بازاسىندا جۇزەگە اسىرىلادى. جوعارىدا اتالعان ورتالىقتىڭ قاتىسۋىمەن قازىرگە دەيىن رەسپۋبليكانىڭ 8 ايماعىندا تەحنوپاركتەر قۇرىلىپ ۇلگەرگەن. ولار استانا, الماتى, شىمكەنت, ورال, وسكەمەن جانە پەتروپاۆل قالالارىندا ورنالاسقان. وسى تەحنوپاركتەر قۇرىلعالى بەرى 149 يننوۆاتسيالىق جوبا قابىلدانىپتى. ونىڭ ىشىندە 3 جوبا مەملەكەت تاراپىنان قولداۋعا يە بولىپ, تيىسىنشە قارجى العان.
ادەتتە ايماقتىق تەحنوپاركتەردى دامىتۋ دەگەن ۇعىمنىڭ شەڭبەرىنە شاعىن يننوۆاتسيالىق كاسىپورىنداردى قولداۋعا باعىتتالعان تەحنيكالىق بيزنەس-ينكۋباتورلار دا كىرەدى. سوندىقتان بيىلعى جىلى قابىلدانعان 2010-2014 جىلدارعا ارنالعان ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا تەحنيكالىق پاركتەردى قارجىلاندىرۋ دا قاراستىرىلعان. سونىڭ ىشىندە ۇستىمىزدەگى جىلى تۇڭعىش رەت مەملەكەت تاراپىنان شاعىن جانە ورتا يننوۆاتسيالىق كومپانيالار مەن جوبالاردى دامىتۋ ماقساتىندا تەحنولوگيالىق بيزنەس-ينكۋباتورلار قىزمەتىن كورسەتۋ ۇسىنىلىپ وتىر. وسى شارالارعا 245 ملن. تەڭگە قارجى بولىنگەن. ول نەگىزىنەن شاعىن يننوۆاتسيالىق كاسىپورىنداردى قولداۋ مەن جاڭا فيرمالاردى قۇرۋ سەكىلدى جۇمىستاردى قامتيتىن بولادى.
ءباسپاسوز ءماسليحاتىندا قازىرگى تاڭدا تەحنولوگيالىق بيزنەس-ينكۋباتورلارعا 64 جوبا ءتۇسىپ وتىرعانى ايتىلدى. ولار ەكونوميكانىڭ 7 سەكتورى بويىنشا تالدانىپ جاسالعان. جىل سوڭىنا دەيىن بۇلاردىڭ كەمىندە 30-ى ىرىكتەلىپ, قارجىلاندىرۋ جۇزەگە اسىرىلادى. “ۇلتتىق يننوۆاتسيالىق قور” اق پيلوتتىق جوبا رەتىندە قابىلدانىپ وتىرعان بۇل بيزنەس-باستامالاردىڭ باستاپقى كەزىندە اياعىنان تىك تۇرىپ كەتۋلەرى ءۇشىن بارىنشا كومەك كورسەتەدى. كەيىن تاجىريبە جيناقتاپ, كەلەسى كەزەڭگە كوشكەن كەزىندە نارىقتىق قاتىناستارعا ەركىن قوسىلىپ كەتۋلەرىنىڭ دە مۇمكىندىگىن جاسايدى. ولاي بولسا, قازىرگى تاڭدا تەحنيكالىق بيزنەس-ينكۋباتورلاردى كوتەرمەلەۋ تەحنوپاركتەردى قولداۋدىڭ ەڭ قولايلى جولى بولىپ وتىر.
سەرىك ءپىرنازار.
استانا.