...ەلدى مەكەن اتاۋلارى
مىڭ ءولىپ, مىڭ تىرىلگەن حالقىمىزدىڭ ءتىلى مەن ءدىنىن, ءداستۇرىن ساقتاۋداعى ەرەن ىستەرى اتاپ ايتۋعا تۇرارلىق. ءتىل – حالقىمىزدىڭ تاريحى, وركەنيەت پەن ءمادەنيەتىمىزدىڭ مايەگى. سوندىقتان دا وڭىردەگى ءبىر كەزدەرى سەبەپسىز تاريحي اتاۋلارىنان ايىرىلعان سەلولىق وكرۋگ ايماعىنداعى ەلدى مەكەندەر جاڭا اتاۋلارعا يە بولىپ, جۇرتشىلىقتىڭ مەرەيىن ءوسىردى.
“قازاقستان رەسپۋبليكاسىنىڭ اكىمشىلىك-اۋماقتىق قۇرىلىمى تۋرالى” زاڭىنا سايكەس وبلىس اكىمدىگىنىڭ قاۋلىسى مەن وبلىستىق ءماسليحاتتىڭ شەشىمى بويىنشا اقسۋ اۋدانىنداعى قىزىل تۋ اۋىلىنىڭ اتاۋى بارلىبەك سىرتتانوۆ, الاكول اۋدانىنىڭ گەراسيموۆكا اۋىلدىق وكرۋگى ساپاق سەلولىق وكرۋگى, ەڭبەكشىقازاق اۋدانىنداعى كراسنىي ۆوستوك اۋىلىنىڭ اتاۋى ورىكتى, وسى اۋداننىڭ وكتيابر سەلولىق وكرۋگىنىڭ اتاۋى بارتوعاي, كوكتوبە سەلولىق وكرۋگىنە قاراستى سوۆەت اۋىلىنىڭ اتاۋى قىزىلجار اۋىلى بولىپ وزگەرتىلدى.
وسىلايشا انا ءتىلىمىزدىڭ ءمارتەبەسى مەن ۇلتتىق رۋحىمىز اسقاقتاپ, ەلدىگىمىزدىڭ ەرتەڭىنە دەگەن بەرىك سەنىم قالىپتاسقانىن كوپشىلىك ريزاشىلىقپەن قابىلدادى.
كۇمىسجان بايجان. الماتى وبلىسى.
...جاعاجاي سالىنۋدا
سىرداريا اۋدانىنىڭ ورتالىعى تەرەڭوزەك كەنتى جىل وتكەن سايىن كورىكتەنىپ, تۇرعىنداردىڭ دەم الۋىنا مۇمكىندىگىنشە جاعداي جاسالىپ كەلەدى. سونىڭ ايقىن ءبىر ايعاعى, كۇنى كەشە تاعى ءبىر دەمالىس ورنى عيماراتىنىڭ ىرگەتاسى قالاندى. ياعني, ورتالىق ستاديون جانىنداعى الاڭقايعا جاعاجاي سالۋ جۇمىستارى باستاۋ الدى.
جالپى, كولەمى 1,5 گەكتارعا جۋىق القاپتى الاتىن بۇل جاعاجاي كەنت تۇرعىندارىنىڭ بوس ۋاقىتىندا دەم الۋىنا بارلىق جاعداي جاسايتىن ورىن بولماق. مۇندا سۋدا شومىلۋ عانا ەمەس, كۇنگە قىزدىرىنۋعا, سەرۋەندەۋگە, تاماقتانۋعا, ءتۇرلى سپورتتىق ويىن شارالارىنا قاتىسۋعا ءمۇمكىندىك جاسالماق. جاڭا جاعاجايدىڭ سۋى سىرداريا وزەنىنىڭ “ايتەك” كانالى ارقىلى جاڭارتىلىپ تۇرادى.
جاعاجاي قۇرىلىسىن “دانەكەر” جشس-ءى قارقىندى دا, ساپالى جۇرگىزۋدە.
ەركىن ءابىل. قىزىلوردا وبلىسى, سىرداريا اۋدانى.
...فۋتبول الاڭى پايدالانۋعا بەرىلدى
سالاماتتى ءومىر سالتى, دەنە شىنىقتىرۋ, سپورتپەن اينالىسۋ, دەنساۋلىقتى شىڭداۋ اۋىل مەن قالادا جاسوسپىرىمدەر مەن جاستار اراسىنداعى باستى تاربيەلىك ماقساتقا اينالدى. بۇل جايىندا ەلباسى جولداۋىندا دا ناقتى ايتىلدى. جۋىردا قاشىر اۋدانىنىڭ ورتالىعى تەرەڭكول اۋىلىندا ميني-فۋتبول ويىنىنا ارنالعان جاساندى سپورتتىق الاڭ اشىلدى. فۋتبولدان وتكەن الەم چەمپيوناتى تەرەڭكولدىك جاستارعا سەرپىن بەرىپ, فۋتبولعا دەگەن قىزىعۋشىلىقتارىن ارتتىرعان بولسا كەرەك.
الاڭ جاي الاڭ ەمەس, وعان سينتەتيكالىق جاسىل گازون ءتوسەلگەن, دوپ قۋىپ, ەركىن جۇگىرۋگە لايىق. اۋىل جاستارى ءۇشىن بوس ۋاقىتتارىندا دەنە شىنىقتىرىپ, فۋتبول ويناۋعا جاقسى بولدى. كوماندالار ارنايى كيىمدەرمەن قامتاماسىز ەتىلگەن. اۋدان جاستارى ءۇشىن جاقسى ءبىر جاڭالىق بولعان جاڭا سپورتتىق الاڭنىڭ اشىلۋ سالتاناتىنا ارناپ سپورتتىق شارالار ۇيىمداستىرىلدى. سول كۇنى, تەرەڭكول جانە بەسجان اۋىلدارىنىڭ فۋتبول كوماندالارى ءوزارا كەزدەسىپ, العاشقى ويىندارىن دا وتكىزدى.
فاريدا بىقاي. پاۆلودار.