كەشە ورتالىق كوممۋنيكاتسيالار قىزمەتىندە «KEGOC» اق باسقارما توراعاسى باقىتجان قاجيەۆ ءباسپاسوز ءماسليحاتىن وتكىزدى. ول «نۇرلى جول» جاڭا ەكونوميكالىق ساياساتى شەڭبەرىندە ەلەكتر ەنەرگياسى سالاسىنداعى ينفراقۇرىلىمدىق جوبالاردى جۇزەگە اسىرۋ ءىسى جونىندە اڭگىمەلەدى.
«نۇرلى جول» باعدارلامالىق قۇجاتىندا مەملەكەت باسشىسى ەنەرگەتيكتەر ءۇشىن «ەكىباستۇز-سەمەي-وسكەمەن» جانە «سەمەي-اقتوعاي-تالدىقورعان-الما» باعىتتارىندا جوعارى ۆولتتى جەلىلەر سالۋ مىندەتىن بەلگىلەگەنى ءمالىم. وسىنى ايتقان باسقارما توراعاسى بۇل تاپسىرما تىكەلەي «KEGOC» اق-تىڭ قىزمەت اياسىنا جاتاتىنىن جەتكىزدى. «اتالعان ەكى جەلى 2014 جىلى ىسكە اسىرىلا باستاعان «سولتۇستىك-شىعىس-وڭتۇستىك» ءترانزيتىنىڭ 500 كۆ-تىق ءاج سالۋ» اۋقىمدى جوباسىنىڭ قۇرامداس بولىكتەرى بولىپ تابىلادى. جوبا بويىنشا جالپى ۇزىندىعى 1700 شاقىرىمنان اساتىن جوعارى ۆولتتى 500 جانە 220 كۆ ەلەكتر جەتكىزۋ جەلىلەرى مەن قۋاتى 500 كۆ «سەمەي», «اقتوعاي» جانە «تالدىقورعان» ءۇش جاڭا قوسالقى ستانسالارىنىڭ قۇرىلىسى قامتىلادى. سونىمەن قاتار, جۇمىس ىستەپ تۇرعان 1150 كۆ «ەكىباستۇز», 500 كۆ «الما», 500 كۆ «وسكەمەن» جانە 220 كۆ «ءشۇلبى گەس» اتق قوسالقى ستانسالارىن كەڭەيتۋ جوسپارلانىپ وتىر», دەدى ب.قاجيەۆ.
ونىڭ سوزىنە قاراعاندا, بۇل جاعدايدا 500 كۆ «ەكىباستۇز-ءشۇلبى-گەس-وسكەمەن» جەلىلەرىن پايدالانۋعا بەرۋ سولتۇستىك-شىعىس قيماسىندا ەلەكتر جەلىلەرىنىڭ وتكىزۋ قابىلەتىن ارتتىرادى. ءسويتىپ, شىعىس قازاقستان وبلىسىنىڭ رەسەي بەج جەلىلەرى ارقىلى وتەتىن ەلەكتر ەنەرگياسىن تاسىمالداۋ سحەماسىنا تاۋەلدىلىگىنە قاراماستان, وسى ءوڭىردىڭ ەنەرگيا تاپشىلىعىن وتەيدى. وعان قوسا, كونتررەتتەۋىش – بۇلاق گەس-ءتى ىسكە قوسقان كەزدە ءشۇلبى گەس-ىنەن تولىق قۋات بەرۋدى قامتاماسىز ەتەدى ەكەن.
«قازىرگى ۋاقىتتا 429 مەتالل تىرەك ورناتىلدى, 130 كم. سىم جيناقتالدى. 500 كۆ «سەمەي» قوسالقى ستانساسىنىڭ قۇرىلىسى باستالدى, وندا كوممۋتاتسيالىق جابدىق مونتاجدالىپ, قوسالقى عيماراتتار سالىنۋدا. وسى جىلى تاعى دا 200 كم. جەلى تارتىلىپ, «سەمەي», «وسكەمەن» جانە «ەكىباستۇز» قوسالقى ستانسالارىندا جابدىقتاردى مونتاجداۋ جوسپارلانىپ وتىر. تۇتاستاي العاندا, جالپى قۇنى 120 ملرد. تەڭگەنى قۇرايتىن «500 كۆ سولتۇستىك-شىعىس-وڭتۇستىك» ءاج-ءنى سالۋ» جوباسى 2018 جىلى اياقتالادى. قۇرىلىس كەزىندە 1800-دەن استام جاڭا جۇمىس ورنى اشىلادى, ال اياقتالعاننان كەيىن اتالعان جەلىدە 97 ادام جۇمىس ىستەيتىن بولادى. جوبانى جۇزەگە اسىرۋ مەملەكەت سۇرانىسىنا سايكەس KEGOC-تىڭ قازاقستان بەج-ءدىڭ سەنىمدى جۇمىسى مەن ءتيىمدى دامۋىن قامتاماسىز ەتۋ جونىندەگى ۇزاق مەرزىمدى دامۋ ستراتەگياسىن ىسكە اسىرۋ جونىندەگى جۇيەلى جۇمىستاردىڭ جالعاسى بولىپ تابىلادى», دەدى باسقارما توراعاسى.
نۇرباي ەلمۇراتوۆ,
«ەگەمەن قازاقستان».