سايلاۋ دوداسى قىزعان سايىن ونىڭ بارىسىن بايقاۋعا دەگەن قىزىعۋشىلىق تا ارتىپ كەلەدى. وسى ماسەلەگە وراي كەشە ورتالىق سايلاۋ كوميسسياسى «2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا شەت مەملەكەتتەر مەن حالىقارالىق ۇيىمنىڭ بايقاۋشىلارىن اككرەديتتەۋ تۋرالى» ارنايى قاۋلى قابىلدادى.
ورتسايلاۋكوم قابىلداعان قۇجاتقا سايكەس ەلىمىز سىرتقى ساياسات ۆەدومستۆوسىنىڭ ۇسىنۋىمەن ءۇش حالىقارالىق ۇيىم مەن توعىز مەملەكەتتەن 101 بايقاۋشىنى اككرەديتاتسيادان وتكىزگەنى بەلگىلى بولدى. بۇل رەتتە سول تىركەۋدەن وتكەندەردىڭ 74-ءى تمد بايقاۋشىلار ميسسياسىنان كەلىپتى. شانحاي ىنتىماقتاستىق ۇيىمىنان بايقاۋشىلىق ميسسيانى اتقارۋعا 1 ادام تىركەلسە, تۇركىتىلدەس مەملەكەتتەر ىنتىماقتاستىعى كەڭەسىنەن 7 بايقاۋشى كەلگەنى ءمالىم بولىپ وتىر. بۇدان باسقا, بايقاۋشىلاردىڭ تورتەۋى امەريكا قۇراما شتاتتارىنان, ال ۇشەۋدەن – يسپانيا كورولدىگى مەن مولدوۆا رەسپۋبليكاسىنان جەتكەن. سونداي-اق, ەكەۋدەن – مالايزيادان, پولشا رەسپۋبليكاسى مەن يتاليا رەسپۋبليكاسىنان كەلىپتى. ال ۇلىبريتانيا مەن سولتۇستىك يرلانديا بىرىككەن كورولدىگىنەن, فرانتسيا مەن بەلگيا كورولدىگىنەن ءبىر-ءبىر بايقاۋشى اككرەديتتەلىپتى.
ورتالىق سايلاۋ كوميسسياسىنىڭ مۇشەسى مارات سارسەمباەۆتىڭ مالىمەتىنە قاراعاندا, جالپى بايقاۋشىلار سانى 435 ادامدى قۇراپ وتىر. سونىڭ ىشىندە ەقىۇ سايلاۋدى بايقاۋ جونىندەگى ميسسياسىنان 43 ادام 25 مەملەكەتتەن كەلىپتى. تمد بايقاۋشىلار ميسسياسىنان 223 ادام جەتى مەملەكەتتەن كەلىپ, اككرەديتاتسيادان وتكەن. بۇل جەردە شانحاي ىنتىماقتاستىق ۇيىمى بايقاۋشىلار ميسسياسىنان 4 مەملەكەتتىڭ ارنايى وكىلدەرى بايقاۋشى رەتىندە جىبەرىلگەنى بەلگىلى بولدى. حالىقارالىق ۇيىمداردىڭ ءۇش ميسسياسىنان (ەقىۇ/دياقب جانە تمد) 7 ادامنىڭ تىركەلگەنى, شەت مەملەكەتتەردەن 27 بايقاۋشى ميسسياسىنا كىرىسكەنى دە العا تارتىلدى. سونىمەن, ءبىر حالىقارالىق ۇيىم (تۇركىتىلدەس مەملەكەتتەر ىنتىماقتاستىعى كەڭەسى) مەن شەت مەملەكەتتەردى قوسا العاندا, 337 بايقاۋشى اككرەديتتەلگەن.
سونداي-اق, قازاقستان رەسپۋبليكاسى سىرتقى ىستەر مينيسترلىگى 19 مەملەكەتتەن بۇقارالىق اقپارات قۇرالدارىنىڭ 98 وكىلىن اككرەديتتەگەنى بەلگىلى بولدى. اككرەديتاتسيالىق كەزەڭنەن وتكەن شەتەلدىك بايقاۋشىلاردىڭ جالپى سانى 435 ەكەن. ورتالىق سايلاۋ كوميسسياسىنىڭ مۇشەسى بۇقارالىق اقپارات قۇرالدارىنىڭ وكىلدەرى تاراپىنان قويىلعان ساۋالدارعا دا جاۋاپ بەردى. م.سارسەمباەۆ ءاربىر شەتەلدىك بايقاۋشى قازاقستان زاڭناماسى ەرەجەلەرى بويىنشا جۇمىس ىستەۋى ءتيىس. ءويتكەنى, ەلىمىز اۋماعىندا ءوز زاڭىمىز ءجۇرەدى. بىراق كەيبىر بايقاۋشىلار ەقىۇ نەمەسە تمد بايقاۋشىلار ميسسياسىنان بولعاندىقتان, وزدەرىنىڭ كودەكس نورمالارى بويىنشا دا جۇمىس ىستەيدى. قازاقستان رەسپۋبليكاسىنىڭ سايلاۋ تۋرالى زاڭناماسىنىڭ نورمالارى, ەرەجەلەر مەن مىندەتتەمەلەر جانە قۇقىقتارى حالىقارالىق ۇيىمداردىڭ كودەكسىنە سايكەس كەلەدى. «سوندىقتان ەشقانداي قايشىلىق جوق. ولار قازاقستاننىڭ زاڭ ەرەجەلەرىن ورىندايمىز دەسە دە, حالىقارالىق كودەكستەر نورمالارىن ورىندايمىز دەسە دە ءبىر-بىرىنە ساي بولىپ تابىلادى. بۇرىنعى سايلاۋ ناۋقانىندا ەشقانداي زاڭ بۇزۋشىلىقتار ورىن العان جوق جانە دە الداعى سايلاۋدا دا سولاي بولارىنا سەنىم مول», دەدى مارات الدوڭعار ۇلى.
اسقار تۇراپباي ۇلى,
«ەگەمەن قازاقستان».