كەشە استانا مەن اقتوبە قالالارىندا سايلاۋ ۇيىمداستىرۋشىلارمەن جانە سايلاۋ پروتسەسىنە قاتىسۋشىلارمەن «2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ۇيىمداستىرۋ مەن وتكىزۋ» اتتى تاقىرىپتا سەمينارلار ءوتتى.
استاناداعى سەميناردى قازاقستان رەسپۋبليكاسى ورتالىق سايلاۋ كوميسسياسى مەن استانا قالاسىنىڭ اۋماقتىق سايلاۋ كوميسسياسى ۇيىمداستىردى. وعان ورتالىق سايلاۋ كوميسسياسى توراعاسىنىڭ ورىنباسارى ۆ.ك. فووس, ورتالىق سايلاۋ كوميسسياسىنىڭ مۇشەسى ت.ۆ.وحلوپكوۆا جانە ورتالىق سايلاۋ كوميسسياسىنىڭ اپپاراتى قارجى-باقىلاۋ ءبولىمىنىڭ مەڭگەرۋشىسى م.ب. مۇحامەتوۆا, تمد-دان بايقاۋشىلار ميسسياسى شتابىنىڭ جەتەكشىسى ە.ا.سلوبودا, ەقىۇ/دياقب ميسسياسىنىڭ سايلاۋ ماسەلەلەرى جونىندەگى مامانى لۋسيان راۋل مۋرەشان, سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ وكىلى ن.ك.تىلەۋكەنوۆ قاتىستى.
ال اقتوبەدە باتىس قازاقستان, اتىراۋ, ماڭعىستاۋ جانە اقتوبە وبلىستارىنىڭ اۋماقتىق جانە ۋچاسكەلىك سايلاۋ كوميسسيالارىنىڭ مۇشەلەرىمەن بولعان سەميناردىڭ جۇمىسىنا قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى ل.ج.سۇلەيمەن, سونداي-اق, ەقىۇ/دياقب ميسسياسىنىڭ بايقاۋشىلارى روبەرت حارلي براندستەتتەر مەن حەلەنا ماريا-تەرتتۋ لااتيو قاتىستى.
اتالعان ءىس-شارالارعا قاتىسۋشىلار رەتىندە, سونداي-اق, ساياسي پارتيالار مەن قوعامدىق بىرلەستىكتەردىڭ وكىلدەرى, قازاقستان رەسپۋبليكاسىنىڭ پرەزيدەنتتىگىنە كانديداتتاردىڭ سەنىم بىلدىرىلگەن ادامدارى, بايقاۋشىلار, بۇقارالىق اقپارات قۇرالدارى مەن قازاقستان رەسپۋبليكاسىنىڭ مۇددەلى مەملەكەتتىك ورگاندارىنىڭ وكىلدەرى شاقىرىلدى.
سەمينارلار شەڭبەرىندە سايلاۋ ناۋقانىن قارجىلىق, ماتەريالدىق-تەحنيكالىق, ۇيىمداستىرۋشىلىق جانە اقپاراتتىق قامتاماسىز ەتۋگە قاتىستى ماسەلەلەر, سونىمەن قاتار, سايلاۋ كوميسسيالارىنىڭ, جەرگىلىكتى اتقارۋشى ورگانداردىڭ, ۇكىمەتتىك ەمەس ۇيىمداردىڭ, بايقاۋشىلاردىڭ, ازاماتتىق قوعام ينستيتۋتتارى مەن بۇقارالىق اقپارات قۇرالدارىنىڭ ءوزارا ءىس-ارەكەتىنىڭ تيىمدىلىگىن ارتتىرۋدىڭ تۇرلەرى مەن ادىستەرى تالقىلاندى.
بىرلەسكەن جۇمىستىڭ ماڭىزدى باعىتتارىنىڭ ءبىرى رەتىندە سايلاۋ پروتسەسىنە قاتىسۋشىلاردىڭ ءبارىنىڭ سايلاۋ زاڭناماسى نورمالارىنىڭ بۇلجىتپاي ساقتالۋىن قامتاماسىز ەتۋ قاجەتتىگى اتاپ ءوتىلدى.
پىكىرتالاس بارىسىندا سايلاۋ پروتسەسىن قۇقىقتىق جانە قۇجاتتامالىق قامتاماسىز ەتۋ, سايلاۋشىلاردىڭ تىزىمدەرىن تۇزەتۋ بويىنشا جۇمىستى ۇيىمداستىرۋ, سايلاۋدى اقپاراتتىق سۇيەمەلدەۋ, سايلاۋالدى ۇگىتتى جۇرگىزۋ جانە داۋىس بەرۋ كۇنىنە دايىندىق ماسەلەلەرى اسا قىزىعۋشىلىق تۋدىردى.
ورتسايلاۋكوم مۇشەلەرى قۇقىق قولدانۋ تاجىريبەسىنىڭ وزەكتى ماسەلەلەرى جونىندە بىرقاتار تۇسىندىرمەلەر بەردى.
سايلاۋ ۋچاسكەلەرىندە داۋىس بەرۋدى ۇيىمداستىرۋدىڭ راسىمدىك ماسەلەلەرىنە جانە داۋىس بەرۋ كۇنى ۋچاسكەلىك سايلاۋ كوميسسيالارىنىڭ ءىس-ارەكەتتەرىنە ەرەكشە كوڭىل ءبولىندى.
ءوز تاراپىنان اۋماقتىق جانە ۋچاسكەلىك سايلاۋ كوميسسيالارىنىڭ مۇشەلەرى جۇمىس تاجىريبەسىمەن ءبولىسىپ, سەميناردا تالقىلانعان تاقىرىپتار جونىندە پىكىر الماستى.
«ەگەمەن-اقپارات».