شاراينا
بۇعان دەيىن حابارلانعانداي, وحوت تەڭىزىندە رەسەيلىك «دالنىي ۆوستوك» تراۋلەرى سۋعا باتىپ كەتكەن بولاتىن. سوڭعى مالىمەتتەرگە قاراعاندا, كەمەنىڭ بورتىندا 132 ادام بولعان. ولاردىڭ 81-ءى رەسەيلىك جانە 51-ءى شەتەلدىكتەر كورىنەدى.
قازىرگى كەزدە وحوت تەڭىزىندە جوعالىپ كەتكەن بالىقشىلاردى ىزدەستىرۋ جۇمىستارى جالعاستىرىلۋدا. قۇتقارۋشىلار 3 ءساۋىر كۇنى ءتىرى قالعان تەڭىزشىلەردى ەڭ جاقىن ساحالين پورتىنا باعىت ۇستانعان «اندرومەدا» كەمەسىنە وتىرعىزعان. جاعدايلارى وتە اۋىر دەگەندەردى تىكۇشاقپەن ماگادان قالاسىنداعى اۋرۋحاناعا جونەلتكەن. كۇشتى جەل ىزدەستىرۋ جۇمىستارىنا ەلەۋلى كەدەرگى كەلتىرۋدە. قۇتقارۋشىلار ىشىندە ءتىرى قالعان ادامدار بار دەپ ەسەپتەلگەن بالىقشىلار كەمەلەرىنە ءالى دە بولسا جاقىنداپ بارا الماي وتىر. قۇتقارۋ وپەراتسيالارى 10 مىڭ شارشى شاقىرىم اۋماقتا جۇرگىزىلۋدە.
سانكتسيانى الۋ شارتتارى اتالدى
ەۋروپا وداعى مەن اقش يرانعا قارسى سانكتسيانىڭ كۇشىن جويۋ شارتتارىن اتادى. شەكتەۋلەردى الىپ تاستاۋ ءۇشىن تەھران يادرولىق باعدارلاما بويىنشا ءوز موينىنا العان مىندەتتەمەلەردى ورىنداۋى ءتيىس.
ول ءۇشىن يران الدىمەن ماگاتە ينسپەكتسياسىنان ءوتۋى كەرەك. لوزاننادا وتكەن حالىقارالىق دەلدالدار «التىلىعى» مەن يران اراسىنداعى كەلىسسوزدەردىڭ ناتيجەلەرى مىنە, وسىنداي. ەۋرووداق بيلىگى كەلىسسوزدەر قورىتىندىسى بويىنشا ماگاتە جۇمىسىنىڭ قورىتىندىسىنا وراي تەھرانعا قارسى سانكتسيانى الىپ تاستاۋ تۋرالى شەشىم قابىلدادى. يران تارابى بولسا ۋراندى بايىتۋ جونىندەگى جاڭا نىساندار قۇرىلىسىن سالۋدان 15 جىلعا باس تارتۋعا ءوز كەلىسىمىن بەرىپ وتىر. وسى ۋاقىتقا دەيىن جيناقتالعان يادرولىق وتىن قورلارى ەندىگى جەردە تەك عىلىمي ماقساتتار ءۇشىن عانا پايدالانىلاتىن بولادى.
بريكس گرەكياعا كومەكتەسە مە؟
وسى ايدان باستاپ قۇرامىنا برازيليا, رەسەي, ءۇندىستان, قىتاي جانە وار كىرەتىن بريكس توبىنا رەسەي توراعالىق ەتەدى. بۇل ەلدەردىڭ ازاماتتارى جەر شارى حالقىنىڭ 42 پايىزىن قۇرايدى, الەمدىك ءىجو-ءنىڭ 27 پايىزىن دا وسى ەلدەر وندىرەدى.
بەلگىلى بولعانىنداي, بريكس توبىنىڭ بۇگىندە ەكونوميكالىق اۋىر جاعدايدى باستان كەشىپ وتىرعان گرەكياعا كومەكتەسپەك نيەتى بار كورىنەدى. ءتىپتى, بريكس-ءتىڭ دامۋ بانكى قازىردىڭ وزىندە-اق گرەكياعا كومەك كورسەتۋگە دايىن. ساياساتتانۋشى پول كرەيگ روبەرتستىڭ پىكىرىنشە, مۇنداي جاعدايدا گرەكيا باتىستىق قارجى ينستيتۋتتارىنان تەرىس اينالىپ, باتىستىڭ توناۋىنا ۇشىراعان وزگە ەلدەردىڭ دە ودان ۇلگى الۋى مۇمكىن. ونىڭ ايتۋىنا قاراعاندا, گرەكيانىڭ بريكس-پەن ىنتىماقتاسۋ مۇمكىندىگى يسپانيا, يتاليا, يرلانديا, سونداي-اق, پورتۋگاليا سياقتى مەملەكەتتەردىڭ دە نازارىن اۋدارىپ وتىر.
حۋسيتتەر قاشۋعا ءماجبۇر بولۋدا
اۋە سوققىلارىنان كەيىن حۋسيتتەر ادەندەگى پرەزيدەنت سارايىنان قاشىپ شىققان. ەرەۋىلشىلەر كەسكىلەسكەن ۇرىستاردان كەيىن وسىنىڭ الدىنداعى كۇنى عانا پرەزيدەنت سارايىن باسىپ العان بولاتىن.
حۋسيتتەر ساۋديتتەر باستاعان كواليتسيا ۇشاقتارى رەزيدەنتسيا اۋماعىنداعى ولاردىڭ پوزيتسيالارىنا سوققى جاساعاننان كەيىن قاشۋعا ءماجبۇر بولعان. وسىنىڭ الدىندا ادەن قالاسى ءۇشىن بولعان قاقتىعىستا كەم دەگەندە 44 ادامنىڭ قازا تاپقانى بەلگىلى بولىپ وتىر. ايتا كەتۋ كەرەك, حۋسيتتەرگە قارسى «شەشىمدىلىك داۋلى» اتتى اسكەري وپەراتسيا ناۋرىزدىڭ سوڭىندا باستالدى. باحرەين, كاتار, كۋۆەيت جانە ءباا اۆياتسيالارىنىڭ قولداۋىمەن ساۋديالىق اسكەري اۋە كۇشتەرى يەمەن اۋماعىنىڭ ەلەۋلى بولىگىنە باقىلاۋ ورناتقان ەرەۋىلشىلەر پوزيتسيالارىن بومبىلاۋدى باستاعان بولاتىن. كەيىن كواليتسياعا ەگيپەت, يوردانيا, ماروككو, پاكىستان جانە سۋدان ەلدەرى قوسىلدى.
اشىق تەڭىزدەگى 66 كۇن
وسىدان ەكى ايدان استام ۋاقىت بۇرىن تەڭىزدە جوعالىپ كەتكەن اقش ازاماتىن ونىڭ جانىنان ءوتىپ بارا جاتقان كەمە تاۋىپ العان. بۇل تۋرالى جۋرناليستەرگە جۇما كۇنى امەريكالىق جاعالاۋ كۇزەتى قىزمەتكەرلەرى حابارلاعان.
37 جاستاعى لۋي دجوردان ۇستىمىزدەگى جىلدىڭ 29 قاڭتارى كۇنى جوعالىپ كەتكەن كورىنەدى. بەلگىسىز سەبەپتەردەن ول ءجۇزىپ كەلە جاتقان ياحتا ىستەن شىعىپ, سونىڭ سالدارىنان كەمەنى ۇيگە قاراي بۇرۋدىڭ رەتى كەلمەگەن. نەمىستىڭ Houston Express تانكەرى دجورداندى سولتۇستىك كورولينا شتاتى جاعالاۋىنان 320 شاقىرىم جەردەن تاپقان. ولار ونى امەريكا اۋماعىنا اكەلگەننەن كەيىن, جاعالاۋ كۇزەتىنىڭ تىكۇشاعى ۆيردجينيا شتاتىنىڭ اۋرۋحاناسىنا جەتكىزگەن. دجورداننىڭ ايتۋىنا قاراعاندا, ول قولىمەن ۇستاعان بالىقپەن قورەكتەنىپ, جاڭبىر سۋىن ءىشۋدىڭ ارقاسىندا ءتىرى قالعان.
بۇرىنعىعا تاعىلعان ايىپتار
قىتايدىڭ جوعارعى حالىق پروكۋراتۋراسى قىتاي كومپارتياسى ساياسي بيۋروسىنىڭ تۇراقتى كوميتەتىنىڭ بۇرىنعى مۇشەسى, ارناۋلى قىزمەتتىڭ بۇرىنعى باسشىسى چجوۋ يۋنكانعا سىبايلاس جەمقورلىققا باردى جانە مەملەكەتتىك قۇپيالاردى تاراتتى دەگەن ايىپ تاعىپ وتىر.
تاراتىلعان حابارعا قاراعاندا, جوعارعى حالىق پروكۋراتۋراسى تەرگەۋ بارىسىندا چجوۋ يۋنكاننىڭ «پارا العانىن, قىزمەت بابىن جەكە باسىنا پايدالانعانىن, مەملەكەتتىك قۇپيانى تاراتقانىن» انىقتاعان. جاريا ەتىلگەن قۇپيالاردىڭ سيپاتى تۋرالى ازىرگە ناقتى مالىمەتتەر جوق. وتكەن جىلدىڭ جەلتوقسانىندا پارتيالىق ءتارتىپتى بۇرمالادى دەگەن كۇمانمەن چجوۋ يۋنكاندى پارتيا قاتارىنان شىعارعان بولاتىن. «سينحۋا» اقپارات اگەنتتىگىنىڭ حابارىنا قاراعاندا, بۇرىنعى شەنەۋنىكتىڭ ادۆوكاتپەن جۇمىس ىستەۋگە قۇقى بار.
حاتشى – جاڭا لاۋازىم
وڭتۇستىك كورەيا پرەزيدەنتى پاك كىن حە كحدر تاراپىنان قاۋىپ بار دەگەن جەلەۋمەن كيبەرقاۋىپتەرگە باقىلاۋ جاساۋدى كۇشەيتۋ جونىندە شەشىم قابىلداعان. ۇكىمەت وسىلايشا 31 ناۋرىز كۇنى كيبەرقاۋىپتەر بويىنشا حاتشى لاۋازىمىن بەكىتكەن.
رەنحاپ اقپارات اگەنتتىگىنىڭ جۇما كۇنى تاراتقان مالىمەتتەرىنە قاراعاندا, بۇل لاۋازىمعا ەلدىڭ قارۋلى كۇشتەرى كيبەرنەتيكالىق شتابىنىڭ باستىعى سين ين سوب تاعايىندالعان. جوعارىدا اتالعان اگەنتتىكتىڭ اقپاراتتارى بويىنشا, دوكتورلىق ديسسەرتاتسيانى اقش-تا قورعاعان گەنەرال سين ين سوب كيبەرقاۋىپسىزدىك جانە كيبەرنەتيكالىق تەرروريزممەن كۇرەس سالاسىنداعى ساراپشى بولىپ تابىلادى.
ينتەرنەت ماتەريالدارى نەگىزىندە دايىندالدى.