قىتايدىڭ حەنان پروۆينتسياسىندا وزەن سۋىنىڭ مولشەردەن تىس ارتىپ كەتۋىنەن كوپىر شايىلىپ, 37 ادام قازا تاپقان. سونىمەن قاتار 19 ادام ءىز-ءتۇزسىز جوعالعاندار ساناتىندا.
جاۋىن-شاشىننىڭ توقتاۋسىز جاۋىنان ارناسىنان تاسىعان وزەن لۋانچۋن اۋدانىنداعى كوپىردى ج ۇلىپ كەتكەن. ۇزىندىعى 153 مەتر بولاتىن كوپىردىڭ ۇستىندە ونداعان ادام بولعان, ولاردىڭ 6-ۋى قۇتقارىلدى. ءۇش كۇن بويى جاۋعان جاۋىن سالدارىنان 52 ادام كوز جۇمعان.
* * *
رۋمىنيادا ورىن العان يزرايلدىك تىكۇشاق اپاتىنان بىردە-ءبىر ادام ءتىرى قالمادى. ونىڭ بورتىندا جەتى يزرايلدىك جانە ءبىر رۋمىندىق اسكەري بولعان. وقيعا رۋمىن-يزرايل وقۋ-جاتتىعۋىن وتكىزۋ كەزىندە ورىن الدى.
تىكۇشاق مانەۆر جاساۋ كەزىندە قىراتقا سوعىلىپ, ارتىنان ورتكە ورانعان. دەرەك كوزىنە قاراعاندا, ۇشۋ ماشينەسى تولىق ءب ۇلىنىپ, ونىڭ سىنىقتارى جان-جاققا شاشىلعان. مۇنداي جاعدايدا ءتىرى قالۋ دا مۇمكىن ەمەس.
* * *
يرانعا ءبىر جاقتى نەمەسە ۇجىمدىق سانكتسيالىق شارالارمەن ىقپال ەتۋ تاجىريبەسى قابىلدانبايدى. بۇل جونىندە رەسەي ءسىم وكىلى يرانعا قاتىستى قوسىمشا سانكتسيا قابىلدانۋىنا وراي مالىمدەدى.
جاڭا سانكتسيا يراننىڭ ەكونوميكالىق قارىم-قاتىناستارىنا قارسى باعىتتالىپ, مۇناي-گاز سالاسىنا ينۆەستيتسيا سالۋعا تىيىم سالادى. ەو كەڭەسىنىڭ مۇنداي سانكتسياسىن ءسىم وكىلى نەستەرەنكو بۇۇ قك سانكتسيالىق رەجىمىنىڭ شەڭبەرىنەن شىعىپ وتىرعاندىعىمەن ءتۇسىندىردى.
* * *
بريتانيالىق ۆر كومپانياسىنىڭ جەتەكشىسى توني حەيۆورد قىزمەتىنەن كەتىپ, ونىڭ ورنىنا روبەرت دادلي كەلەتىن بولدى. اتالعان كومپانيا مەكسيكا شىعاناعىنداعى اپاتتان 17 ميلليارد دوللار جوعالتىپتى.
Sky News اقپاراتتىق تەلەارناسى حابارلاعانداي, Greenpeace بەلسەندىلەرى كەشە لوندوندا ۆر-ءدىڭ بارلىق ماي قۇيۋ ستانسالارىنىڭ جۇمىسىن توقتاتىپ تاستاعان. كومپانياعا تيەسىلى 50 ماي قۇيۋ ستانساسىندا كەزەكشىلىكتە بولعان بەلسەندىلەر “جابىق. بەنزين ءبىتىپ قالدى” دەگەن جازۋى بار پلاكاتتار ءىلىپتى.
* * *
اراب وتباسىنان شىققان 8 سىنىپ وقۋشىسى شۆەتسيادا جەرگىلىكتى مەكتەپتەردىڭ بىرىنە جازعان وتىنىشىندە وقۋشىلار قاتارىنا قابىلداۋدى سۇراپتى. الايدا, ونىڭ بۇل ءوتىنىشى بوس ورىن جوق دەگەن سىلتاۋمەن قابىل الىنباعان.
ارتىنشا الگى وقۋشىنىڭ اپكەسى مەكتەپ حاتشىلىعىنا حابارلاسىپ, “اننەلي” دەگەن جامىلعى شۆەدتىك ەسىممەن “يوحانا” دەگەن بالاسىنىڭ مەكتەپكە بارعىسى كەلەتىنىن ايتىپتى. ارعى جاقتاعىلار بۇل ءوتىنىشتەرىن قۋانا قابىل العان. ەندى اراب وتباسى كەمسىتۋشىلىك ءجونىندەگى ومبۋدسمەنگە تەلەفون جازبالارىن ۇسىنا وتىرىپ ارىزدانۋدا.
* * *
“كەز كەلگەن پروبلەما تۋىنداعان جاعدايدا كۋبا ۆەنەسۋەلا جاعىندا بولادى”.
سانتا ماريا ارالىندا كۋبا-ۆەنەسۋەلا كەزدەسۋىنىڭ جابىلۋىندا سويلەگەن سوزىندە كۋبا مينيسترلەر كەڭەسىنىڭ ءتوراعاسى جانە مەمكەڭەس باسشىسى راۋل كاسترو وسىلاي دەدى.
ينتەرنەت ماتەريالدارى نەگىزىندە ازىرلەندى.