كەشە سىرتقى ىستەر مينيسترلىگىندە “ۆەنا – ەۋروپا جۇرەگى” ساۋالناما-بايقاۋىنىڭ باستالۋىنا ارنالعان ءباسپاسوز ءماسليحاتى ءوتتى. اتالعان ۆەدومستۆونىڭ حالىقارالىق اقپارات كوميتەتى, اۆستريانىڭ قازاقستانداعى ەلشىلىگى, “اۆستريا اۋە جولدارى” جانە قازاقستان فۋتبول فەدەراتسياسى وكىلدەرى قاتىسقان باسقوسۋ كەزىندە بايقاۋدىڭ ەرەكشەلىكتەرى مەن العىشارتتارى جونىندە جان-جاقتى مالىمەتتەر ايتىلدى.
“قازاقستاننىڭ ەقىۇ-عا ءتوراعالىق ەتۋى ەلىمىزدىڭ “كارى قۇرلىقتىڭ” ساياسي, ەكونوميكالىق جانە مادەني كەڭىستىگىمەن جاقىنداسۋىنا مول مۇمكىندىك تۋعىزۋدا. ءوزىنىڭ جاۋاپتى حالىقارالىق ميسسياسىنىڭ شەڭبەرىندە وتاندىق ديپلوماتيا بەيبىتشىلىك, توزىمدىلىك جانە كەمسىتپەۋشىلىك قۇندىلىقتارىن ناسيحاتتاۋعا زور كوڭىل ءبولىپ كەلەدى. ايتارلىقتاي جاقىن, كەيدە پارا-پار قۇندىلىقتار سپورت الەمىندە دە ءوز كورىنىسىن تابۋدا. ماسەلەن, سالاماتتى ءومىر سالتى, جارىستى ەرەجەگە سايكەس جۇرگىزۋ, وعان قاتىسۋشىلاردىڭ بارلىعىنا شىققان تەگىنە, تىلىنە, ناسىلىنە جانە ءدىني سەنىم-نانىمىنا قاراماستان تەڭ قاراۋ. مىنە, وسىنداي كوزقاراسقا نەگىزدەلە وتىرىپ, بايقاۋدى ۇيىمداستىرۋشىلار “ۆەنا – ەۋروپا جۇرەگى” اتتى ساۋالناما-بايقاۋىن ءوتكىزۋ ارقىلى قازاقستان, اۆستريا جانە ەقىۇ, سونداي-اق ديپلوماتيا جانە سپورت اراسىنداعى جاعىمدى ىقپالداستىق ۇلگىسىنە جۇرتشىلىق نازارىن اۋدارعىسى كەلەدى”, دەيدى سىرتقى ىستەر مينيسترلىگى حالىقارالىق اقپارات كوميتەتىنىڭ توراعاسى رومان ۆاسيلەنكو.
ونىڭ سوزىنە قاراعاندا, بايقاۋدىڭ بۇلايشا اتالۋىنىڭ ءوز سەبەبى بار. سەبەبى, وسى قالادا ەقىۇ-نىڭ حاتشىلىعى ورنالاسقان. ال بۇل قازاقستاندىقتار ءۇشىن بارلىق ەۋروپالىق استانالاردىڭ ىشىندە ايرىقشا ورىن الاتىنى بەلگىلى. تاعى ءبىر اتاپ وتەرلىگى, 7 قىركۇيەك كۇنى ۆەنادا ەۋروپا چەمپيوناتىنىڭ ىرىكتەۋ ءتۋرنيرىنىڭ شىمىلدىعى قازاقستان ۇلتتىق قۇراماسى مەن اۆستريالىقتاردىڭ ويىنىمەن اشىلماق. ال بۇل فۋتبول ويىنىنىڭ فينالدىق جارىسى 2012 جىلى پولشا مەن ۋكراينادا وتەدى.
باسقوسۋ كەزىندە ۇيىمداستىرۋشىلار بايقاۋعا قاتىسۋ ءۇشىن ۆەنا قالاسى, “اۆستريا اۋە جولدارى”, وتاندىق جانە ەۋروپالىق فۋتبول, ەقىۇ-نىڭ قىزمەتى مەن وعان قازاقستاننىڭ توراعالىق ەتۋىنە قاتىستى ساۋالدارعا جاۋاپ بەرۋ قاجەتتىگىنە توقتالىپ ءوتتى. بۇل سۇراقتار مەن ولارعا بەرىلگەن جاۋاپتاردىڭ نۇسقالارى قازاقستاندىق جەتەكشى سپورتتىق جانە قوعامدىق-ساياسي باق-تاردا جانە ينتەرنەت-پورتالداردا, سونداي-اق, قازاقستان فۋتبول فەدەراتسياسىنىڭ سايتىندا (www.kkf.kz) ورنالاستىرىلاتىن بولادى. ال ساۋالدارعا دۇرىس جاۋاپ قايتارعاندار 23 تامىز كۇنى استانادا وتەتىن جۇلدە ۇتىسىنا قاتىسا الادى.
“باس جۇلدە – “اۆستريا اۋە جولدارى” كومپانياسى ۇسىنعان “استانا-ۆەنا-استانا” باعىتى بويىنشا ەكى ادامعا ۇشۋ بيلەتتەرى جانە 6-10 قىركۇيەك ارالىعىندا ۆەنالىق قوناقۇيدە بەس كۇن تۇرۋ مۇمكىندىگى. سونداي-اق, قازاقستان فۋتبول فەدەراتسياسى ۇسىنعان ەكى بيلەتتىڭ يەلەرى 7 قىركۇيەكتە وتەتىن قازاقستان جانە اۆستريا قۇرامالارىنىڭ ويىنىن تاماشالاۋعا ءمۇمكىندىك الادى”, دەيدى. ر. ۆاسيلەنكو.
باسقوسۋ سوڭىندا ونى ۇيىمداستىرۋشىلار بۇل بايقاۋدىڭ قازاقستان مەن اۆستريا ىنتىماقتاستىعىنىڭ بەكۋىنە, ەقىۇ-داعى قازاقستاندىق توراعالىقتىڭ ءدارىپتەلۋىنە, سالاماتتى ءومىر سالتىن ناسيحاتتاۋعا ءوز ىقپالىن تيگىزەدى دەگەن ويلارىن جەتكىزدى. بۇل رەتتە ولار باق وكىلدەرىن وسى باستامانى جۇزەگە اسىرۋعا قولداۋ كورسەتۋلەرىن سۇرادى.
ءلايلا ەدىلقىزى.