بۇگىندە ماماندىقتىڭ نەشە الۋان ءتۇرى بار. سونىڭ ىشىندە ۇيىقتاپ تۇرساڭ, ۇمىتىپ قالاتىن ماماندىق تا بار. ال وي ەڭبەگى, شىعارماشىلىق جۇمىس قاشاندا اۋىر. تىگىنشىلىكتى, ەتىكشىلىكتى وقىپ ءۇيرەنۋگە بولار, ال اقىندىققا, جازۋ-سىزۋعا, ونەرگە كەزدەيسوق ادامنىڭ كەلۋى نەعايبىل. ويتكەنى, بۇل اللادان بۇيىراتىن سىباعا. ماسەلەن, جۋرناليست ماماندىعى. ول ۋاقىت تالعامايدى, توقتاۋدى بىلمەيدى. سول ۋاقىت اراسىندا كورە, ەستي, جازا ءبىلۋىڭ كەرەك. ياعني, ويعا دا, قىرعا دا, ۇيدە دە, تۇزدە دە ىلەسىپ, وي جەتەگىندە جۇرگەنىڭ. ال جازۋدىڭ ۇلكەن-كىشىسى جوق. ماقالا استىندا قولتاڭباڭ تۇرعان سوڭ, وعان ۇلكەن جاۋاپكەرشىلىكتى قوسىڭىز.
ەڭ باستىسى, مۇندا جىنىسقا ءبولۋ جوق. سەن ايەل ەكەنسىڭ, انا ەكەنسىڭ دەگەن بولمايدى. تالاپ ءبىر. سودان دا شىعار, بۇل كاسىپكە كەلگەن نازىك جاندىلاردىڭ, ونىڭ ىشىندە قازاق قىزدارىنىڭ اراسىندا وسى ماماندىقتىڭ قىر-سىرىن مەڭگەرىپ, ىستىعى مەن سۋىعىنا ءتوزىپ, قىزىعى مەن شىجىعىنا بار سانالى عۇمىرىن سارپ ەتكەندەر كوپ ەمەس. سولاردىڭ ءبىرى – قانشاما جىلدار بويى قولىنداعى قاسيەتتى قالامىن تۋ ەتىپ ۇستاپ, جۋرناليستيكانىڭ مايىن ءىشىپ, ماڭىزىن جەگەن, وقىعانى دا ءسوز, توقىعانى دا ءسوز, جيعانى دا, تەرگەنى دە ءسوز كۇمىسجان بايجاننىڭ اقىن بولماسا دا اقىنعا جاقىن بولماۋى مۇمكىن ەمەس ەدى. ويتكەنى, ول قىزىر دارىپ, باق قونعان, اقىندار مەن باتىرلار ەلى دەگەن اتقا لايىقتى, جىر سۇلەيلەرى ءسۇيىنباي مەن جامبىل, ولاردىڭ وكشە باسارلارى – وتەپ, ابدىعالي, ۇمبەتالى, ءاسىمحان, ءالىمقۇل, نۇرعيسا, اسەت, بالعابەك, سەيداحمەت سياقتى قارا ولەڭنەن قازان قايناتىپ, ورنەك سوزدەن ورمەك توقىعان وڭىردە كىندىك قانى تامىپ, تۋىپ-ءوستى.
ۇشار باسى – مۇز, بالاعى – كوكوراي شالعىن, بۇلاعى سىلدىراعان, قۇراعى بالبىراعان كوز تارتار الاتاۋدىڭ سىلەمدەرى, ءان مەن جىردىڭ كورىگىنە اينالعان مايتوبە مەن سۋىقتوبە تاۋلارى جۇرەگىندە وتى بار, سۇلۋلىققا, اسەمدىككە جانى ىڭكار كىشكەنە ەركە قىزدى وزىنە عاشىق ەتكەنمەن, تاعدىر باسىنان سيپاي قويمادى. ادام جالعىزدىعىن سەزىنگەندە جان جاراسىن كوك يەسى تاڭىردەن ىزدەسە كەرەك. ەرنىن ءجىبىتىپ بالا سۇيگەن اكەسى قۇدايبەرگەن كۇمىسجانى اپىل-تاپىل ءجۇرىپ, قىزىعىنا تويمايتىن ەكى جاسىندا ومىردەن ءوتتى. اناسى رىسبالا بولسا جالعىزىن قۇشاقتاپ قالا بەردى. جەسىر ايەلدى بالانىڭ بۋى كوتەرەدى دەگەن, ۇلدىڭ دا, قىزدىڭ, اكەنىڭ دە شەشەنىڭ دە بار ورنىن باسقان كوز قۋانىشى كۇمىسىنىڭ ۇستىندە جانى تۇرعانمەن, كوكىرەگى وياۋ انا بايعۇس قىزىنىڭ ءبىلىم الىپ, جالعىزدىعىن بىلدىرمەس ءۇشىن كوپشىل, اعايىن-تۋعانعا جاقىن ەتىپ وسىرۋگە تىرىستى. كەيىن اناسىنان ايىرىلىپ, قينالعان شاعىندا مىنا جالپاق دۇنيەدە جالعىزدىقتىڭ ءدامىن تاتۋعا تۋرا كەلەتىنىن, سونى مويىماي كوتەرۋ قاجەتتىگىن سەزىنەدى. ول كەزدە جاس كەزى, ۇشۋدى بىلگەنمەن قونارىن بىلمەدى, سويلەۋدى بىلگەنمەن ءجونىن ءبىلمەدى. بىراق, بىلسەم, كورسەم دەگەن ىنتازار كوڭىلى, وجەتتىگى, وقۋعا دەگەن ىنتاسى العا جەتەلەدى. مەكتەپ ءبىتىردى, قازمۋ-دىڭ جۋرناليستيكا فاكۋلتەتىنە ءتۇسىپ, ءوزى ارمانداعان ماماندىعىنا قول جەتكىزدى.
جولداما دەگەن جاس ماماندارعا جاسالعان قامقورلىقتىڭ ارقاسىندا الماتى وبلىسىنىڭ جاڭادان اشىلعان كۇرتى اۋداندىق گازەتىنە قىزمەتكە كىرگەنى دە كەشە عانا سياقتى. اۋداندىق گازەتتە ءجۇرىپ جۋرناليستىك ساتىلاردان وتكەن جاس قالامگەر 1986 جىلى تۋعان ەلىنە كەلىپ, جامبىل اۋداندىق “ەكپىندى ەڭبەك”, كەيىن ءوزى اتىن وزگەرتكەن “اتا مەكەن” گازەتىنە باس رەداكتور بولىپ بەكىتىلەدى.
اۋداندىق گازەت – اۋداننىڭ ايناسى. ونىڭ ۇستىنە اۋداندىق گازەتتە باسشى بولىپ جۇمىس اتقارۋ وڭاي ەمەس. ويتكەنى, اۋدان ورتالىعىنا قالامى جۇردەك, تاجىريبەلى جۋرناليستەردىڭ كەلۋى ەكىتالاي. قالاي بولعاندا دا كادردى ءوزىڭ جاساقتاۋعا, ولاردى قالاي جازىپ, سىزۋعا ۇيرەتۋىڭ كەرەك. كەي جاعدايدا جالعىز وزىڭە گازەت شىعارۋعا تۋرا كەلەدى: ءوزى اۆتور, ءوزى ءتىلشى. وسىلايشا باسىلىمدى اتتاي 20 جىل باسقارىپ, اۋداندىق گازەتتىڭ ءوسىپ وركەندەۋىنە ءوز ۇلەسىن قوسادى. مىنە, وسىنداي ۇلكەن مەكتەپتەن وتكەن قارىمدى جۋرناليست 2006 جىلعى قىركۇيەك ايىنان قازاق ءباسپاسوزىنىڭ قارا شاڭىراعى “ەگەمەن قازاقستان” گازەتىنىڭ الماتى وبلىسىنداعى مەنشىكتى ءتىلشىسى قىزمەتىنە شاقىرىلادى. ازعانتاي ۋاقىت اۋانىندا ول ءوزىنىڭ ىسكەرلىگىمەن, ورىنداۋشىلىق, جاۋاپكەرشىلىك قاسيەتىمەن, ەڭبەكقورلىعىمەن رەسپۋبليكالىق باسىلىم بەتىندە الماتى وبلىسىن جان-جاقتى كورسەتۋدە قىرۋار شارۋا اتقاردى. وبلىستاعى جىلت ەتكەن حاباردان باستاپ, پروبلەمالىق زەرتتەۋ ماقالالار, سۇحباتتار بەرۋدە شۇرايلى تىلىمەن, شىمىر ويىمەن ءار ءتۇرلى تاقىرىپتا جازىپ, مەنشىكتى ءتىلشىلەر اراسىندا الدىڭعى قاتاردان كورىنۋدە. ۇزاق جىلدار بويى ءباسپاسوز سالاسىندا اتقارعان جەمىستى ەڭبەگىنىڭ قايتارىمىن كورۋدە. بۇگىندە “قازاقستان رەسپۋبليكاسىنىڭ مادەنيەت قايراتكەرى”, جۋرناليستەر وداعى سىيلىعىنىڭ بىرنەشە مارتە يەگەرى. كيەلى تۋىپ-وسكەن ءوڭىرىنىڭ بابالارى مەن سول اۋدانداعى حالىققا بەلگىلى ازاماتتارىنىڭ ومىرىنەن جيناقتاپ جازىلعان “جامبىل ەلىنىڭ جايساڭدارى”, “كيە”, “جاقسىلاردىڭ پارىزى”, “كوز ىلمەيتىن كوڭىل”, ت.ب. كىتاپتاردىڭ اۆتورى.
...ءومىردىڭ زاڭى, كۇن-تۇنمەن, جاماندىق-جاقسىلىقپەن, جوقشىلىق-بارشىلىقپەن الماساتىنى اقيقات. بۇگىندە كۇمىسجان اپاي جالعىز ەمەس. باقىت شۇكىرگە قونادى دەگەن, بارعا دا, جوققا دا شۇكىرشىلىك ەتۋدە. قىزمەتى حالىقپەن بايلانىسقان, ەلدىڭ ىشىندە ءجۇرىپ, جاقسىلىقتىڭ جارشىسى بولا جۇرە قالام ۇستاعان ادامدا دوس تا, تانىس تا, تىلەكتەس جاندار دا كوپ بولسا كەرەك. ونداي دوس-جاراننان كەندە ەمەس. بىراق, ادامنىڭ ەڭ باستى باقىتى – وتباسىلىق باقىت. ومىردە ەڭ قيىن نارسە وزىڭمەن مۇراتتاس, ءوزىڭدى تۇسىنەتىن ادام تابۋ. جۇبايى سالامات بەرەكەتوۆ ەكەۋى قىزمەت بابىنداعى, تۇرمىس جاعدايىنداعى قيىندىقتاردى جەڭە ءجۇرىپ, ونەگەلى ۇل-قىز ءوسىردى. تۇلا بويى تۇڭعىشتارى گۇلميرا گەرمانيا فەدەراتيۆتىك رەسپۋبليكاسىنىڭ ارنايى گرانتىن ۇتىپ الىپ, ءبىلىم سالاسىنان دوكتورلىق ديسسەرتاتسياسىن سوندا شەت تىلىندە قورعاماق. بەكبولاتتارى ىلە اۋدانىنداعى اۋىلدىق وكرۋگتىڭ اكىمى, كەنجەلەرى گۇلنۇر – اعىلشىن ءتىلىنىڭ مامانى, الەم تىلدەرى ۋنيۆەرسيتەتىن قىزىل ديپلومعا بىتىرگەن, سول ءبىلىم ورداسىنىڭ وقىتۋشىسى بولسا, كۇيەۋبالالارى سايىمجان بۇگىندە ماسكەۋدە اسكەري ديپلوماتيا اكادەمياسىنىڭ تىڭداۋشىسى. بالا بالىم, نەمەرە جانىم دەگەن قازاقپىز عوي, بىرىنەن ءبىرى ءتاتتى جىبەك, ءنۇريلا, نۇرايىم, نۇردانا, نۇرسانا اتا-اپالارىنىڭ قۋانىشتارى.
گۇلزەينەپ سادىرقىزى.