جاقىندا يتاليانىڭ ليدو ادريانو كۋرورتتى قالاسىندا وتكەن اسەمدىك پەن تالانتتار بايقاۋىنا دۇنيەنىڭ ءار تۇكپىرىنەن ەلۋدەن اسا جاس تالاپكەرلەر قاتىستى. بايقاۋدىڭ ەرەكشەلىگى سول – جۇلدە بىرەۋ بولدى. ونى قوستانايلىق “تريۋمف” بالالار موداسى تەاترىنىڭ كىشكەنتاي مۇشەلەرى ايدانا بەرمۇحامبەتوۆا, جازيرا جۇرقاباەۆا, الينا مۇحامەدجانوۆا قانجىعالارىنا بايلاپ قايتتى. ءبىزدىڭ كىشكەنتاي ارۋلار ساحناعا ءۇش رەت شىققان. ولار العاشىندا قوستاناي قالاسىنداعى “حانىم” ءسان اتەلەسى تىككەن “اقبوتا” كوللەكتسياسىنان قازاق قىزدارىنىڭ ۇلتتىق كيىمىن كورسەتىپتى. بايقاۋعا قاتىسۋشىلار مەن قوناقتار, بەدەلدى قازىلار القاسى قوس ەتەك كويلەك پەن ۇكىلى بورىكتىڭ, قامزولدىڭ ادەمىلىگى مەن قازاق قولونەرىنىڭ قۇدىرەتىنە تاڭعالىپتى. قىزداردىڭ جۇلدەنى يەمدەنۋىنە وسى ۇلتتىق كوستيۋمگە بەرىلگەن باعا مەن قوناقتار ىقىلاسى كوپ ىقپال ەتىپتى.
ەندى “تريۋمف” بالالار موداسى تەاترىنىڭ تاعى ءبىر مۇشەسى التى جاسار ايدانا وماروۆا فرانتسياعا جۇرگەلى وتىر. ول اتاقتى فرانتسۋز مودەلەرى پەر كاردەننىڭ رەزيدەنتسياسىندا وتەتىن حالىقارالىق مودا فەستيۆالىنە قاتىسپاق. بۇل جولى دا “حانىم” ءسان اتەلەسى ايداناعا ارناپ “اقبوتا” كوللەكتسياسىنان ۇلتتىق كوستيۋم دايىندادى. كەتەر كەزدە ديزاينەر تاتيانا تايشىقوۆا ايداناعا حالقىمىزدىڭ ونەرىن پاش ەتىپ, تابىسپەن ورالۋىنا تىلەك ءبىلدىردى.
ءنازيرا جارىمبەتوۆا, قوستاناي.
سۋرەتتە: ايدانا وماروۆا ديزاينەر تاتيانا تايشىقوۆامەن بىرگە.