قاراعاندى. 26 تامىز. قاراعاندى وبلىسىندا پوليتسيا قىزمەتكەرلەرى «گازەل» جۇك كولىگىن ايداپ اكەتكەن كوللەدج ستۋدەنتىن قولعا ءتۇسىردى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى.
جۇك كولىگىن زاڭسىز ايداپ اكەتكەن ستۋدەنت قاراعاندىداعى كوللەدجدەردىڭ بىرىندە وقيدى ەكەن. جول-پاترۋلدىك پوليتسيا قىزمەتكەرلەرى كۇدىكتىنى تەمىرتاۋ قالاسىندا كولىكتى جۇرگىزىپ بارا جاتقان كەزىندە قۇرىقتادى. ستۋدەنتتىڭ مۇنداي قادامعا نە ءۇشىن, نەندەي ماقساتپەن بارعانى ازىرگە تۇسىنىكسىز. قازىر ول ۋاقىتشا ۇستاۋ يزولياتورىندا قاماۋدا وتىر.
وسى وقيعا بويىنشا قىلمىستىق ءىس قوزعالىپ, تەرگەۋ الدى امالدارى جۇرگىزىلىپ جاتىر.
قايرات ءابىلدينوۆ.
دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.
سۋرەت: autokolesa.kz.