جاقىندا پارلامەنت ءماجىلىسىنىڭ دەپۋتاتتارى ەلۋباي ورازالينوۆ, امانقوس وتەگەنوۆ اقسۋ قالاسىنىڭ اكتيۆىمەن كەزدەسىپ, “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى ەلباسىنىڭ جولداۋى اياسىندا رەسپۋبليكادا جۇزەگە اسىرىلىپ جاتقان يگىلىكتى ىستەر جونىندە كەڭىنەن بايانداپ بەردى. كەزدەسۋدى جۇرگىزگەن قالا اكىمى ورازگەلدى قايىرگەلدينوۆ اتباسىن بۇرعان دەپۋتاتتاردىڭ ميسسياسى اسا ماڭىزدى ەكەنىن اتاپ ءوتتى.
ەلۋباي ورازالينوۆ بۇگىنگى تاڭدا جولداۋدىڭ شەڭبەرىندە ەلىمىزدە اتقارىلىپ جاتقان يگى ىستەردى اڭگىمەلەپ بەردى. قازىرگى ۋاقىتتا, دەدى ول, “جول كارتاسى” باعدارلاماسى اياسىندا بەلگىلەنگەن ماقسات-مىندەتتەر تاباندىلىقپەن جانە ناتيجەلى ىسكە اسىرىلىپ جاتىر. كاسىپكەرلىكتى دامىتۋ ءۇشىن “بيزنەستىڭ “جول كارتاسى-2020” ارنايى باعدارلاماسى جاسالىپ, ول بۇگىندە ايتارلىقتاي جەمىس اكەلۋدە. جالپى, ەلىمىزدىڭ يندۋستريالىق-يننوۆاتسيالىق دامۋ باعدارلاماسىن جۇزەگە اسىرۋ ماقساتىندا اۋقىمدى جوبالار قولعا الىنعان. جۋىق ارادا پاۆلودار وبلىسىندا پرەزيدەنتتىڭ قاتىسۋىمەن ەلەكتروليز زاۋىتىنىڭ ەكىنشى كەزەگى سالتاناتتى تۇردە ىسكە قوسىلدى. سونداي-اق ەلباسىنىڭ جولداۋىنا سايكەس اقسۋ فەرروقورىتپا زاۋىتىندا اگلومەرات تسەحىنىڭ العاشقى كەزەگى پايدالانۋعا بەرىلدى. پاۆلودار وبلىسىنداعى ەكىنشى جوبا – جۇك ۆاگوندارىن قۇراستىراتىن كاسىپورىن. وتكەن جىلداردا نارىقتىق ەكونوميكانىڭ نەگىزدەرى قالانىپ, ەلىمىز تۇراقتىلىققا قول جەتكىزدى. قازىرگى تاڭدا قازاقستان الەمنىڭ 120-دان استام ەلىمەن جوعارى ديپلوماتيالىق قارىم-قاتىناس ورناتقان.
بۇگىندە “جول كارتاسى” اياسىندا 37 جوبا جۇزەگە اسىرىلدى. جالپى, رەسپۋبليكا بويىنشا اتالمىش باعدارلاما شەڭبەرىندە 3 مىڭ 200 جوبانى ىسكە اسىرۋ كوزدەلىپ وتىر. تابيعي قورلاردىڭ قالدىقتارىن وندىرىسكە قايتا ءتيىمدى پايدالانۋ ماسەلەسىن شەشۋ قولعا الىندى, سەبەبى, بۇل كەزەك كۇتتىرمەيتىن پروبلەمالاردىڭ ءبىرى بولىپ سانالادى.
سودان سوڭ ءسوز سويلەگەن امانقوس وتەگەنوۆ قانداي زاڭدار قابىلدانعانى جونىندە ايتىپ بەردى. كەدەن وداعىنىڭ ماڭىزى تۋرالى اڭگىمەلەدى. ونىڭ قۇرىلۋى جانە ودان ءارى بىرىڭعاي ەكونوميكالىق كەڭىستىكتىڭ پايدا بولۋى ۇلتتىق ەكونوميكانى نىعايتا ءتۇسىپ, حالىقتىڭ تۇرمىس جاعدايىن جوعارىلاتاتىنى ءسوزسىز, دەدى دەپۋتات.
“جەر قويناۋى مەن جەر قويناۋىن پايدالانۋ تۋرالى” زاڭنىڭ قابىلدانعانى جانە “تۇرمىستىق قاتىناستار تۋرالى” زاڭعا كەيبىر وزگەرىستەر, قوسىمشالار ەنگىزىلگەنىن تىلگە تيەك ەتتى. “فەرمەرلىك شارۋا قوجالىقتارى تۋرالى” زاڭ قارالىپ جاتىر. ول بويىنشا 633 دەپۋتاتتىق سۇرانىس تۇسكەن بولاتىن. بۇگىندە ءتيىستى جۇمىستار جاسالدى.
ءماجىلىس دەپۋتاتتارىمەن كەزدەسۋدى ورازگەلدى قايىرگەلدينوۆ قورىتىندىلاپ, اقسۋ وڭىرىندەگى يگىلىكتى ىستەر تۋرالى باياندادى. جاڭا قازاق مەكتەبى, ەمحانا, پوليەتيلەن قۇبىرلارىن شىعاراتىن زاۋىت پايدالانۋعا بەرىلگەنىن ايتتى. سونداي-اق “جول كارتاسى” باعدارلاماسى اياسىندا بيىل قالالىق كىتاپحاناعا, №4 ورتا مەكتەپكە, قارتتار ۇيىنە, مۇراعاتقا كۇردەلى جوندەۋ جۇمىستارى جۇرگىزىلگەنىن كولدەنەڭ تارتتى.
ءسابيرا ساعىناي, پاۆلودار وبلىسى, اقسۋ قالاسى.