استانا. 18 مامىر. قىتايدىڭ شانحاي قالاسىندا جەڭىل اتلەتيكادان «گاۋھار ليگا» جارىسىنىڭ ەكىنشى كەزەڭى ءوتتى. وندا ءۇش قارعىپ سەكىرۋدەن لوندون وليمپياداسىنىڭ چەمپيونى, وتانداسىمىز ولگا رىپاكوۆا قولا جۇلدەگەر اتاندى. بۇل تۋرالى egemen.kz حابارلادى.
وسى ناتيجەسىمەن ولگا كەلەسى جىلى ريو-دە-جانەيرودا وتەتىن وليمپياداعا جولداما جەڭىپ الدى. بۇل سپورتشىنىڭ 2015 جىلداعى العاشقى جارىسى. سوعان قاراماستان, 14,38 مەتردى باعىندىرىپ, ۇزدىك ۇشتىكتەن كورىندى.
جارىستى كولۋمبيا سپورتشىسى كاتەرين يۆارگۋەن جەڭدى (14,85 م.), ۋكراينا سەنىم ارتقان ولگا سالادۋحا كۇمىس جۇلدەگە قول جەتكىزدى (14,62 م.).
رىپاكوۆا وسىمەن ءۇشىنشى وليمپياداسىنا قاتىسپاق. بۇعان دەيىن 2008 جىلى بەيجىڭدەگى ويىنداردا باق سىناعان ول 4-ورىننان كورىنگەن بولاتىن. ال 2012 جىلى لوندوندا وليمپ شىڭىن باعىندىردى.
ەلامان قوڭىر.
دەرەك: egemen.kz.
سۋرەت: yvision.kz.