رەداكتسياعا حات
مەن ءوزىمنىڭ كۇنى بۇگىنگە دەيىن بۇل تاقىرىپتى قوزعاعان حاتتارىمدى كوپتەگەن قۇزىرلى ورگاندارعا جولداپ, ءومىردىڭ ءوز وزەگىنەن تۋىنداعان ۇسىنىستارىمدى تاپسىرىپ ەدىم. وكىنىشكە قاراي, سولاردىڭ بىردە-بىرىنەن ءوزىمدى جانە مەنەن قولداۋ كۇتىپ وتىرعان مىڭداعان زەينەتكەرلەردى قاناعاتتاندىراتىن تۇشىمدى جاۋاپ الا المادىم. سوندىقتان اقىرعى جۇگىنەر نۇكتەم رەتىندە رەسپۋبليكالىق “ەگەمەن قازاقستان” گازەتىنىڭ رەداكتسياسىنا حات جازۋعا ءماجبۇر بولدىم.
بارشاڭىزعا بەلگىلى, ەلىمىز ەگەمەندىك العان سوناۋ 90-ىنشى جىلداردىڭ باسىندا جاپپاي نارىقتىق قاتىناستارعا كوشتىك تە, جۇرتتىڭ ناپاقا ايىرىپ وتىرعان كولحوزدارى مەن سوۆحوزدارى ءبىر ساتتە جەكەشەلەندىرىلىپ, ولاردىڭ ورىندارىندا ءارتۇرلى كولەم مەن دەڭگەيدەگى شارۋاشىلىق قۇرىلىمدارى پايدا بولدى. ەڭ قيىنى, بۇرىننان كەلە جاتقان ىرگەلى شارۋاشىلىقتاردىڭ بۇلايشا كوپتەگەن ۇساق شارۋا قوجالىقتارىنا ءبولىنىپ كەتۋى ولارداعى جىلدار بويى قالىپتاسقان بۋحگالتەرلىك ەسەپتىك جۇيەنىڭ كىلت توقتاۋىنا اپارىپ سوقتىردى. ءوز كەزەگىندە بۇل ىركىلىستەر تاۋەلسىز ەلىمىزدە قابىلدانعان جاڭا زاڭدارعا سايكەس قولدانىسقا ەنگىزىلە باستاعان جاسى جەتكەن كىسىلەرگە زەينەتاقى بەلگىلەۋ ۇدەرىسىنە ۇلكەن زالال كەلتىرە باستادى. سونىڭ سالدارىنان اۋىلدىق جەرلەردە تۇرىپ, بۇكىل سانالى عۇمىرلارىن اۋىل شارۋاشىلىعىنا ارناعان, تاڭنىڭ اتىسىنان كۇننىڭ باتىسىنا دەيىن بەل جازباي ەڭبەك ەتىپ, بەينەتتى بەلشەدەن كەشكەن ادامداردىڭ زەينەتكە شىعۋلارى قيىنداپ قالدى. بۇل جاعداي, اسىرەسە, 1940 جىلدان كەيىن دۇنيەگە كەلىپ, زەينەت جاسىنا جەتكەندەرگە ايرىقشا قاتتى باتىپ تۇر.
قازىر ارادا وتكەن قانشاما جىلداردىڭ بيىگىنەن قاراساق, ءبىزدىڭ ءبارىمىزدىڭ بۇل تۇرعىدا ويلانىپ, ماسەلەگە قايتا ورالاتىنداي سەبەبىمىز بار ەكەنىنە انىق كوزىمىز جەتەر ەدى. ءوز كەزەگىمدە مەن ءالگىندە ايتقان 1940 جىلدان باستاپ تۋعان كىسىلەردىڭ زەينەتاقىلارىن الدىڭعى تولقىنعا تەڭەستىرۋ ءۇشىن مىناداي شارالاردى جۇزەگە اسىرۋدى ۇسىنار ەدىم.
بىرىنشىدەن, بۇل ساناتتاعى كىسىلەردىڭ مۇراعاتتاردان 1995 جىلعا دەيىنگى سوڭعى 1-3 جىلدىق ايلىق تابىستارى تۋرالى انىقتامالارى الىنىپ, تۇرعىلىقتى جەرلەرىندەگى الەۋمەتتىك مەكەمەلەرگە تاپسىرۋلارى جۇزەگە اسىرىلسا. ەكىنشىدەن, الەۋمەتتىك مەكەمەلەر ولاردىڭ سول اكەلىپ تاپسىرعان انىقتامالارى نەگىزىندە قايتا ەسەپ جاساپ, ورتاشا ايلىق تابىستارىنىڭ ءمولشەرلەرىن انىقتاسا. مىنە, وسى ەكى تارماقتان تۇراتىن ۇسىنىستار ورىندالىپ جاتسا, ءبىزدىڭ باياعىدان بەرى كوتەرىپ جۇرگەن وزەكتى ماسەلەمىزدىڭ ءوتىمى كەلىپ, وركەنى جايىلار ەدى. زەينەتاقى بەلگىلەۋدە, مەنىڭشە, تاعى ءبىر رەت وسىنداي زەيىن كەرەك بولىپ تۇر.
جاقسىمبەك ءابىلوۆ, زەينەتكەرلەر قۇقىعىن قورعاۋ قوعامدىق كوميتەتىنىڭ توراعاسى.
الماتى.