فۋتبولدان رەسەي مەن قاتاردا وتكەن سوڭعى ەكى الەم چەمپيوناتى الەم حالقىن بىرىكتىرەتىن كۇش ەكەنىن ايقىن كورسەتتى. الايدا 2026 جىلعى دوپ دوداسى جاقىنداعان سايىن اقش-تاعى ۆيزالىق شەكتەۋلەر مەن كۇشەيتىلگەن قاۋىپسىزدىك تەكسەرىستەرى حالىقارالىق فۋتبول قاۋىمداستىعىندا الاڭداۋشىلىق تۋعىزىپ وتىر, دەپ حابارلايدى Egemen.kz
سوڭعى ايلاردا بىرقاتار ەلدىڭ فۋتبولشىلارى, تورەشىلەرى مەن دەلەگاتسيا مۇشەلەرى اقش اۋماعىنا كىرۋ كەزىندە ءتۇرلى كەدەرگىلەرگە تاپ بولعانى تۋرالى اقپاراتتار جازىلىپ, كورسەتىلىپ جاتىر. بۇل جاعداي فۋتبول جانكۇيەرلەرى مەن ساراپشىلار اراسىندا سپورتتى ساياسيلاندىرۋ دەگەن پىكىرتالاس تۋدىرىپ وتىر.
ماسەلەن, وزبەكستان قۇراماسى نيدەرلاندقا قارسى ويىن الدىندا پوليتسيانىڭ ارنايى تەكسەرۋىنەن ءوتتى. تەكسەرۋ بارىسىندا قىزمەتتىك يتتەر دە پايدالانىلدى.
يراك قۇراماسىنىڭ كوشباسشىسى ايمان حۋسەين اقش اۋەجايىندا شامامەن جەتى ساعات بويى «كۇدىكتى» رەتىندە جاۋاپ بەرگەن. ال كوماندانىڭ فوتوگرافى ون ساعاتقا سوزىلعان تەكسەرۋدەن كەيىن ەل اۋماعىنان كەتۋگە ءماجبۇر بولعان.
افريكانىڭ ۇزدىك تورەشىلەرىنىڭ ءبىرى سانالاتىن سوماليلىك ومار ارتان ديپلوماتيالىق تولقۇجاتى بولا تۇرا اقش-قا كىرە الماعان.
يران قۇراماسىنىڭ 15 قىزمەتكەرىنە امەريكالىق ۆيزا بەرىلمەگەن. سونىڭ سالدارىنان كوماندا دايىندىق بازاسىن مەكسيكادا ورنالاستىرۋعا ءماجبۇر بولدى. ءتىپتى توپتىق كەزەڭدەگى بارلىق كەزدەسۋلەرىن اقش-تا وتكىزسە دە, ءار ويىننان كەيىن ەل اۋماعىنان شىعىپ, قايتا كىرۋ ءتارتىبىن ساقتاۋعا تۋرا كەلىپ وتىر.
ال سەنەگال قۇراماسى ۇشاقتان تۇسپەي تۇرىپ-اق ۇشۋ-قونۋ جولاعىندا تەكسەرۋدەن وتكەنى حابارلاندى.
ساراپشىلاردىڭ پىكىرىنشە, قاۋىپسىزدىك تالاپتارىن كۇشەيتۋ كەز كەلگەن مەملەكەت ءۇشىن زاڭدى قادام بولعانىمەن, مۇنداي جاعدايلار الەم چەمپيوناتىنىڭ نەگىزگى قۇندىلىقتارىنا كولەڭكە ءتۇسىرۋى مۇمكىن. ويتكەنى فۋتبولدىڭ باستى ميسسياسى – ۇلتتار مەن مادەنيەتتەردى جاقىنداستىرۋ. ال قاتىسۋشىلاردىڭ تولقۇجاتى نەمەسە شىققان ەلىنە بايلانىستى شەكتەۋلەر ءتۋرنيردىڭ اشىقتىعى مەن قولجەتىمدىلىگى تۋرالى سۇراقتار تۋىنداتادى.
ازىرگە 2026 جىلعى الەم چەمپيوناتى باستالعان جوق. سوندىقتان ونىڭ «تاريحتاعى ەڭ ناشار الەم چەمپيوناتى» بولاتىنىن ايتۋ ەرتە. دەگەنمەن تۋرنير قارساڭىندا تۋىنداعان ۆيزالىق جانە شەكارالىق ماسەلەلەر ۇيىمداستىرۋشىلار ءۇشىن ماڭىزدى سىن-قاتەرگە اينالىپ وتىر. ەگەر مۇنداي جاعدايلار جالعاسا بەرسە, جانكۇيەرلەر مەن قاتىسۋشىلاردىڭ كوڭىل-كۇيىنە اسەر ەتۋى ابدەن مۇمكىن.
ايتپاقشى, الەم چەمپيوناتىن تىكەلەي ەفيردەن كورسەتىلەتىن ۋاقىت بەلدەۋى ءبىزدىڭ ەل ءۇشىن قولايلى دەپ ايتۋعا كەلمەيدى. كەزدەسۋلەردىڭ باسىم بولىگى ءتۇن جارىمدا, تاڭعا جاقىن نەمەسە جۇرت جۇمىسقا باراتىن تاڭەرتەڭگى ۋاقىتقا سايكەس كەلىپ تۇر. سوندىقتان, وسى جولعى الەم چەمپيوناتى فۋتبول جانكۇيەرلەرىنىڭ شىدامىن شىڭدايتىن سىناق بولماق.
الەم چەمپيوناتىنىڭ توپتىق كەزەڭىندە دوپ تەبەتىن بارلىق كوماندالاردىڭ كەستەسى مەن ۋاقىتىن وسى جەردەن كورۋگە بولادى.
ايتا كەتەيىك, فۋتبولدان الەم چەمپيوناتى 11 ماۋسىم مەن 19 شىلدە ارالىعىندا اقش, كانادا جانە مەكسيكادا وتەدى.
فۋتبولدان الەم چەمپيوناتىن قايدان كورۋگە بولادى؟