استانا. 15 مامىر. قازاقستان ادام كاپيتالىنىڭ ساپاسى بويىنشا الەمدىك رەيتينگتە دۇنيەجۇزىنىڭ 124 ەلىنىڭ ىشىندە 37-ورىندا كەلەدى. بۇل تۋرالى The Human Capital Report-تىڭ ادام كاپيتالى تۋرالى ەسەبىنە سىلتەمە جاساپ, tengrinews.kz حابارلادى.
الەمدىك رەيتينگ ءارتۇرلى جاستاعى توپتارعا قاتىستى ادام كاپيتالىنىڭ دامۋ مۇمكىندىكتەرىن ولشەيدى. ونىڭ ىشىندە ءبىلىم الۋ قولجەتىمدىلىگى مەن ساپاسى, بىلىكتىلىكتى ارتتىرۋ مۇمكىندىگى; جۇمىسپەن قامتىلۋ, ەكونوميكاعا قىزىعۋشىلىق ءبىلدىرۋ جانە داعدىنى قالىپتاستىرۋ سىندى ماسەلەلەر قاراستىرىلعان.
بۇل رەيتينگتەگى قازاقستاننىڭ كورسەتكىشتەرى ءارتۇرلى. ماسەلەن, ۇزدىك كورسەتكىشتەر 55-64 جاس ارالىعىنداعىلارعا تيەسىلى بولىپ, اتالعان توپ الەم بويىنشا 12-ورىنعا تۇراقتاعان. ال 25-54 جاس ارالىعىنداعى توپ بويىنشا ەلىمىز 43-ورىنعا تابان تىرەگەن. بۇرىنعى كسرو ەلدەرىنىڭ ىشىندە ەستونيا (16-ورىن), ليتۆا (18-ورىن), لاتۆيا (23-ورىن), رەسەي (26-ورىن) جانە ۋكراينا (31-ورىن) قازاقستاننان الدا تۇر.
ادام كاپيتالىنىڭ ساپاسى بويىنشا الەمدىك رەيتينگتە 1-ورىندى فينليانديا الدى. ال 2-ورىندا نورۆەگيا, ودان كەيىن شۆەيتساريا, كانادا مەن جاپونيا تۇر. سونداي-اق, العاشقى وندىققا شۆەتسيا, دانيا, نيدەرلاندى, جاڭا زەلانديا جانە بەلگيا ەندى. بۇل تىزىمدە فرانتسيا 14-ورىندا بولسا, اقش – 17-ءشى, ۇلىبريتانيا – 19-شى, گەرمانيا – 22-ءشى ورىندى مىسە تۇتقان. ءتىزىمنىڭ ەڭ سوڭعى ساتىسىندا يەمەن تۇر.
The Human Capital Report ەسەبىندە: «ادام كاپيتالىنىڭ ساپاسى بويىنشا الەمدىك رەيتينگ ءبىلىم بەرۋ مەن مامان قورىنىڭ دامۋ ءوسىمىن انىقتاۋ قۇرالى بولىپ تابىلادى. الداعى ۋاقىتتا قىزىعۋشىلىق بىلدىرگەن تاراپتار جاعدايدى وڭالتۋ ءۇشىن ناقتى شەشىمدەر قابىلداي الادى», – دەلىنگەن.
ەلامان قوڭىر.
دەرەك: tengrinews.kz.
سۋرەت: hr-portal.ru.