كولۋمبيانىڭ وڭتۇستىك-شىعىسىنداعى گۋاۆيارە دەپارتامەنتىندە قىلمىستىق توپتار اراسىندا بولعان قاقتىعىس سالدارىنان 52 ادام قازا تاپتى, دەپ حابارلايدى Egemen.kz.
قاندى قاقتىعىس دجۋنگلي اۋماعىندا بولعان. مالىمەتكە سايكەس, وڭىردەگى كوكاين ءوندىرىسى مەن كونتراباندا جولدارىن باقىلاۋعا تالاسقان ەكى قىلمىستىق توپ قارۋلى شايقاسقا تۇسكەن.
كولۋمبيانىڭ قورعانىس ءمينيسترى پەدرو سانچەس اتالعان اۋداندا اسكەري ءىس-قيمىلداردىڭ بولعانىن راستادى. ونىڭ ايتۋىنشا, بەيبىت تۇرعىنداردىڭ قاۋىپسىزدىگىن قامتاماسىز ەتۋ ءۇشىن ايماققا قوسىمشا اسكەري كۇشتەر جىبەرىلگەن.
ايتا كەتەيىك, بيىل ءساۋىر ايىندا قاقتىعىسۋشى توپتاردىڭ ءبىرى – كولۋمبيانىڭ رەۆوليۋتسيالىق قارۋلى كۇشتەرى قۇرامىنان شىققان قارۋلى جاساق مۇشەلەرى ەلدىڭ وڭتۇستىك-باتىسىنداعى تاسجولدا تەراكت ۇيىمداستىرعان بولاتىن.
توپ جەتەكشىسى يۆان مورديسكو باسقارعان شابۋىل كەزىندە جارىلىس بولىپ, 14 ادام قازا تاۋىپ, تاعى 38 ادام جارالانعان. زارداپ شەككەندەردىڭ اراسىندا بالالار دا بولعان.
كولۋمبيا بيلىگى وڭىردەگى جاعدايدى باقىلاۋعا الىپ, ازاماتتاردىڭ قاۋىپسىزدىگىن قامتاماسىز ەتۋ ءۇشىن قوسىمشا شارالار قابىلداپ جاتقانىن مالىمدەدى.
ەسكە سالا كەتەيىك, بۇعان دەيىن كولۋمبيادا اسكەري ۇشاق اپاتقا ۇشىراپ, 66 ادام قازا تاپقانىن جازعان بولاتىنبىز.