پاۆلودار. 14 مامىر.پاۆلودار وبلىسىنداعى باياناۋىل ۇلتتىق تابيعات ساياباعىنىڭ ديرەكتورى بولات راحمەتوۆ پەن ءبولىم باسشىسى قاسىمتاي يمانوۆ ۇلتتىق ساياباقتىڭ شوناي اۋىلىنداعى شتاب-پاتەرىندە كەڭەس وتكىزەر الدىندا قاماۋعا الىندى. بۇل تۋرالى pavlodarnews.kz دەرەگىنە سۇيەنگەن egemen.kz ءتىلشىسى حابارلادى.
اتالمىش حاباردى باياناۋىل اۋدانى اكىمىنىڭ ورىنباسارى اباي داۋلەتقاليەۆ راستادى.
«راسىندا وسىدان ەكى كۇن بۇرىن وسىنداي وقيعا ورىن الدى. قولدا ناقتى اقپاراتىمىز جوق. سوندىقتان ەشتەڭە ايتا المايمىن. ديرەكتور بولات راحمەتوۆ پەن ءبولىم باسشىسى قاسىمتاي يمانوۆتى قۇزىرلى مەكەمە قىزمەتكەرلەرى الىپ كەتتى. ال كەشە ءبولىم باسشىسى بوساتىلدى», - دەدى ول.
لاۋازىمدى تۇلعالاردى قاماۋعا الۋ وقيعاسىنىڭ كۋاگەرى, ۇلتتىق پارك اۋماعىنداعى ءبىر دەمالىس ءۇيى ديرەكتورىنىڭ ورىنباسارى اگەنتتىككە بەرگەن سۇحباتىندا سول ساتتە بولات راحمەتوۆ ولاردى تۋريستىك ماۋسىمنىڭ اشىلۋىنا دايىندىققا ارنالعان جيىنعا شاقىرعان.
«ءبىز ۇلتتىق پاركتىڭ شتاب-پاتەرى ورنالاسقان شوناي اۋىلىنا ساعات 14.30-دا كەلدىك. ءبىرشاما كۇتىپ قالدىق, جينالىستىڭ باستالاتىن ءتۇرى جوق. ءبىر كەزدە ەكىباستۇز ءوڭىرى بويىنشا جەمقورلىققا قارسى كۇرەس جانە مەملەكەتتىك ىستەر جونىندەگى اۋدانارالىق باسقارماسى ماماندارى كەلىپ, قۇجاتتارىن كورسەتتى. كەيىن پاركتىڭ ديرەكتورىن قاماۋعا العاندارىن مالىمدەدى. ال دەمالىس ورىندارىنىڭ باسشىلارىن كابينەتتەردىڭ بىرىنە قاماپ, ءۇش ساعات بويى ۇستادى. اشۋ بىلدىردىك. ءبىزدى كەشكە ءبىر-اق جىبەردى», دەدى كۋاگەر.
ەسكە سالا كەتەيىك, بولات راحمەتوۆ مەملەكەتتىك پاركتىڭ ديرەكتورى قىزمەتىن ەكى جىلعا جۋىق ۋاقىت اتقاردى. بۇعان دەيىن 10 جىل بويى باياناۋىل اۋدانى اكىمىنىڭ ورىنباسارى بولىپ جۇمىس ىستەگەن.
فاريدا بىقاي.
دەرەك, سۋرەت: pavlodarnews.kz.