مۇقىم ەل حاكىم ابايدىڭ تويى دەپ جاتقاندا ۇلى اقىننىڭ ەسىمىن يەلەنگەن ارقا توسىندەگى اباي قالاسى مەن اۋدانى قايدان قالىس قالسىن؟!
وسى اپتادا قاراعاندى وبلىسىنداعى اباي اۋدانىنىڭ ورتالىعى اباي قالاسىندا دانىشپان اقىننىڭ 170 جىلدىق مەرەيتويى جوعارى دارەجەدە اتالىپ ءوتتى. تاعىلىمى مول شاراعا قوعام جانە مەملەكەت قايراتكەرى ورالباي ابدىكارىموۆ, اكادەميك عاريفوللا ەسىموۆ, بەلگىلى اقىندار سەرىك تۇرعىنبەك ۇلى, نەسىپبەك ايت ۇلى, سەرىك اقسۇڭقار ۇلى, پروفەسسور تەمىرعالي كوكەتاەۆ قادىرلى قوناق ەسەبىندە قاتىستى.
قالاداعى مادەنيەت ۇيىندە ارنايى كورمە ۇيىمداستىرىلدى. «جيدەباي – ءبورىلى» مۇراجايىنان اكەلىنگەن اباي بابامىزعا قانداي دا ءبىر قاتىسى بار وتىزدان استام جادىگەر ەلدىڭ نازارىنا ۇسىنىلدى. سورەگە قويىلعان 80-گە جۋىق كىتاپ پەن قۇندى قۇجات اقىن شىعارماشىلىعىنان سىر شەرتتى.
«حاكىم اباي تاعىلىمى» اتتى عىلىمي-پراكتيكالىق كونفەرەنتسيادا عالىمدار اقىننىڭ قارا ءسوزى مەن سۇبەلى جىرلارىن تالداپ, تارازىلادى. باسقوسۋعا 250 ادام قاتىسىپ, ۇلى ابايدىڭ ارتىندا قالعان مۇراسى تۋرالى وي ءبولىستى. كونفەرەنتسيادا ءسوز سويلەگەن جەرگىلىكتى اۋدان اكىمى سەرىك شايداروۆ اباي ەسىمىن يەلەنگەن اۋداننىڭ جەتىستىكتەرى جايلى ايتىپ بەردى.
«اقىننىڭ ەسىمىمەن اتالاتىن بىرەگەي اۋداندا اباي قۇنانباەۆتىڭ اتى ەكى مەكتەپكە بەرىلگەن. ولار اباي قالاسىندا جانە توپار كەنتىندە ورنالاسقان. سونداي-اق, قالادا 1980 جىلى ىرگەسى قالانعان اباي قۇنانباەۆ اتىنداعى ادەبي-مەموريالدىق مۇراجاي مەن 1971 جىلى اتاۋىن جاڭعىرتقان «اباي» شاحتاسى بار. ۇلى ابايدىڭ 170 جىلدىق مەرەيتويىن مەرەكەلەۋ قۇرمەتىنە وراي, اۋداننىڭ ءىس-شارالار جوسپارى بەكىتىلدى. جازبا ادەبيەت كوشباسشىسىنىڭ 170 جىلدىعى اياسىندا اۋداندا 7000 ادام قاتىسقان 40-قا جۋىق مادەني شارا وتكىزىلىپ, ابايتانۋ الەمى كەڭىنەن ناسيحاتتالدى. اۋداننىڭ مەملەكەتتىك كىتاپحانالارى كەڭ اۋقىمدى مادەني-اعارتۋ شارالارىن جۇرگىزدى. اۋداندىق «اباي اقيقات» باسىلىمىندا ارنايى ايدار اشىلىپ, وندا حاكىمنىڭ عاقليالارى, ابايتانۋشىلاردىڭ, زەرتتەۋشىلەردىڭ سوزدەرى, ەڭبەكتەرى تۇراقتى تۇردە جاريالانىپ تۇردى. اۋداندىق مادەنيەت ۇيىندە اباي شىعارماشىلىعىنا ارنالعان فەستيۆال ءوتتى. وندا مەكتەپ وقۋشىلارى اباي شىعارمالارىن مانەرلەپ وقۋدان سايىسقا ءتۇستى. ەلباسىمىزدىڭ «ماڭگىلىك ەل» ۇلتتىق يدەياسى نەگىزىندە قازاقتىڭ ۇلى اقىنى, ويشىلى ابايعا ارنالعان وسى كونفەرەنتسيانىڭ ماقساتى جاستار اراسىندا اقىننىڭ شىعارمالارىن ناسيحاتتاۋ, جاستاردى ەلى مەن جەرىن, تاريحى مەن ادەبيەتىن قادىرلەۋگە شاقىرۋ», – دەپ تۇيىندەدى ءسوزىن اۋدان اكىمى سەرىك شايداروۆ.
«اباي ءبىزدىڭ ەلدىگىمىزدىڭ, ۇلتىمىزدىڭ, ۇلتتىق رۋحىمىزدىڭ ەڭ بيىك شىڭى. جەلبىرەپ تۇرعان بايراعى. ابايسىز ءبىز قازاقستاننىڭ كەلەشەگىن ەلەستەتە المايمىز», – دەدى مەملەكەتتىك سىيلىقتىڭ لاۋرەاتى, اقىن نەسىپبەك ايت ۇلى.
زيالى قاۋىم وكىلدەرى قالاداعى اباي قۇنانباەۆ اتىنداعى №5 مەكتەپ-گيمنازيانىڭ وقۋشىلارىمەن كەزدەستى. «ءبىز ابايدىڭ ءىزباسارىمىز» تاقىرىبىندا ءوتكەن شارادا مەكتەپ وقۋشىلارى عالىمدار مەن ابايتانۋشىلارعا, قوعام قايراتكەرلەرىنە كوكەيلەرىندە جۇرگەن ساۋالدارىن قويدى.
اباي اۋدانى اكىمدىگىنىڭ قولداۋىمەن ىشكى ساياسات, مادەنيەت جانە تىلدەردى دامىتۋ مەملەكەتتىك مەكەمەسى «اباي – دانا, اباي – دارا قازاقتا» اتتى اقىندار ءمۇشايراسىن جاريالاعان بولاتىن. ابايدىڭ رۋحاني مۇراسىن دارىپتەۋ ماقساتىندا ۇيىمداستىرىلعان جازبا اقىندار بايقاۋىنا جالپى سانى 27 اقىن قاتىستى.
ءمۇشايرانىڭ باس جۇلدەسىنە قاراعاندى قالاسىنان كەلگەن تالانتتى اقىن قىز ايزادا راحىمجانوۆا لايىق دەپ تانىلدى. ەكىنشى جۇلدەنى بالقاش قالاسىنان كەلگەن اقىن ماقسات كۇزەمحانوۆ قانجىعاسىنا بايلادى. ءۇشىنشى ورىندى اباي اۋدانىنداعى ەسەنگەلدى اۋىلىنىڭ تۇرعىنى, زەينەتكەر ابىلقايىر داۋلەتحان ۇلى جەڭىپ الدى. جۇلدەگەرلەرگە قوماقتى اقشالاي سىياقى تابىس ەتىلدى. سونىمەن قاتار, بىرنەشە اقىنعا ىنتالاندىرۋ سىيلىقتارى تابىستالدى.
حاكىم ابايدىڭ ارقا توسىندەگى تويى بىلەكتى بالۋانداردىڭ بەلدەسۋى مەن كونتسەرتتىك باعدارلاماعا ۇلاستى.
قايرات ءابىلدينوۆ,
«ەگەمەن قازاقستان».
قاراعاندى وبلىسى.