استانا. 28 ماۋسىم. وڭتۇستىك كورەيادا MERS كوروناۆيرۋسىن جۇقتىرعان تاعى ءبىر ادام كوز جۇمدى. وسىلايشا قاۋىپتى ۆيرۋس قۇرباندارىنىڭ سانى 32-گە جەتىپ وتىر. بۇل تۋرالى ريا «نوۆوستي» حابارلادى.
قازىرگى تاڭدا بۇل ەلدە قاۋىپتى ۆيرۋستى جۇقتىرعاندار سانى 182-گە جەتكەن. بۇگىنگە دەيىن دەرتكە شالدىققان 91 ادام اۋرۋحانادان ەمدەلىپ شىققانىمەن, 2 جارىم مىڭعا جۋىق ادام ءالى كارانتيندە ۇستالىپ وتىر. ءالى كۇنگە دەيىن ۆيرۋسقا قارسى ەشقانداي ۆاكتسينا تابىلماعان.
«رەنحاپ» جەرگىلىكتى اقپارات اگەنتىگىنىڭ حابارلاۋىنشا, سوڭعى تاۋلىككە دەيىن ۆيرۋس جۇقتىرعاندار تۋرالى جاڭا مالىمەت تۇسپەگەن.
ءبىر ايتا كەتەرلىگى, دۇنيە ءجۇزىن دۇرلىكتىرگەن قاۋىپتى ىندەتتى جۇقتىرۋعا يممۋندىق جۇيەسى السىزدەر, سوزىلمالى وكپە دەرتىنە شالدىققاندار, ديابەتپەن جانە بۇيرەك اۋرۋىمەن اۋىراتىندار بەيىم كەلەدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە قاراعاندا, 20 ماۋسىمعا دەيىن MERS ۆيرۋسىن جۇقتىرعاندار سانى الەم بويىنشا 1 334-كە جەتكەن. ال اۋرۋدان 471 ادام كوز جۇمعان. سالدارىنان كوروناۆيرۋس قۇرباندارىنىڭ كورسەتكىشى 40 پايىزعا جەتسە, وڭتۇستىك كورەيادا قارالى ءتىزىم 17 پايىزعا جاقىنداعان.
ەلامان قوڭىر.
دەرەك, سۋرەت: ريا «نوۆوستي».