ەلباسى نۇرسۇلتان نازارباەۆ قازاقستان حالقىنا ارناعان جولداۋىندا: «2015 جىل – ۇلتتىق تاريحىمىزدى ۇلىقتاۋ جانە بۇگىنگى بيىكتەرىمىزدى باعالاۋ تۇرعىسىنان مەرەيلى بەلەستەر جىلى. قازاق حاندىعىنىڭ 550 جىلدىعىن, قازاقستان حالقى اسسامبلەياسى مەن كونستيتۋتسيامىزدىڭ 20 جىلدىعىن, ۇلى جەڭىستىڭ 70 جىلدىعىن اتاپ وتەمىز», دەدى.
پرەزيدەنتتىڭ وسى ءسوزى ۇستازدار قاۋىمىنا ۇلكەن جۇك ارتارى ءسوزسىز. ويتكەنى, قازاقستاندىق ءپاتريوتيزمدى, ەلدىك رۋحتى, ۇلتجاندىلىقتى, ەلدىڭ تۇعىرلىعىن,
ۇلتارالىق كەلىسىم مەن سىيلاستىقتى جاس بۋىننىڭ ساناسىنا ءسىڭىرۋ – ءار ۇستازدىڭ مىندەتى, اسىل پارىزى دەر ەدىك. ءارى زور جاۋاپكەرشىلىك جۇكتەيدى. جاس جەتكىنشەكتەردى تاربيەلەپ, وقىتۋدا ولاردىڭ سانا-سەزىمىنە وتاندىق سۇيىسپەنشىلىكتى, ەلدىك رۋحتى, مەكەن ەتكەن ورتاسىن, حالىقتار اراسىنداعى بىرلىك پەن ىنتىماقتى, سىيلاستىق پەن تاعاتتىلىقتى, جاناشىرلىقتى, ۇلتتىق ۇعىمدارىن العاش ۇعىندىراتىن, تۇسىندىرەتىن, اشىق جولعا تۋرا, ناقتى جول سىلتەيتىن, تۇلعا بويىنداعى ىزگىلىك پەن جاقسىلىق قاسيەتتەرىن دارىتاتىن, قالىپتاستىراتىن دا – ۇستاز.
جەكە باسىما ەلباسىنىڭ ۇلىتاۋ تورىندەگى سۇحبات-سىرى, تاۋەلسىزدىك كۇنىندەگى تاۋەلسىزدىك تولعاۋى جان تەبىرەنتەرلىك اسەر تۋعىزدى. بارشامىزدى تاۋەلسىزدىكتىڭ ۇلى رۋحى جەبەپ, بىرىكتىرەدى, بويىمىزعا قۋات بەرىپ, ەرتەڭگى كۇنىمىزگە سەنىمىمىزدى نىعايتادى. تاۋەلسىزدىك – جالپىعا ورتاق قۇندىلىق.
سولتۇستىك قازاقستان وبلىسى پەتروپاۆل قالاسىنداعى ءوزىم ەڭبەك ەتىپ جۇرگەن ءابۋ دوسمۇحامبەتوۆ اتىنداعى وبلىستىق دارىندى بالالارعا مامانداندىرىلعان گيمنازيا-ينتەرناتىنىڭ ۇستا-
نىمى – وسى ماقساتتا وقۋشىلاردىڭ بىلىمگە, عىلىمي ىزدەنىستەرگە قۇشتارلىعى, قاسيەتتى قاراشاڭىراق 80 جىل ىشىندە انا ءتىلىن بالانىڭ بويىنا دارىتۋ, وقۋشىلارىمىزدىڭ بويىنا ەلدىك پەن وتاندىق, ۇلتجاندىلىق قاسيەتتەردى سىڭىرۋدە ۇجىمنىڭ اتقارار ىستەرى جەتىپ ارتىلادى. ءبىلىم ورداسىنىڭ اتى رەسپۋبليكاعا جاقسى تانىمال. ونىڭ ىرگەسىنەن ەلىنە ەلەۋلى, حالقىنا قالاۋلى تالاي ازاماتتار ۇشىپ شىعىپ, عىلىم, ءبىلىم كوگىنەن ءىنجۋ-مارجان تەرىپ ءجۇر. جالىنداعان جاستار ولارعا قاراپ بوي تۇزەيدى. ۇرپاقتار اراسىنداعى ساباقتاستىق ءوز جالعاسىن تاۋىپ كەلەدى. وعان وقۋشىلارىمىزدىڭ ءتۇرلى ءبىلىم بايقاۋلارىندا عىلىمي جوبالاردا, وليمپيادالاردا توپ جارىپ, تەگىن وقۋ گرانتتارىن يەلەنۋىن, شەتەلدەردە تاجىريبە الماسۋلارىن ايتار ەدىك. كوزدەرىندە وت ويناپ, جۇرەگى جالىن اتقان جاستار ەلىنە, وتانىنا مىسقالداي پايدا تيگىزىپ جاتسا, وقۋ-توقۋدىڭ سوڭعى جاڭالىقتارىمەن قارۋلانىپ, الەمدىك بيىكتەرگە ۇمتىلىپ جات-
سا – ەڭبەكتىڭ جانعانى, تاربيەنىڭ وتەلگەنى. ەلباسى ايتقانداي, بولاشاق – جاستاردىڭ قولىندا. ەل تاعدىرىن ولارعا سەنىپ تاپسىرساق, كەلەشەگىمىزدىڭ جارقىن, بولاشاعىمىزدىڭ كەمەل بولارى انىق.
ءار بالانىڭ مىنەز-قۇلقى, قابىلەت-قارىمى اتا-انا مەن ۇستازعا جاقسى ايان. سوعان وراي ءىس-ارەكەت ەتىپ, تاربيە جايىنا ۇلكەن جاۋاپكەرشىلىكپەن قارايتىن بولساق, ماڭگىلىك ەلگە بەت العان ۇلى جولدا بىرلىك پەن ىنتىماعىمىز نىعايىپ, باعىندىرار بەلەستەردەن كورىنە بەرەرىمىز ءسوزسىز.
ماڭگىلىك ەل – ءار قازاقستاندىقتىڭ قاسيەتتى دە كيەلى ۇرانى بولعاي دەيمىن.
اليا باقتىباەۆا,
ءابۋ دوسمۇحامبەتوۆ اتىنداعى وبلىستىق دارىندى بالالارعا مامانداندىرىلعان گيمنازيا-ينتەرناتى ديرەكتورىنىڭ وقۋ ءىسى جونىندەگى ورىنباسارى.
پەتروپاۆل.