استانا. 14 مامىر. قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرى ۇلى وتان سوعىسىنا قاتىسقان قازاقستاندىق ارداگەرلەردى ۇلى جەڭىس مەرەكەسىمەن قۇتتىقتاۋدى جالعاستىرۋدا. بۇل تۋرالى egemen.kz ءتىلشىسى حابارلادى.
قر قك اۋە قورعانىسى كۇشتەرى باس قولباسشىلىعىنىڭ باسقارماسى تاربيە جانە يەدولوگيالىق جۇمىستار باس باسقارماسىنىڭ وفيتسەرلەرى سوعىس ارداگەرى, گۆارديانىڭ جاۋىنگەرى اننا گۋبارەۆانى قۇتتىقتادى. ول ۇشقىش نۇركەن ءابدىروۆ جانە حيۋاز دوسپانوۆامەن بىرگە سوعىسقا قاتىسقان ارداگەر.
اسكەريلەر ارداگەردى سۇراپىل سوعىس جىلدارىنداعى اۋىرتپاشىلىقتارعا قاراماستان ۇلى جەڭىس ءۇشىن جاساعان ەرلىگىنە العىس ءبىلدىردى.
«ءبىز ءاردايىم ارداگەرلەرىمىز تۋرالى ەستەلىكتى ساقتاپ, ولاردىڭ جاساعان داڭقتى ەرلىگى تۋرالى جاس بۋىنعا ايتىپ وتىراتىن بولامىز. ءبىز اتا-بابالارىمىزدىڭ قانىمەن كەلگەن بەيبىتشىلىكتى ساقتاپ, اعا بۋىن مەن مايدانعا قاتىسقان ارداگەرلەردىڭ جاۋىنگەرلىك ءداستۇرىن ودان ءارى ارتتىرۋعا تىرىسامىز», - دەپ اتاپ ءوتتى اۋە قورعانىس كۇشتەرى تاربيە جانە الەۋمەتتىك جۇمىستار باس باسقارماسىنىڭ اعا وفيتسەرى پودپولكوۆنيك ءادىل قوزىباعاروۆ.
اننا يۆانوۆنا اسكەري قىزمەتشىلەرگە سوعىس جىلدارى تۋرالى, ونىڭ ىشىندە ون سەگىز جاسىندا تىل ەڭبەككەرلەرىنىڭ جۇمىسشىلار جاساعىنا ءوز ەركىمەن جازىلعانىن, ورمانداعى اعاشتاردى قۇلاتىپ, وكوپتار قازعانىن جانە تانكتەرگە قارسى توسقاۋىلدار تۇرعىزعانى جايلى اڭگىمەلەپ بەردى. ال 1942 جىلى اسكەري كوميسسارياتقا بارىپ مايدانعا اتتاندى.
سوعىس جىلدارى ول اەرودرومدى قامتاماسىز ەتەتىن 799-شى باتالون قۇرامىندا شايقاستى. شەرمەنت, گامبۋرگ, كەنيسبەرگ, مالبۋرگ, ەلبەرن, ديۋسەلدورف جانە كۋرليانديا قالالارىندا ورنالاسقان باتالون ۋ-2 جانە يل-2 شابۋىلداۋشى ۇشاقتارىن قامتاماسىز ەتۋمەن اينالىستى.
«ءبىز ناعىز قيىن كەزەڭدە اسكەري قىزمەت اتقاردىق. مەنىڭ جادىمدا جان تۇرشىگەرلىك كورىنىستەر ماڭگىلىككە ساقتالىپ قالدى. اەرودرومدى ينجەنەرلىك قىزمەت جاساعىنىڭ قۇرامىندا ءبىز شەرمەنت قالاسىندا ۇشاقتارعا قىزمەت كورسەتتىك. كەنەتتەن پارمەندى بومبالاۋ باستالىپ كەتتى. سول كەزدە كوپتەگەن جاۋىنگەرلەر, جولداستارىمىز جاسىرىنىپ ۇلگەرمەستەن نەمىس بومباسىنىڭ استىندا قالدى», دەپ اڭگىمەلەيدى ارداگەر انا.
اننا يۆانوۆنا قىزمەت وتكەرگەن باتالون اتى اڭىزعا اينالعان ۇشقىشتار لەونيد بەدا, نۇركەن ءابدىروۆ, حيۋاز دوسپانوۆا, الەكسەي مارەسەۆ, الەكساندر پوكرىشكين, يۆان كوجەدۋبا, اناتولي ەفيموۆتەردى ۇشۋلارىن قامتاماسىز ەتىپ, اۆياتەحنيكالارعا قىزمەت كورسەتتى.
«سول كەزەڭدەردە ۇشقىشتاردىڭ دايارلىعى «ۇشۋ-قوندىرۋ» سياقتى قىسقا باعدارلاما بويىنشا ىسكە اسىرىلاتىن. اسكەرلەرگە ۇشقىشتار قاجەت بولعاندىقتان ولار ءوز كەزەگىندە اۋەدە ءىس جۇزىندە جاتتىعۋلاردى ورىنداپ, ودان ءارى شايقاسقا اتتانىپ وتىرعان. ءار جاۋىنگەر ءوز مۇمكىندىگىنەن اسىرا بارلىق كۇشىن سارپ ەتىپ كوپتەن كۇتكەن جەڭىستى بارىنشا جاقىنداتۋعا تىرىستى», دەپ ەسكە الادى اننا يۆانوۆنا.
داستان كەنجالين.
دەرەك, سۋرەت: قازاقستان رەسپۋبليكاسى قورعانىس مينيسترلىگى.