قوستاناي وبلىسىندا تاعى ءبىر قىزدىڭ ءولى دەنەسى تابىلدى

قوستاناي. 14 مامىر. قوستاناي وبلىسىندادا تاعى ءبىر قىزدىڭ دەنەسى وزەن اڭعارىنان ءولى كۇيىندە تابىلدى. بۇل تۋرالى Alau.kz حابارلادى. پوليتسياعا جەتىقارا قالاسىنىڭ تۇرعىنى حابارلاسىپ, 17 جاستاعى نينا ستافەەۆانىڭ 1 مامىردان بەرى ءىز-ءتۇسسىز كەتكەنىن مالىمدەگەن. ونىڭ ايتۋىنشا, قىز دوستارىمەن بىرگە تابيعات اياسىندا دەمالىپ, سوندا تۇنەيتىن بولىپ كەتكەن ەكەن. ەرتەڭىنە باسقالار امان-ەسەن ورالعان دا, ولاردىڭ قاتارىندا نينا بولماعان. بىرگە بولعان قۇربى-قۇرداستارى ونىڭ ءتۇن ورتاسىندا بەلگىسىز ءبىر جاققا كەتىپ قالىپ, قايتا ورالماعانىن ايتقان. وسىنىڭ سوڭىن الا جۇرگىزىلگەن ىزدەستىرۋ جۇمىستارىنىڭ ناتيجەسىندە 12 مامىر كۇنى قىزدىڭ دەنەسى جەلقۋار وزەنىنىڭ بويىنان تابىلعان. تەكسەرە كەلگەندە, ونىڭ دەنەسىندە زورلىق بەلگىلەرى بايقالماعان. سوت-مەديتسينالىق ساراپتاماسىنىڭ قورىتىندىسى نينا ستافەەۆانىڭ سۋعا اعىپ كەتكەنىن العا تارتتى. قازىر وسى دەرەكتەرگە سايكەس «كىسى ءولتىرۋ» بابى بويىنشا سوتقا دەيىنگى تەرگەۋ امالدارى ءجۇرىپ جاتىر. قازا بولعان قىزدىڭ دەنەسىن تولىق زەرتتەۋ ءۇشىن جەدەل تەرگەۋ توبى قۇرىلدى. ايتا كەتۋ كەرەك, بۇدان از عانا ۋاقىت بۇرىن قوستاناي قالاسىندا وسىعان ۇقساس وقيعان بولعان ەدى. اتاپ ايتقاندا, 4 مامىردا 17 جاسار ستۋدەنت قىز نۇرگۇل اعىباەۆانىڭ ءولى دەنەسى تابىلدى. پوليتسەيلەر ونى توبىل وزەنىنىڭ ارناسىنان تاپتى. وبلىستىق ىشكى ىستەر دەپارتامەنتىنىڭ ءباسپاسوز قىزمەتى قىزدىڭ سۋعا تۇنشىعىپ ولگەنىن مالىمدەدى. تەكسەرە كەلگەندە, ونىڭ دەنەسىنەن زورلىقتىڭ بەلگىلەرى تابىلماعان. سوندىقتان سۋيتسيد بولۋى مۇمكىن دەگەن ۇيعارىم جاسالدى. ءنازيرا جارىمبەتوۆا. دەرەك, سۋرەت: Alau.kz.