اقتاۋ. 14 مامىر. كەشە ماڭعىستاۋ وبلىسىنداعا ساي-وتەس اۋىلىندا الدىمەن زورلانىپ, ارتىنان ولتىرىلگەن 8 جاسار قىزدىڭ دەنەسى تابىلدى. بۇل تۋرالى Tumba.kz حابارلادى.
قايعىلى وقيعا وبلىس ورتالىعىنان 285 شاقىرىم جەردەگى ساي-وتەس اۋىلىندا ورىن العان.
قىزدىڭ تۋىستارىنىڭ ايتۋىنشا, بۇرناعى كۇنى اۋلادا ويناپ جۇرگەن قىز كەشكە ۇيىنە ورالماعان. سودان كەيىن بۇكىل وتباسى دالاعا شىعىپ, قىزدى ىزدەۋگە كىرىسەدى. ولار كوپ ىزدەپ ءجۇرىپ, ءبىر كەزدە ءبىر سارايدىڭ جانىندا ءولىپ جاتقان قىز بالانىڭ ۇستىنەن تۇسەدى.
«دەنەسى توپىراقپەن كومىلىپتى. ءبىزدىڭ كورگەنىمىز بويىنشا, ونى زورلاعان, كەيىن اۋزىنا توپىراق سالعان, ول سودان تۇنشىعىپ ولگەن», - دەدى قىزدىڭ تۋىسى فاتيما ەلۋباەۆا.
پوليتسەيلەر قىزدىڭ ولگەنىن راستاپ بەردى. قىز بالانىڭ جوعالىپ كەتكەنى تۋرالى حابار جەتكەن بويدا ىزدەستىرۋ جۇمىستارىن جۇرگىزۋ ءۇشىن شۇعىل قىزمەت جاساعى جىبەرىلگەن.
قۇقىق قورعاۋ ورگاندارى قىزمەتكەرلەرى 8 جاسار قىزدىڭ ولىمىنە كۇدىكتىنى سول ءتۇنى قولعا تۇسىرەدى. ول وسى اۋىلدىڭ 1988 جىلى تۋعان تۇرعىنى بولىپ شىقتى.
«قىزدىڭ دەنەسى تاپ سونىڭ سارايىنىڭ جانىنان تابىلدى. قازىر تەرگەۋ امالدارى ءجۇرىپ جاتىر. زورلاۋ دەرەگى تەكسەرىلۋدە. الدىن الا مالىمەت بويىنشا, قىز بالا كۇدىكتىنىڭ ونىڭ تىنىس جولدارىنا توپىراق سالۋىنىڭ سالدارىنان كوز جۇمعان. ءولىمىنىڭ ناقتى سەبەبىن ءبىزدىڭ كريميناليستەر تاعايىنداعان ساراپتاما كورسەتەدى», - دەدى وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى ءاليا شەرماعامبەتوۆا.
قىزدىڭ تۋىستارىنىڭ ايتۋىنشا, كۇدىكتى ءتورت رەت ۇيلەنگەن. قازىر ول سوڭعى ايەلىمەن بىرگە ءۇش بالا تاربيەلەپ وتىر ەكەن.
گۇلايىم شىنتەمىرقىزى.
دەرەك, سۋرەت: Tumba.kz.