جوبا شىمكەنت قالاسى مەن قاراعاندى, قوستاناي وبلىستارىندا جۇزەگە اسىرىلدى. باستامانىڭ نەگىزگى ماقساتى – قوعامدا تۇراقتى وقۋ مادەنيەتىن قالىپتاستىرۋ جانە قازاقستاندى الەمدەگى ەڭ كوپ كىتاپ وقيتىن ون ەلدىڭ قاتارىنا قوسۋ. وسى باعىتتا جاڭا فورمات – كىتاپ وقۋ مارافونى ەنگىزىلدى.
جيىندا ءسوز سويلەگەن ەرلان قوشانوۆ بۇل باستاما مەملەكەت باسشىسىنىڭ كىتاپ وقۋ مادەنيەتىن ىلگەرىلەتۋ جونىندەگى تاپسىرماسى اياسىندا قولعا الىنعانىن اتاپ ءوتتى. ونىڭ ايتۋىنشا, كىتاپ وقيتىن ۇلت قالىپتاستىرۋ – ەلدىڭ زياتكەرلىك الەۋەتىن ارتتىرۋدىڭ باستى تەتىگى.
«قازىر 23 ءساۋىردى – ۇلتتىق كىتاپ كۇنىن ەل بولىپ اتاپ ءوتۋدى يگى داستۇرگە اينالدىردىق. سونىمەن قاتار, بۇگىن پرەزيدەنت حالقىمىزدى ۇلتتىق كىتاپ كۇنىمەن قۇتتىقتاپ, الداعى ەكى اپتادا وقۋعا قۇشتار, زياتكەر ۇلت قالىپتاستىرۋ شارالارى تۋرالى جارلىققا قول قوياتىنىن ايتتى. كىتاپ وقيتىن ۇلتقا اينالۋ – مەملەكەتتىڭ مادەني-رۋحاني وركەندەۋىنىڭ توتە جولى. كىتاپ وقيتىن ۇرپاق تاربيەلەۋ – ەلدىڭ ينتەللەكتۋالدىق كاپيتالىنا سالىنعان ەڭ ءتيىمدى ينۆەستيتسيا. «كىتاپ وقيتىن ۇلت» پيلوتتىق جوباسى وسى ماقساتتى كوزدەيدى. جوبانىڭ باستى ميسسياسى – ەلىمىزدى الەمدەگى ەڭ كوپ وقيتىن ون ەلدىڭ قاتارىنا قوسۋ», دەدى پارتيا توراعاسى.
سونداي-اق ەرلان قوشانوۆ «AMANAT» پارتياسىنىڭ ادەبيەت پەن رۋحانيات سالاسىن قولداۋ باعىتىنداعى جۇيەلى جۇمىسى مەن باستامالارىنا توقتالدى. اتاپ ايتقاندا, پارتيانىڭ سايلاۋالدى باعدارلاماسى اياسىندا 2023-2025 جىلدارى 150 مادەني نىسان سالىندى جانە 755 نىسان كۇردەلى جوندەۋدەن ءوتتى. سونىمەن قاتار پارتيا كىتاپحاناشىلاردىڭ جالاقىسىن كوتەرۋ جونىندەگى سايلاۋالدى ۋادەسىن ورىندادى. بۇدان بولەك, ماجىلىستەگى پارتيا فراكتسياسى دەپۋتاتتارىنىڭ باستاماسىمەن جاڭا سالىق كودەكسىندە وتاندىق باسپالار قوسىلعان قۇن سالىعىنان بوساتىلدى. بۇل قادام وقىرماندار ءۇشىن كىتاپتىڭ قولجەتىمدىلىگىن ارتتىرۋعا مۇمكىندىك بەرەدى. پارتيا جىل سايىن جاس اۆتورلار اراسىندا « ۇلى دالا» شىعارماشىلىق بايقاۋىن وتكىزىپ, ۇزدىك جۋرناليستەردى «AMANAT مەديا سىيلىعىمەن» ماراپاتتايدى. بۇعان قوسا, «كىتاپ-AMANAT» جوباسى بەلسەندى جۇزەگە اسىرىلىپ كەلەدى. ونىڭ اياسىندا ەل اۋماعىنداعى پارتيا فيليالدارى جانىندا 24 كىتاپ ورتالىعى جۇمىس ىستەپ تۇر. وسىنداي ءىس-شارالار ارقىلى ازاماتتار اراسىندا وقۋ مادەنيەتى قالىپتاسىپ, كىتاپقا دەگەن قۇرمەت ارتىپ كەلەدى.
سوڭعى جىلدارى ەلىمىزدە كىتاپحانا ءىسى دە جاندانىپ كەلەدى. اتاپ ايتقاندا, كىتاپحانالار جاڭارتىلىپ, جاڭا نىساندار اشىلىپ جاتىر. سونىڭ ناتيجەسىندە وتكەن جىلى كىتاپحاناعا كەلۋشىلەر سانى 57 ملن-عا جەتىپ, 2024 جىلمەن سالىستىرعاندا 4,1% ارتقان. سونىمەن قاتار, ونلاين كىتاپ ساتىلىمى 50% وسكەن. نازار اۋدارارلىعى – وقىرمانداردىڭ ءاربىر ءۇشىنشىسى بالا.
«ۇلتتىق كىتاپ» رەسپۋبليكالىق بايقاۋىنىڭ جەڭىمپازدارى ماراپاتتالدى
مادەنيەت سالاسىن قولداۋ باعىتىندا ناقتى شارالار قولعا الىنعان. سونىڭ ىشىندە جازۋشىلارعا ارنالعان «قازاقستاننىڭ حالىق جازۋشىسى» اتاعى قايتا بەرىلىپ, اۆتورلىق قالاماقى ماسەلەسى شەشىمىن تاپتى. سونداي-اق وتاندىق باسپالار قوسىلعان قۇن سالىعىنان بوساتىلىپ, كىتاپتىڭ قولجەتىمدىلىگى ارتتى.
جوبا 6 باعىت بويىنشا ۇيىمداستىرىلدى – «كىتاپ وقيتىن اۋلەت», «كىتاپ وقيتىن مەملەكەتتىك قىزمەتشى», «كىتاپ وقيتىن ۋنيۆەرسيتەت», «كىتاپ وقيتىن كوللەدج», «كىتاپ وقيتىن مەكتەپ» جانە «كىتاپ وقيتىن پەداگوگ». قاتىسۋشىلار ءۇشىن قازاق جانە ورىس تىلدەرىندە 15 كىتاپتان تۇراتىن ارنايى ءتىزىم بەكىتىلىپ, سول شىعارمالار نەگىزىندە ءتۇرلى زياتكەرلىك سايىستار ءوتتى.
بايقاۋ بىرنەشە كەزەڭنەن تۇردى – الدىمەن ۇيىمدار مەن وقۋ ورىندارى دەڭگەيىندە باستالىپ, كەيىن اۋداندىق, قالالىق جانە وبلىستىق كەزەڭدەردە جالعاستى. ناتيجەسىندە 462 ادام جەڭىمپاز اتانىپ, ونىڭ 156-سى ءبىرىنشى ورىن يەگەرى بولدى.
جوبا اياسىندا وڭىرلەردە كىتاپ وقۋ ورتالىقتارى جۇمىس ىستەپ, تۇرعىندار اراسىندا كىتاپقا دەگەن قىزىعۋشىلىق ارتقانى بايقالدى. بۇل باستاما تەك ءبىر رەتتىك ناۋقان ەمەس, ۇلتتىڭ رۋحاني دامۋىنا باعىتتالعان جۇيەلى جۇمىس رەتىندە جالعاسىن تابادى.
