قوستاناي. 16 تامىز. قوستانايلىقتار مەن قالا قوناقتارى قالانىڭ 136 جىلدىعىن ەكى كۇن بويى تويلادى. وندا حەند-مەيد – شەبەر قولدار جاساعان زاتتار كورمەسىنەن باستاپ, اربا شەرۋى, كارناۆال شەرۋى, نان كورمەسى, اۋە شارىنان جاسالعان بۇيىمدار جانە كىلەمدەر كورمەسى وتكىزىلدى. بۇل تۋرالى egemen.kz ءتىلشىسى حابارلادى.
ورتالىق الاڭدا قوستانايلىقتار شەبەرقولداردان شىققان بۇيىمداردى – حەند-مەيد كورمەسىن تاماشالادى. وعان قوستانايداعى 20-دان اسا شەبەرلەردىڭ بۇيىمدارى قويىلدى. ءتۇرلى قۋىرشاقتار, قولدان جاسالعان گۇلدەر, كۇندەلىكتى تۇتىناتىن بۇيىمدار كوزدىڭ جاۋىن الادى. اسىرەسە, قالاداعى مۇگەدەكتەر قوعامىنىڭ مۇشەلەرى جاساعان بۇيىمداردى قىزىقتاۋشىلار كوپ بولدى. ولارعا شەبەرلەر شەبەرلىگىن ۇيرەتۋدەن دە باس تارتقان جوق.
سونداي-اق, ورتالىق الاڭدى كادىمگى اۋە شارىنان جاسالعان كيىز ءۇي ماكەتتەرى, مۇسىندەر, گۇلدەر كەرەمەت سۇلۋلىققا اينالدىرىپ جىبەرگەندەي بولدى. قوستانايلىق اەروديزانەر, تۆيستينگ شەبەرى ناتاليا برۋما شاردان سەبەتكە سالىنعان شوق گۇلدەر كەيپىن جاساپ شىقتى. ونىڭ جۇمىسىنا مىڭنان اسا شار مەن 30 ساعات ۋاقىتى كەتتى. ول قالانىڭ كوركى ءۇشىن بۇل جۇمىسىنا ريزا.
اربالار شەرۋى قالا مەرەكەسىنىڭ قىزىعىن قىزدىرا ءتۇستى. №8 بالاباقشاسىنىڭ مەڭگەرۋشىسى ايگۇل تۇسوۆا: «ءبىز «قار حانشايىمى» ارباسىن جاسادىق. ونىڭ ادەمىلىگى بالانىڭ دا, ۇلكەننىڭ دە نازارىن اۋدارىپ كەتەدى. ەندى اربا بالاباقشاسىندا تۇرادى, ونىڭ قىستا اياز اتا كەلەتىن بولادى» – دەدى.
قوستاناي قالاسىنداعى ەتنومادەني ورتالىقتار كىلەمدەر كورمەسىن كورسەتتى. وسى ارقىلى مەرەكەگە جينالعاندار ءتۇرلى ۇلىستار مادەنيەتى مەن ونەرىنە قانىقتى. وسى كورمەلەردىڭ بارلىعى وبلىس اكىمى نۇرالى سادۋاقاسوۆ پەن قالا باسشىلارىارالاپ كوردى. قالالىقتاردى مەرەكەسىمەن قۇتتىقتادى.
مەرەكە كەشكە قاراي جالعاسا ءتۇستى. قوستاناي قالاسىنداعى ۇجىمدار كارناۆال شەرۋىنە شىقتى. ول قالانىڭ بىرنەشە كوشەسىمەن ءجۇرىپ ءوتىپ, ورتالىق ستاديونعا باردى. سول جەردە وتكەن رەسەيدىڭ بەلگىلى ەسترادا ءانشىسى ولەگ گازمانوۆتىڭ كونتسەرتى دە قالالىقتارعا سىي بولدى. تۇندە مەرەكەلىك وت شاشۋمەن اياقتالدى.
ءنازيرا جارىمبەتوۆا.
دەرەك: egemen.kz.
سۋرەت: ng.kz.