قازىرگى تاڭدا ءبىزدىڭ ەلىمىزدە ءبىلىم مەن عىلىمنىڭ دامۋىنا ەرەكشە ءمان بەرىلىپ وتىر. عىلىمنىڭ ستراتەگيالىق ماڭىزعا يە ەكەندىگى, ونىڭ ستراتەگيالىق باسىمدىق ەكەندىگى جاڭا كونستيتۋتسيادا ايقىندالدى. سول سەبەپتى عىلىمعا, بىلىمگە نازار اۋدارىلىپ جاتىر. بۇل عىلىمدى قارجىلاندىرۋ كولەمىنىڭ ارتۋىنان, عىلىمنىڭ ماتەريالدىق-تەحنيكالىق بازاسىن جاقسارتۋدان, جاس عالىمداردىڭ الەۋمەتتىك جاعدايىن كۇشەيتۋدەن انىق كورىنىپ كەلەدى.
كەز كەلگەن وركەنيەتكە ۇمتىلعان, دامۋدى كوزدەيتىن مەملەكەتتە, ارينە, ءبىرىنشى كەزەكتە ادام كاپيتالىنىڭ دامۋىنا, ونىڭ ىشىندە عىلىمنىڭ ورىستەۋىنە ەرەكشە ءمان بەرىلەدى. عىلىمى دامىعان ەل, اسىرەسە قولدانبالى عىلىمى دامىعان ەل, دامۋدىڭ الدىڭعى قاتارىنا شىعىپ, باسەكەگە قابىلەتتىلىكتىڭ دە جوعارى دەڭگەيىنە كوتەرىلەدى. سوندىقتان دا عىلىمنىڭ ستراتەگيالىق ماڭىزعا يە ەكەندىگى وسى جەردەن كورىنەدى.
عىلىم كۇنى قارساڭىندا پرەزيدەنتىمىزدىڭ ءوزى قاتىسقان سالتاناتتى جيىن ءوتتى. مەملەكەت باسشىسى بىرقاتار ازاماتتارعا مەملەكەتتىك ناگرادالار تاپسىردى, بىرنەشە جاس عالىمعا پاتەر كىلتىن تابىس ەتتى. سول مامانداردىڭ قاتارىندا مەن دە «ەرەن ەڭبەگى ءۇشىن» مەدالىنە يە بولدىم.
قازىرگى ۋاقىتتا مەملەكەتتىك باسقارۋ اكادەمياسىندا «وڭىرلىك ەكونوميكا» ءبىلىم بەرۋ باعدارلاماسى بويىنشا ءدارىس وقيمىن. وڭىرلىك دامۋ ماگيسترلەرىنىڭ بىرنەشە بۋىنىن دايارلاپ شىعاردىق.
بۇل اكادەميانىڭ ءبىلىم بەرۋ تراەكتورياسىنىڭ ەرەكشەلىگى – پروفەسسور-وقىتۋشىلار قۇرامىنىڭ جەتپىس پايىزعا جۋىعى تاجىريبەدەن كەلگەن, ءىس باسىندا جۇرگەن, مەملەكەتتىك ساياساتتى جۇزەگە اسىرىپ جۇرگەن ازاماتتار. سوندىقتان دا بۇل ەڭ الدىمەن, جاستارعا, ونىڭ ىشىندە پرەزيدەنتتىك جاستار كادرلىق رەزەرۆىنىڭ مۇشەلەرى سانالاتىن جاس عالىمدارعا, سونداي-اق مەن سياقتى پراكتيك زەرتتەۋشىلەرگە بەرىلگەن جوعارى باعا, ۇلكەن سەنىم ءارى زور جاۋاپكەرشىلىك دەپ ەسەپتەيمىن.
ايبول ارىنعازينوۆ,
پرەزيدەنت جانىنداعى مەملەكەتتىك باسقارۋ اكادەمياسىنىڭ قاۋىمداستىرىلعان پروفەسسورى