جۇيەلى مەملەكەتتىك قولداۋدىڭ ناقتى كورىنىسى

وتاندىق عىلىم بۇگىندە جاڭا ساپالى كەزەڭگە ءوتىپ جاتىر. جاساندى ينتەللەكت, تسيفرلىق تەحنولوگيالار, جاڭا ماتەريالدار, ەنەرگەتيكا, بيومەديتسينا سياقتى باعىتتاردا قازاقستاندىق عالىمداردىڭ الەۋەتى جوعارى. ەڭ باستىسى بىزدە تەرەڭ ءبىلىمدى, حالىقارالىق دەڭگەيدە باسەكەگە قابىلەتتى جاس زەرتتەۋشىلەر بۋىنى قالىپتاسىپ كەلەدى. بۇل – ەلىمىزدىڭ عىلىمي بولاشاعىنا دەگەن ۇلكەن سەنىم.

مەملەكەتتىك قولداۋ عىلىمعا كەلگەن جاستاردىڭ سانىن عانا ەمەس, ساپاسىن دا ارتتىرادى. عالىم ءۇشىن ونىڭ ەڭبەگىنىڭ باعالانۋى, يدەياسىنىڭ قولداۋ تابۋى جانە قوعامعا پايدا اكەلۋى – ۇلكەن موتيۆاتسيا. سوندىقتان بۇگىنگى ماراپاتتى مەن وتاندىق عىلىمعا كورسەتىلگەن سەنىمنىڭ بەلگىسى, ال عىلىم ادامدارىنا بەرىلگەن قۇرمەتتى ەل دامۋىنا قوسىلعان ۇلەستىڭ مويىندالۋى دەپ قابىلدايمىن.

عىلىمعا سالىنعان ينۆەستيتسيا – بولاشاققا ينۆەستيتسيا. سوندىقتان عىلىمدى قولداۋ ساياساتى جالعاسىن تاۋىپ, زەرتتەۋ ناتيجەلەرى ەلدىڭ تۇراقتى دامۋى مەن حالىقارالىق بەدەلىن ارتتىرۋعا قىزمەت ەتە بەرەدى دەپ سەنەمىن. ال مەن ءۇشىن وسىنداي ماراپات يەلەرىنىڭ اراسىندا بولۋ – ۇلكەن قۇرمەت قانا ەمەس, سونىمەن بىرگە زور جاۋاپكەرشىلىك. مەن ونى ەلىمىزدىڭ عىلىمىن دامىتۋعا, جاس زەرتتەۋشىلەردىڭ جاڭا بۋىنىن تاربيەلەۋگە, قوعام مەن ەكونوميكانىڭ ناقتى سۇرانىستارىنا جاۋاپ بەرەتىن عىلىمي شەشىمدەر ۇسىنۋعا دەگەن سەنىمنىڭ بەلگىسى رەتىندە قابىلدايمىن.

بۇگىنگى كاسىبي مەرەكە اياسىندا كورسەتىلىپ جاتقان قۇرمەت پەن ماراپات – تەك جەكە جەتىستىككە بەرىلگەن باعا ەمەس, بۇل ەلىمىزدەگى عىلىم سالاسىنا كورسەتىلىپ وتىرعان جۇيەلى مەملەكەتتىك قولداۋدىڭ ناقتى كورىنىسى دەپ بىلەمىن. عىلىمدى دامىتۋ – مەملەكەتتىڭ ۇزاقمەرزىمدى باسەكەگە قابىلەتتىلىگىن, تەحنولوگيالىق تاۋەلسىزدىگىن جانە ادام كاپيتالىنىڭ ساپاسىن ايقىندايتىن ماڭىزدى باعىت.

ءاسيا ەرمۇحامبەتوۆا,

ۇلتتىق عىلىم اكادەمياسى جانىنداعى جاس عالىمدار پرەزيديۋمىنىڭ مۇشەسى