قارجىلىق مونيتورينگ اگەنتتىگى باس پروكۋراتۋراسى ۇيلەستىرۋى جانە «TELE2» ۇيالى بايلانىس وپەراتورىمەن بىرلەسىپ, ازاماتتاردىڭ قۇپيا دەرەكتەرى مەن اقشالاي قاراجاتىن ۇرلاۋ ماقساتىندا فيشينگتىك حابارلامالاردى جاپپاي تاراتقان قىلمىستىق توپتىڭ قىزمەتىن توقتاتتى, دەپ جازادى Egemen.kz.
قاسكويلەر ۇيالى بايلانىس وپەراتورلارى بازالىق ستانتسيالارىنىڭ جۇمىسىندا قولدانىلاتىن SMS-بلاستەردى پايدالانعان. بۇل قۇرىلعى پايدالانۋشىلارعا جاقىن ماڭدا, ياعني 300 مەتر راديۋستا كۇشتى سيگنال تاراتىپ, تەلەفونداردىڭ اۆتوماتتى تۇردە سوعان قوسىلىپ, قورعانىسى ءالسىز جەلىگە اۋىسۋىنا سەبەپ بولعان.
ناتيجەسىندە ابونەنتتەردىڭ تەلەفوندارىنا بىردەن جالعان SMS-حابارلامالار كەلگەن. بۇل قۇرىلعى بايلانىس وپەراتورلارىنىڭ قورعانىسىن اينالىپ ءوتىپ, ساعاتىنا 100 مىڭعا دەيىن حابارلاما تاراتۋعا مۇمكىندىك بەرگەن. اۋقىمدى كەڭەيتۋ جانە جاسىرىن ارەكەت ەتۋ ماقساتىندا جابدىق اۆتوكولىكتەرگە ورناتىلىپ, قوزعالىس بارىسىندا, نەگىزىنەن ادامدار كوپ شوعىرلاناتىن ورىنداردا – بازارلاردا جانە ساۋدا-ويىن-ساۋىق ورتالىقتارىنىڭ ماڭىندا پايدالانىلعان.
بيبىگۇل جەكسەنباي: الاياقتىقتان زارداپ شەككەندەردى قورعاۋ جۇيەسىندە ولقىلىقتار كوپ
حابارلامالار «Beeline» جانە «Halyk Bank» كومپانيالارى اتىنان جىبەرىلگەندەي كورىنىپ, جينالعان بونۋستاردى ايىرباستاۋ ۇسىنىلعان. سىلتەمەگە وتكەن جاعدايدا پايدالانۋشىلار فيشينگتىك سايتتارعا ءتۇسىپ, تاۋار تاڭداعاننان كەيىن جەكە دەرەكتەرىن, سونىڭ ىشىندە تەلەفون ءنومىرىن, اتى-ءجونىن, بانك كارتاسىنىڭ دەرەكتەمەلەرىن, CVV-كودىن, سونداي-اق SMS ارقىلى كەلگەن راستاۋ كودىن ەنگىزۋگە ءماجبۇر بولعان.وسىلايشا, قاسكويلەر ازاماتتاردىڭ قۇپيا اقپاراتى مەن بانكتىك قاراجاتىنا قول جەتكىزگەن.
الاياقتىقتىڭ جاڭا ءتاسىلى تارادى: قاسكۇنەمدەر داۋىسىن وزگەرتىپ, سەنىمگە كىرەدى
جەدەل-ىزدەستىرۋ ءىس-شارالارىنىڭ ناتيجەسىندە قىلمىستىق توپ سحەمانى جۇزەگە اسىرۋدىڭ باستاپقى كەزەڭىندە انىقتالىپ, ۇستالدى. بۇل ازاماتتاردىڭ اۋقىمدى الدانۋى مەن ەلەۋلى قارجىلىق شىعىندارىنىڭ الدىن الۋعا مۇمكىندىك بەردى.
قازىر ءتورت كۇدىكتى ۇستالىپ, قاماۋعا الىنىپ, تەرگەۋ جالعاسىپ جاتىر. ايتا كەتەيىك, تمد ەلدەرى اۋماعىندا وسىنداي سحەمانىڭ جولى العاش رەت كەسىلگەن.