ەلەكتر ەنەرگياسى نارىعىندا ەلەكتروندى شوت-فاكتۋرا جازىپ بەرۋ مەرزىمى سالالىق ەرەكشەلىكتەرگە بايلانىستى قايتا قارالىپ, كەيىنگە شەگەرىلدى, دەپ حابارلايدى Egemen.kz.
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن سالىق كودەكسىن ەنگىزۋ جونىندەگى جوبالىق كەڭسەنىڭ 11-وتىرىسىندا بۇعان دەيىن قوسىمشا تالداۋدى قاجەت ەتكەن بىرقاتار ماسەلەلەر قارالدى.
سولاردىڭ ءبىرى – «ەلەكتر قۋاتى نارىعىنىڭ قازاقستاندىق وپەراتورى» اق مەن «جاڭارتىلاتىن ەنەرگيا كوزدەرىن قولداۋ جونىندەگى قارجى-ەسەپ ايىرىسۋ ورتالىعى» جشس ءۇشىن ەلەكتروندى شوت-فاكتۋرالاردى راسىمدەۋ مەرزىمىن قايتا قاراۋ بولدى. بۇل ماسەلە بۇعان دەيىن 9-وتىرىستا تالقىلانىپ, قوسىمشا ساراپتاما جۇرگىزۋ قاجەتتىلىگى تۋىنداعان ەدى.
Digital Qazaqstan: ەنەرگەتيكا ينفراقۇرىلىمى ونلاين جۇيەگە بىرىكتىرىلدى
مەرزىمدى وزگەرتۋ ەلەكتر ەنەرگياسىنىڭ تەڭگەرىمدەۋشى نارىعىنىڭ جۇمىس ەرەكشەلىگىمەن بايلانىستى. ناقتى تۇتىنۋ دەرەكتەرى ەسەپتىك ايدان كەيىنگى ايدىڭ 20-سىنان كەيىن عانا قالىپتاسىپ, قولجەتىمدى بولادى. سونىڭ سالدارىنان نارىق قاتىسۋشىلارى باستاپقىدا الدىن الا مالىمەتتەرمەن قۇجات تاپسىرىپ, كەيىن ناقتى دەرەكتەرگە سايكەس تۇزەتۋلەر ەنگىزۋگە ءماجبۇر.
2026 جىلدان باستاپ تۇزەتىلگەن ەلەكتروندى شوت-فاكتۋرالاردى مىندەتتى تۇردە راستاۋ تالاپ ەتىلەتىنىن ەسكەرسەك, قولدانىستاعى مەرزىمدەر قۇجاتتاردى دۇرىس راسىمدەۋدە تاۋەكەلدەر تۋىنداتۋى مۇمكىن.
وسىعان بايلانىستى سالانىڭ ەرەكشەلىكتەرىن ەسكەرە وتىرىپ, ەشف جازىپ بەرۋ مەرزىمىن اۋىستىرۋ ۇسىنىسى قاراستىرىلدى. تالقىلاۋ ناتيجەسىندە بۇل ۇسىنىس قولداۋ تاۋىپ, جاڭا مەرزىم ەسەپتىك ايدان كەيىنگى ايدىڭ 27-سىنە دەيىن بولىپ بەلگىلەندى. ءتيىستى وزگەرىستەر سالىق كودەكسىنە رەتروسپەكتيۆتى تۇردە ەنگىزىلىپ, 2026 جىلعى 1 قاڭتاردان باستاپ كۇشىنە ەنەدى دەپ جوسپارلانىپ وتىر.
ەنەرگەتيكا مەن قاۋىپسىزدىك ماسەلەسى زەردەلەندى
سونىمەن قاتار وتىرىستا تاۋ-كەن-مەتاللۋرگيا سالاسىنداعى سالىقتىق رەتتەۋ ماسەلەلەرى دە تالقىلاندى. اتاپ ايتقاندا, كوكستەلەتىن كومىرگە پايدالى قازبالاردى وندىرۋگە سالىناتىن سالىقتى قولدانۋ قارالدى. ماسەلەنىڭ كۇردەلىلىگىنە بايلانىستى بۇل باعىتتاعى جۇمىس قوسىمشا ءبىر ايعا ۇزارتىلىپ, جان-جاقتى زەردەلەۋ جالعاساتىن بولدى.