«پروگرەسس م-26م» جۇك كەمەسى سۋعا باتىرىلادى
حالىقارالىق عارىش ستانساسىنىڭ قۇرامىندا جۇمىس ىستەگەن «پروگرەسس م-26م» كەمەسى ستانسادان اجىراتىلىپ, وربيتادان شىعارىلعان سوڭ, تىنىق مۇحيتىنىڭ كەمە جۇرمەيتىن اۋداندارىندا سۋعا باتىرىلادى.
رەسەي ۇشۋلاردى باسقارۋ ورتالىعى وكىلىنىڭ حابارلاۋىنشا, ۇشۋ كەزىندە قىزمەتىن وتەگەن جابدىقتار مەن ەكيپاجدىڭ ءومىر تىرشىلىگىنىڭ قالدىقتارى تيەلگەن كەمە حالىقارالىق عارىش ستانساسىنان جەرگىلىكتى ۋاقىت بويىنشا ساعات 13.18-دە اجىراتىلادى. ال ساعات 16.28-دە قوزعالتقىشتارى تەجەلىپ, ودان كەيىن «پروگرەسس» جەر اتموسفەراسىنىڭ تىعىز قاباتتارىنا كىرەدى. عارىش كەمەسىنىڭ ورتەلمەگەن بولىكتەرىن تىنىق مۇحيتى سۋىنا ءتۇسىرۋ ساعات 17.17-دە جۇزەگە اسىرىلادى. بايقوڭىردان ۇشىرىلعان «پروگرەسس» جۇك كەمەسى بۇعان دەيىن حعس ەكيپاجىنا وتىن, وتتەگى, ازىق-ت ۇلىك, عىلىمي تاجىريبەلەرگە ارنالعان اپپاراتۋرا جانە استروناۆتار ءۇشىن سالەمدەمەلەر جەتكىزگەن ەدى.
سودىرلار كۇردتەرگە قارسى حيميالىق قارۋ قولدانعان با؟
اقش بيلىگى «يسلام مەملەكەتى» تەررورشىل توپتارىنا يراكتا حيميالىق قارۋ قولدانعان دەگەن كۇدىك كەلتىردى. كەيبىر باسىلىمداردىڭ جازۋىنشا, جوعارى شەندى شەنەۋنىكتەر «يسلام مەملەكەتىنىڭ» سودىرلارى وسى اپتادا كۇردتەرگە جاساعان شابۋىلى كەزىندە ادامدى ۋلاندىراتىن يپريت گازىن قولدانعان, دەپ بولجايدى.
باسىلىم, سونداي-اق, «يسلام مەملەكەتىنىڭ» سودىرلارى يپريت گازىن سيريادان تاپقان بولۋى ىقتيمال ەكەندىگىن كەلتىرەدى. ويتكەنى, بۇل ەلدىڭ ۇكىمەتى 2013 جىلى ادام ومىرىنە قاۋىپتى ۋلى زاتتىڭ كوپ كولەمدە ساقتالعانىن مويىنداعان ەدى. سودىرلار ءيپريتتى يراكتان الۋ مۇمكىندىگىن دە جوققا شىعارمايدى. قازىرگى كەزدە اقش-تىڭ ارنايى قىزمەتى اتالعان ماسەلەنى تەكسەرۋدى قولعا العان.
«ەڭ قاۋىپتى ادام» تۇرمەدە اجال قۇشتى
كاليفورنيا شتاتىنداعى فولسوم قالاسىنداعى «ساكرامەنتو» اتالاتىن تۇرمەدە بولعان تارتىپسىزدىكتەر كەزىندە ءبىر ادام ءولىپ, ون ءبىر جازاسىن وتەۋشى اۋرۋحاناعا جەتكىزىلگەن.
اقپارات اگەنتتىكتەرىنىڭ حابارلاۋىنشا, 71 جاستاعى حيۋگو پينەلل ەسىمدى ولگەن الگى ادامدى «كاليفورنيانىڭ تۇرمە جۇيەسىندەگى ەڭ قاۋىپتى ادام» دەپ اتايدى ەكەن. سونداي-اق, ءومىر بويى تۇرمەدە وتىرۋ جازاسىنا كەسىلگەن ول افروامەريكالىق تۇرمەلەردە سولشىل راديكالدىق توپ – «قارا پارتيزاندىق وتباسىن» ۇيىمداستىرۋشى دجوردج دجەكسوننىڭ جاقىن دوسى بولعان كورىنەدى. ال تۇرمەدەگى تارتىپسىزدىككە 70-تەن استام جازاسىن وتەۋشى قاتىسقان. تارتىپسىزدىك ح.پينەللدى ءولتىرۋ ءۇشىن ادەيى ۇيىمداستىرىلعان دەگەن بولجام دا بار.
قىسقا قايىرىپ ايتقاندا:
● قىتايدىڭ گۋاندۋن پروۆينتسياسىنداعى دۋنگۋان قالاسىندا سالىنىپ جاتقان مەترو ستانساسىنىڭ ءۇستى وپىرىلىپ, جەراستى قازانشۇڭقىرىنا قۇلاعان. وپىرىلۋ اۋدانى 300-دەن استام شارشى مەتردى قۇرايدى.
● وسى اپتادا مىسىردا بولعان اپتاپ ىستىق سالدارىنان كوز جۇمعانداردىڭ سانى 76 ادامعا جەتتى. ولاردىڭ كوپشىلىگى ەگدە جاستاعىلار.
● جاپونيا اتوم ەلەكتر ستانساسىنىڭ وسى اپتادا ىسكە قوسىلعان «سەنداي» ءبىرىنشى ەنەرگيالىق بلوگى ەلەكتر ەنەرگياسىن وندىرە باستادى.
● اۋعانستاننىڭ قورعانىس مينيسترلىگى تاجىك-اۋعان شەكاراسىندا ەكى مينانىڭ تاجىكستان اۋماعىندا جارىلۋىنا بايلانىستى دۋشانبەدەن رەسمي تۇردە كەشىرىم سۇرادى.
ميسسيا جەتەكشىسى جانجالعا بايلانىستى وتستاۆكاعا جىبەرىلدى
بۇۇ-نىڭ ورتالىق افريكا رەسپۋبليكاسىنداعى كوپبەيىندى كەشەندىك ميسسياسىنىڭ باسشىسى باباكار گايە وتستاۆكاعا كەتتى. بۇعان وسى ەلدەگى بىتىمگەر اسكەريلەردىڭ 12 جاستاعى قىز بالانى زورلاعانى جانە ولاردىڭ ەل استاناسى – بانگيدە اكەلى-بالالى ەكەۋدى اتىپ تاستاعانى سەبەپ بولعان.
«رەيتەر» اگەنتتىگىنىڭ حابارلاۋىنشا, ب.گايە وتستاۆكاعا كەتۋ جونىندە ءوزى سۇرانعان. وسىعان بايلانىستى بۇۇ-نىڭ باس حاتشىسى پان گي مۋن: «بۇگىن مەن ءوزىمنىڭ ورتالىق افريكا رەسپۋبليكاسىنداعى ارنايى وكىل باباكار گايەنىڭ وتستاۆكاسىن قابىلدادىم», – دەپ مالىمدەگەن. قۇقىق قورعاۋشىلاردىڭ مالىمەتىنە قاراعاندا, بىتىمگەر اسكەريلەردىڭ ءبىرى قىزدى 2 تامىزدا زورلاعان, ال ەكى ادامدى 3 تامىزدا اتىپ ولتىرگەن.
«تاليبان» سودىرلارى 15 ءتارتىپ ساقشىسىن اتىپ كەتتى
ش
پوليتسەيلەردىڭ كيىمىن كيىپ الىپ, كۇش قۇرىلىمنىڭ عيماراتىنا كىرگەن «تاليبان» قوزعالىسىنىڭ سودىرلارى قۇقىق قورعاۋ ورگاندارىنىڭ 15 قىزمەتكەرىن مەرت قىلدى. قايعىلى وقيعا اۋعانستاننىڭ گيلمەند پروۆينتسياسىندا ورىن الدى.
دەرەك كوزدەرىنە قاراعاندا, سودىرلار مەكەمە عيماراتىنا پوليتسيا اۆتوموبيلدەرىمەن كەلگەن. سوندا 14 ءتارتىپ ساقشىسىن ءولتىرىپ, ولاردىڭ قارۋلارىن وزدەرىمەن بىرگە الا كەتكەن. ودان كەيىن باقىلاۋ-وتكىزۋ پۋنكتىندە كۇزەتتە تۇرعان تاعى ءبىر پوليتسەيدى وققا بايلاعان. كەيبىر مالىمەتتەر بويىنشا, ولار ەل اۋماعىنىڭ 70 پايىزىنا جۋىعىنا باقىلاۋ جاسايتىن كورىنەدى. ۇيىمنىڭ بەلسەندى سودىرلارىنىڭ سانى 27 مىڭ ادامنان اسادى دەگەن دەرەك بار. ال بۇۇ وسى جىلدىڭ العاشقى التى ايىندا يسلامشىلاردىڭ اۋعانستان بيلىگىمەن بولعان جانجالدار سالدارىنان قازا تاپقان جانە جارالانعاندار سانى 5 مىڭ ادامعا جۋىقتايدى دەگەن مالىمەت كەلتىرەدى.
جارىلىستان 60 ادام قازا تاپتى
يراكتاعى جويقىن جارىلىستان 60 ادام وپات بولىپ, 200-گە جۋىق تۇرعىن ءتۇرلى دارەجەدە جاراقات الدى. بۇل جونىندە پوليتسەيلەر مەن مەديتسينا قىزمەتكەرلەرىنىڭ ايتقاندارىنا سىلتەمە جاساي وتىرىپ, «رەيتەر» اگەنتتىگى حابارلادى.
بۇل تەررورلىق ارەكەت باعداتتىڭ نەگىزىنەن شيتتەر قونىستانعان سادر-سيتي اۋدانىنداعى بازاردا جارىلعىش زاتتار تولتىرىلعان فۋرگون-رەفريجەراتوردىڭ جارىلۋى ارقىلى جاسالعان. يراكتا ادام ولىمىنە سوقتىرعان تەررورلىق ارەكەتتەر ءجيى كورىنىس بەرۋدە. مىسالى, وسى جىلدىڭ 22 ماۋسىمىندا باعداتتا ەكى اۆتوموبيلگە قويىلعان بومبانىڭ ىسكە قوسىلۋىنان 26 ادام قازا تاپسا, قاسيەتتى رامازان ايىندا اۆتوكولىككە تيەلگەن ءۇش تونناداي جارىلعىش زاتتىڭ جارىلۋىنان 100 ادام قۇربان بولعان ەدى.