مۇناي-گاز ءوندىرۋ ءىسى اپتاپ ىستىق, قاھارلى سۋىقپەن ساناسپاي سايىن دالا توسىندە اتقارىلاتىن ەڭبەك بولعاندىقتان, وندا بارلىق جۇمىس تۇرلەرى قول كۇشىمەن جۇزەگە اسىرىلادى, زاماناۋي جاڭارۋ مەن جاڭعىرۋدان الىستاۋ جاتىر دەۋگە بولمايدى. بارلىق قىزمەت تۇرلەرىنە, ءاربىر سالاعا ءتان زاماننىڭ اعىمىنا قاراي يكەمدەلۋ, جاڭالىقتاردى يگەرۋ مەن جاڭا تەحنولوگيالارمەن قارۋلانۋ بۇل سالاعا دا ءتان.
قازىرگى تاڭدا ەلىمىزدەگى مۇناي-گاز ءوندىرۋ ىسىندە بىرقاتار قيىندىقتار دا, جاعىمدى جەتىستىكتەر دە بار. قيىندىق تۇتىنىستاعى كەن ورىندارىندا قاجەتتى قازبالار قورىنىڭ ازايۋى نەمەسە ولاردىڭ جەردىڭ تەرەڭ قاباتتارىنا شوگۋىندە جاتسا, جاڭالىق سول قيىندىقتى ەڭسەرە وتىرىپ تيىمدىلىككە قول جەتكىزۋ ءۇشىن جۇمىس بارىسىن وڭتايلاندىرۋ, اۋىردى جەڭىلدەتۋ, جاڭا تەحنولوگيالاردى مەڭگەرۋدە جاتىر. سالاداعى سان مىڭداعان ماماندى ءتۇرلى شەتەلدەرگە اپارىپ وقىتىپ, كاسىبي تۇرعىدان بەساسپاپ ەتىپ جەتىلدىرىپ اكەلۋ مۇمكىن دە, مىندەت تە ەمەس. مامانداردىڭ ءوز ەلىندە, ءوز جۇمىس ورنىندا ءجۇرىپ-اق جاۋاپكەرشىلىگىن تولىق سەزىنىپ, جۇمىسىن ءمىنسىز ءارى شەبەر, ساپالى دا تياناقتى اتقارۋىنا قاجەتتى جاعدايلار مەن شارالار قۇزىرلى ورىندار تاراپىنان قولعا الىنىپ, جۇيەلى تۇردە جۇرگىزىلىپ كەلەدى.
اياسىنا بىرنەشە ۇساق مەكەمەلەر مەن ونداعان ەنشىلەس كاسىپورىنداردى توپتاستىرعان الىپ مەكەمە, قازاق مۇنايىنىڭ قاراشاڭىراعى ىسپەتتى – «قازمۇنايگاز» بارلاۋ ءوندىرۋ» اق-دا بۇل ءىس ماقساتتى جۇرگىزىلۋدە. سولاردىڭ ءبىرى – مۇنايشىلار اراسىندا بىرنەشە ماماندىق بويىنشا ۇزدىك مامانداردى انىقتاپ, ولارعا جىل بويى قولداۋ كورسەتۋگە ءداستۇرلى سيپات بەرىلۋى. بۇعان دەيىن اتىراۋ وبلىسىنداعى ەمبى اۋماعىنداعى مۇناي كاسىپشىلىگىندە ءۇش رەت, «وزەنمۇنايگازدا» ەكى رەت جانە بوزاشى بويىنداعى قاراجانباس كەن ورنى كاسىپشىلىگى مەن قىزىلوردا وبلىسىنداعى «قازگەرمۇنايدىڭ» ارقايسىسىندا ءبىر رەتتەن وتكىزىلگەن «ۇزدىك مامان» سايىسى بيىل تاعى دا ماڭعىستاۋ جەرىندە, «وزەنمۇنايگاز» اق-عا قاراستى وندىرىستىك مەكەمەلەردىڭ كەڭ الاڭدارىندا ۇيىمداستىرىلدى. «قمگ» ءبو» ەنشىلەس ۇيىمدارى مەن بىرلەسكەن كاسىپورىندارى قىزمەتكەرلەرىنىڭ اراسىنان ءوز ىسىندە سۋىرىلىپ شىققان شەبەرلەردى انىقتاۋ ماقساتىنداعى سايىستىڭ جاڭا 8-ءشى ماۋسىمىنىڭ سالتاناتتى اشىلۋى اقتاۋ قالاسىندا بولىپ, ەلىمىزدىڭ باتىس ايماعىنان جيىلعان سايىسكەرلەر مەن قوناقتاردى «قمگ» ءبو» اق باس ديرەكتورىنىڭ ءوندىرىس جونىندەگى ورىنباسارى ق.ەلەۋسىنوۆ, «وزەنمۇنايگاز» اق باس ديرەكتورى م.يباعاروۆ قۇتتىقتادى.
– كومپانيانىڭ الدىندا مۇناي ءوندىرۋ جوسپارىن ويداعىداي ورىنداۋ مىندەتى تۇر. ول ءوز كەزەگىندە ماماندارىمىزدىڭ كاسىبي بىلىكتىلىگىنە, شەبەرلىگىنە قاتىستى بولىپ كەلەدى جانە ءاربىر ماماننان ءبىلىم, بىلىك, جاۋاپكەرشىلىك كۇتىلەدى. ءداستۇرلى «ۇزدىك مامان» سايىسىن وتكىزۋ ارقىلى ءبىز مۇناي سالاسىنىڭ بىرنەشە ماماندىقتارى بويىنشا ۇزدىكتەردى انىقتاپ قانا قويماي, مۇنايشىلار اراسىندا ءوز ءىسىنىڭ شەبەرى بولۋعا دەگەن ۇمتىلىستى قالىپتاستىرامىز, بۇل جۇمىس ساپاسىنا وڭ ىقپالىن تيگىزەدى. سونىمەن قاتار, ەنشىلەس كاسىپورىنداردىڭ قىزمەتكەرلەرى بۇل بايقاۋعا جىل بويى دايىندالادى. ءبىلىمى مەن تاجىريبەسىن جەتىلدىرىپ, جۇمىس ساپاسىن جاقسارتا تۇسۋگە تىرىسادى, بايقاۋ ارقىلى قىزمەتكەرلەرىمىز ءوز قابىلەتىن تانىتا الادى, جۇمىسشى ماماندىعىنىڭ مارتەبەسى ارتادى. بيىلعى جىلى «قازمۇنايگاز» بارلاۋ ءوندىرۋ» اكتسيونەرلىك قوعامىنىڭ كۇنتىزبەسى وسى «ۇزدىك مامان» بايقاۋىنىڭ جەڭىمپازدارىنا ارنالدى, بۇل ارقىلى كومپانيامىزدىڭ ءوز ماماندارىنا, كادر ساپاسىنا قانشالىقتى نازار اۋدارىپ, قولداۋ كورسەتەتىنىن بىلۋگە بولادى, – دەدى ق.ەلەۋسىنوۆ قۇتتىقتاۋ سوزىندە.
سايىسقا بۇدان بۇرىن دا قاتىسىپ, ىسىلعان «وزەنمۇنايگاز» اق, «ەمبىمۇنايگاز» اق, «قاراجانباسمۇناي» اق جانە «قازگەرمۇناي» بك جشس كومپانيالارىمەن بىرگە بيىل العاش رەت «كرۋز» جشس ماماندارى دا قاتىستى. مۇناي سالاسىنىڭ 58 مامانى مۇناي مەن گازدى ءوندىرۋ وپەراتورى, ۇڭعىمالاردى زەرتتەۋ وپەراتورى, مۇنايدى دايىنداۋ وپەراتورى, قابات قىسىمىن قاداعالاۋ وپەراتورى, ۇڭعىمالاردى جەراستى جوندەۋ وپەراتورى, مۇناي كاسىپشىلىگى قۇرىلعىلارىن جوندەۋ سلەسارى, گاز-ەلەكتر دانەكەرلەۋشىسى, توكار, ەلەكترومونتەر, حيميالىق ساراپتاما لابورانتى, اۆتوماتيكا جانە باقىلاۋ-ولشەۋ قۇرىلعىلارىنىڭ سلەسارى ماماندىقتارى بويىنشا ەكى كۇن تەوريالىق جانە تاجىريبەلىك تۇرعىدا ءوزارا ءبىلىم مەن بىلىك سىناستى. العاشقى كۇن تەوريالىق سىناققا ارنالسا, ەكىنشى كۇن جاڭاوزەن قالاسىنداعى «وزەنمۇنايگاز» اق وندىرىستىك الاڭدارىنداعى ناقتى ءىس جۇزىندەگى قىزۋ سايىسقا ارنالدى.
– ءبىز اتالمىش سايىسقا دايىندىقتى ءتورت-بەس اي بويى جۇرگىزدىك. دايىندىق ەكى باعىتتا ءجۇردى, العاشقىسى – سايىسكەرلەر وزدەرىنە جۇكتەلگەن وندىرىستىك-تاجىريبەلىك تاپسىرمالاردى الاڭسىز, مۇقيات ورىنداۋى ءۇشىن قاجەتتى قوندىرعىلارمەن جابدىقتالعان ارنايى پوليگوندار مەن نىساندار دايىندالدى. ەكىنشىدەن, ارىپتەس كومپانيالاردىڭ ماماندارىمەن سايىستا وزدەرىنە بەرىلگەن تاپسىرمانى مۇلتىكسىز ورىنداپ, جۇمىستاعى شەبەرلىكتەرى مەن مۇمكىندىكتەرىن تولىق كورسەتە ءبىلۋى ءۇشىن تسەحتا, باسقارمالاردا, سوسىن كومپانيا دەڭگەيىندە سايىستار ءوتىپ, ەڭ مىقتىلاردى ىرىكتەپ شىعاردىق, – دەيدى «وزەنمۇنايگاز» اق باس ديرەكتورى م.يباعاروۆ.
جارىستىڭ ەكىنشى كۇنى سايىس بارىسىن كوزبەن كورىپ, مۇنايشىلاردىڭ شەبەرلىگىنە ءتانتى بولۋ ءۇشىن «وزەنمۇنايگاز» اق وندىرىستىك بازاسىنداعى الاڭدارعا كەلدىك. اپتاپ ىستىق مۇنداي اۋا رايىنا ابدەن ەتى ءولىپ كەتكەن مۇنايشىلارعا اسەر ەتەتىن ەمەس – سامايدان سورعالاپ, ماڭدايدان جوسىلا اعىلعان تەردى الاقان سىرتىمەن سىپىرىپ تاستاپ, ءوز جۇمىستارىنا ىنتى-شىنتىمەن كىرىسكەن. ءار ماماندىق بويىنشا دايىندالعان ارنايى ورىنداردا سايىسكەرلەر ءۇشىن بارلىق جاعداي جاسالعان, ال ولاردىڭ جۇمىسىن قاداعالاپ, ەڭبەگىنە باعا بەرەتىن قازىلار القاسى دا مۇنايشى-سايىسكەرلەردىڭ ءاربىر قيمىلى مەن تياناقتىلىعىن, جىلدامدىعىن جانە جۇمىسىنىڭ ساپاسى مەن دالدىگىن كىرپىك قاقپاي ءجىتى قاداعالاپ وتىردى. الدىمەن اتباسىن تىرەگەنىمىز گاز-ەلەكتر دانەكەرلەۋشىلەر سايىسى بولدى. كوميسسيا توراعاسى, «قمگ» ءبو» اق ءوندىرىس جانە مونيتورينگ باسقارماسىنىڭ اعا ينجەنەرى ن.گۋلدجۋماروۆتىڭ ايتۋىنشا, اتالمىش ماماندىق بويىنشا «وزەنمۇنايگاز», «قاراجانباسمۇناي», «ەمبىمۇنايگاز» جانە «كرۋز» مەكەمەلەرى بويىنشا 5 ادام سايىسقا تۇسۋدە ەكەن. ولاردىڭ ارقايسىسىنا 40 مينۋت ۋاقىت بەرىلىپ, مۇناي ءوندىرۋ ىسىندە قولدانىلاتىن قۇبىرلار مەن بىلىكتەردى ساپالى جۇمىس جۇرگىزۋ بارىسىندا ەشقانداي قاۋىپ-قاتەر تۋىنداتپايتىن ەتىپ ديامەترلەرىن ساقتاي وتىرىپ, بۇرىشتارىن دالمە-ءدال كەلتىرىپ دانەكەرلەۋ تالابى قويىلعان. ەكى ستانوكتا دانەكەرلەۋشىلەر شەبەرلىكتەرىن دالەلدەۋ ءۇشىن قىزۋ جۇمىسقا كىرىسىپتى.
ەكىنشى كەزەكتە تەمىر جونعان توكارلاردىڭ سايىس الاڭىنا كەلدىك. مۇندا ءبىزدى وزىنە جۇكتەلگەن تاپسىرمانى ورىنداپ شىعىپ تۇرعان ەمبىلىك مۇنايشى, ناقتىراق ايتساق تەمىر جوندەۋ شەبەرى لاتيف گۋرەۆ قارسى الدى.
– قازىر عانا ءوز سالامىزعا قاتىستى ءتۇرلى وپەراتسيالاردى ورىنداپ شىقتىم. مۇناي سالاسىندا 1979 جىلدان باستاپ, ال «ەمبىمۇنايگاز» اق-دا 1991 جىلدان بەرى جۇمىس ىستەپ كەلەمىن. كومپانيامىزدا وتكەن سايىستا جەڭىمپاز اتانىپ, وسى ايماقتىق سايىسقا قاتىسۋعا مۇمكىندىك الدىم. توكار ماماندىعى بويىنشا بەس ادام سىنعا تۇسۋدەمىز, ءبارى دە ءوز جۇمىس ورىندارىنان تاڭدالىپ كەلگەن جۇيرىكتەر. مەنىڭ مۇناي سالاسىنداعى ەڭبەك جولىم باستالعانىنا 36 جىل بولدى, وسى جىلدار ىشىندە جۇمىس ۇردىسىنە ءبىراز وزگەرىستەر, جاڭالىقتار ەندى. جالپى, تاجىريبەمىز جەتكىلىكتى بولعانمەن, جاڭاشا جۇمىس ىستەۋدى, زاماناۋي تەحنولوگيالاردى قولدانۋدى مەڭگەرىپ, جاس جىگىتتەرمەن «كۇش سىناسىپ» جاتىرمىن, – دەپ كۇلەدى تاجىريبەلى مۇنايشى.
№3 مۇناي-گاز ءوندىرۋ باسقارماسى اۋماعىنداعى 6946 توپتىق قوندىرعىسىنا قاراستى №62 ۇڭعىما ماڭى دا ناعىز سايىس الاڭىنا اينالعان. مۇندا «قازگەرمۇناي», «ەمبىمۇنايگاز», «وزەنمۇنايگاز» بەن «قاراجانباسمۇناي» كومپانيالارىنىڭ مۇناي-گاز ءوندىرۋ وپەراتورلارى ۇڭعىعا تىعىرىق سالۋ جۇمىسىمەن سىنعا تۇسۋدە ەكەن. №2 مۇناي-گاز ءوندىرۋ باسقارماسى ديرەكتورى ا.قاناليەۆ ءوز مەكەمەسى قوسقان جۇيرىگىنە جانكۇيەر رەتىندە قولداۋ كورسەتۋ ءۇشىن كەلىپتى. «مەن ءوز جىگىتتەرىمە سەنەمىن, كۇندەلىكتى جۇمىس بارىسىندا جاساپ جۇرگەن جۇمىستارى عوي, سىنداردان ءساتتى وتەدى دەپ ويلايمىن» دەيدى ول بايسالدى قالىپتا. بۇل ءسوزدى «بىلتىر وسى سايىستا 2-ورىندى يەلەندىم, بيىل دا دايىندىعىم جامان ەمەس» دەپ قۋاتتاي ءتۇستى سايىسكەر, 5 رازريادتى وپەراتور ءالىپ اقجىگىتوۆ. ۇڭعىمانىڭ بۇزىلىپ قالماي, دۇرىس جۇمىس جاساۋىنا جاۋاپتى, اقاۋ شىقسا ۋاقىت وزدىرماي بىلىكتىلىكپەن جوندەۋگە مىندەتتى بولىپ سانالاتىن وپەراتورلاردىڭ ءبىرى ءالىپ مۇناي سالاسىندا اكە-شەشەسى جۇمىس ىستەگەن مۇنايشىلار اۋلەتىنىڭ 30 جاسار ءىزباسار بۋىنى ەكەن.
تاعى ءبىر سايىس قىزعان تۇس ۇڭعىمالاردى جەراستى جوندەۋ بريگاداسى اراسىندا ەكەن. ءبىز بارعاندا سايىس الاڭىنا العاشقى بولىپ شىعىپ, وزدەرىنە بولىنگەن ۋاقىتتى ەڭسەرىپ, تاپسىرمالاردى ورىنداپ بولعان قاراجانباستىق مۇنايشىلار كولەڭكەدە دەمالىپ وتىرسا, ەمبىلىك مۇنايشىلار جارىس جولىن جالعاستىرىپ جاتىر ەكەن. ۇڭعىمالاردىڭ جوندەۋارالىق مەرزىمىن ۇزارتۋ, ءجيى بۇزىلۋىنا جول بەرمەۋدى مىندەت ەتكەن اتالمىش بريگادا مۇناي-گاز سالاسىنداعى نەگىزگى بريگادالاردىڭ ءبىرى. «بۇرعىشى – مۇناي سالاسىندا ۇلكەن ءرول اتقاراتىن جۇمىسشى. مۇنايدى شىعارۋ, ۇڭعىمالاردىڭ جەراستى دايىندىعىن قامتاماسىز ەتۋ – ءبىزدىڭ مىندەتىمىز. سايىس بارىسىندا قويىلعان قاۋىپسىزدىك تەحنيكاسى ەرەجەلەرىن ساقتاۋ, ادام ومىرىنە قاۋىپتىلىكتى بولدىرماۋ, ۇڭعىمالاردىڭ بەلگىلەنگەن مەرزىم ىشىندە بۇزىلۋىنا جول بەرمەۋ ءۇشىن كاسىبي دەڭگەيدە ساپالى جۇمىس ىستەۋ تالاپتارىنا ساي ءبىزدىڭ توبىمىز شەبەرلىكتەرىمىزدى كورسەتە الدىق دەپ ويلايمىن» دەيدى «قاراجانباسمۇناي» اق سايىسكەرى م.ورازوۆ. وقۋ ورتالىعىنىڭ بازاسىندا بۇدان باسقا سلەسار, مۇناي جابدىقتارىن جوندەۋ ماماندىقتارى بويىنشا سايىستار ءوتىپ جاتىر ەكەن.
كەشكە اقتاۋ قالاسىنداعى ساۋلەتتى قوناقۇيلەردىڭ بىرىندە سايىستىڭ قورىتىندىسىن جاريالاۋ, ۇزدىكتەردى ماراپاتتاۋ ءراسىمى ءوتتى. ماراپات تا وسال ەمەس – ارنايى سىي-سياپات, توسبەلگىمەن بىرگە ءبىر جىل بويى 1-ورىن العان جەڭىمپازداردىڭ ەڭباكاقىسىنا 30, ەكىنشى ورىن يەلەرىنە 20, ءۇشىنشى ورىنداعىلارعا 10 پايىزدىق قوسىمشا اقى تولەنەدى. ءبىر قىزىعى – ءساتى ءتۇسىپ ءبىز سۇحبات العان «وزەنمۇنايگاز» اق وپەراتورى ءالىپ اقجىگىتوۆ سوزىندە تۇرىپتى – ءوز ماماندىعى بويىنشا الدىڭعى ورىندى يەلەنىپ شىقتى. وزگە دە ون ماماندىق بويىنشا جاڭاوزەندىك مۇنايشىلار الدىڭعى ورىندى ەشكىممەن بولىسپەپتى. ءسويتىپ, توپتىق ەسەپتە الاڭ يەلەرى العا شىقسا, وزگە دە سايىسقا قاتىسۋشى كومپانيالار العان ورىندارىنىڭ ەسەبىنە قاراي ەكىنشى, ءۇشىنشى, ءتورتىنشى ورىنداردى ءبولىستى. كومپانيالار باسشىلارىنىڭ ءوزارا كەلىسىم-ۇيعارىمىمەن كەلەسى جىلعى «ۇزدىك مامان» سايىسى «قاراجانباسمۇناي» اق-دا وتەتىن بولىپ بەلگىلەندى.
ءالىپ اقجىگىتوۆ,
«مۇناي-گاز ءوندىرۋ وپەراتورى» ماماندىعى بويىنشا جەڭىمپاز, «وزەنمۇنايگاز» اق وپەراتورى:
– سايىستىڭ قىزىعى دا, قيىندىعى دا مول بولدى. قوبالجۋ دا, تولقۋ دا بولدى. «وزەنمۇنايگاز» اۋماعىندا بولىپ جاتىر, سىزگە جەڭىل شىعار؟» دەگەن سۇراقتار قويىلدى, راسىندا ولاي ەمەس, كەرىسىنشە قالىڭ قولداۋشىلاردىڭ سەنىمىن ارقالاپ سايىسقا ءتۇسۋدىڭ وزىندىك قيىندىعى, جاۋاپكەرشىلىك جۇگى اۋىر بولادى ەكەن. تەوريالىق جانە تاجىريبەلىك سىنداردا وتكەن باعالارىمدى قوسۋ ناتيجەسىندە 9,5 ۇپاي جيناپ, الدىڭعى ورىندى يەلەندىم. قۋانىشىم شەكسىز. ۇيىمداستىرۋشىلارعا العىس ايتامىن. ماماندار, جۇمىسشىلار اراسىندا مۇنداي سايىستاردى وتكىزىپ تۇرۋ – اسىرەسە, جاس مامانداردىڭ تاجىريبە جيناقتاپ جەتىلۋىنە كومەگىن تيگىزەتىن بولادى.
جانىبەك ەرشە,
«مۇناي وڭدەۋ جابدىقتارىن جوندەۋ» نوميناتسياسى بويىنشا 4-ورىن يەگەرى, «قاراجانباسمۇناي» اق ءتورتىنشى رازريادتى سلەسارى:
– مۇناي سالاسىندا جۇمىس ىستەگەنىمە 21 جىل بولدى, بۇرىن جەتىباي, قالامقاس كەن ورىندارىندا جۇمىس ىستەدىم. بيىل سايىسقا العاش رەت قاتىسىپ تۇرمىن. قيىنداۋ بولدى, بىراق ارىپتەستەرىمدى كورىپ, ولاردىڭ تاجىريبەسىنە ءتانتى بولىپ قالعان جايىم بار. الداعى جىلداردان ءۇمىت كۇتەمىن, وعان دەيىن كۇندەلىكتى جۇمىس بارىسىندا دايىندىق جاساپ جۇرگەندەي سەزىنىپ, ءوزىمدى تەوريالىق جانە تاجىريبەلىك تۇرعىدان جەتىلدىرە تۇسەتىن بولامىن. سايىس مەن ءۇشىن قىزىقتى ءوتتى, قاتىسقانىما قۋانىشتىمىن.
زۇلقارناي مىرزابەكوۆ,
«وزەنمۇنايگاز» اق «ۇڭعىمالاردى جەراستى جوندەۋ جونىندەگى وپەراتورلاردىڭ ۇزدىك بريگاداسى» اتىنان:
– مەن بيىل سەگىزىنشى رەت قاتىسىپ تۇرمىن, ەمبىدە, قاراجانباستا وتكەن سايىستاردا 2-ورىندى يەلەنگەن ەدىم. بيىل بريگادامداعى ماقسات ايدارحانوۆ, نۇرلىبەك ناۋكەباەۆپەن بىرگە 8,75 ۇپاي جيناپ, 1-ورىن بيىگىنەن كورىندىك. بۇل «وزەنمۇنايگاز» اق-دا ۇدايى جۇرگىزىلگەن دايىندىق جۇمىستارىنىڭ ناتيجەسى دەپ بىلەمىن جانە سول ءۇشىن كومپانيا باسشىلىعىنا, «ۇزدىك مامان» سايىسىن ۇيىمداستىرۋشىلارعا راحمەت ايتامىن. وتباسىمدا ءتورت بالا تاربيەلەپ وتىرمىن, سونداي-اق, اكەم جانە اپام مۇناي سالاسىنىڭ قىزمەتكەرلەرى. وتباسىمداعى مۇنايشىلىق كاسىپتىڭ اسەرى, ونىڭ ۇستىنە بىرنەشە جىل قاتارىنان قاتىسىپ تاجىريبە جيناقتاعاندىعىمنىڭ اسەرى بولۋ كەرەك, بۇل جولى قاتتى قينالعان جوقپىن. ءار ءوڭىردىڭ مۇنايىنىڭ ساپاسى دا, ءوندىرۋ تەحنولوگياسى مەن جابدىقتارى دا ءارتۇرلى عوي, ەمبىدە, قاراجانباستا قاتىسىپ ءجۇرىپ وسى جاقتارىنا كوڭىل بولگەنمىن. ماعان بۇل جولى وسى تاجىريبەم كومەككە كەلدى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
سۋرەتتەردى تۇسىرگەندەر:
سەرىك مايەمەروۆ,
تالانت قۇسايىن.