پاۆلوداردا اۋىل مۇعالىمى ماريا بەدرينا جولدا تۇرىپ قالعان كولىكتەرگە جول كورسەتىپ, ءتورت شاقىرىم جاياۋ جۇرگەن. ونىڭ باتىلدىعى جەرلەستەرىن ءتانتى ەتتى.
ەرتىس-بايان وڭىرىندە قاتارىنان بىرنەشە كۇن سوققان اق تۇتەك بوران تالاي جولاۋشىنىڭ ساپارىن بوگەپ, جول قوزعالىسىن قيىنداتتى. وسىنداي سىن ساعاتتاردا ۇلكەن جولدار بويىندا تۇرىپ قالعان كولىكتەرگە كومەككە كەلىپ, ات قۇلاعى كورىنبەيتىن بوراندا جولاۋشىلاردىڭ امان جەتۋىنە جاعداي جاساعان ماريا بەدرينانىڭ ارەكەتىن كوپشىلىك ەرلىككە بالاپ وتىر. ول اقسۋ مەن پاۆلودار قالالارى اراسىنداعى اۆتوجولدا تۇرىپ قالعان كولىكتەردىڭ الدىنا شىعىپ, ءتورت شاقىرىم بويى جاياۋ ءجۇرىپ وتىرعان. سونىڭ ناتيجەسىندە ادامدار پاۆلودار قالاسىنىڭ ىرگەسىندەگى اتامەكەن كەنتىنە امان-ەسەن جەتكەن.
ماريا نيكولاەۆنانىڭ جۇرتتى سۇيسىنتكەن بۇل ءىسى قازىر الەۋمەتتىك جەلىدە تاراپ جاتىر. ال قايسار جان ءوز ارەكەتىن ەرلىك دەپ ويلامايدى.
«بۇل كۇنى وتباسىمىزبەن اقسۋ قالاسىنان ۇيىمىزگە ورالىپ كەلە جاتقان ەدىك. تەرەڭكول اۋدانىنىڭ ورتالىعىندا تۇرامىز. كولىك رۋلىندە كۇيەۋىم بولدى. ساعات كۇندىزگى ءۇش-تورتتەردىڭ شاماسىندا اقسۋدان ۇزاي بەرگەندە اۋا رايى كۇرت بۇزىلىپ, اق تۇتەك بوران باستالىپ كەتتى. جول مۇلدە كورىنبەي قالعان سوڭ, جيەككە ءتۇسىپ كەتەمىز بە دەپ قورىققان كولىكتەر بىرىنەن سوڭ ءبىرى توقتاي باستادى. سول ساتتە ەڭ باستىسى اتامەكەن كەنتىنە جەتۋىمىز كەرەك ەكەنىن, تۇرىپ قالساق كولىكتەرىمىزدى قار باسىپ قالاتىنىن ءتۇسىندىم دە, كولىكتەن شىعىپ العا قاراي جۇرە بەردىم. سويتسەم ءبىزدىڭ الدىمىزدا شامامەن التى كولىك تۇر, ونىڭ ۇشەۋى جولدىڭ ەكى جولاعىن دا جاۋىپ قالىپتى. ارلى-بەرلى كولىكتەردىڭ ءوتۋى مۇمكىن ەمەس. بىرەۋ جول باستاۋى كەرەك بولدى. ال جولداسىم جاياۋ جۇرگەننەن گورى ءوزىن رۋلدە سەنىمدىرەك سەزىنەدى. سوندىقتان العا شىقتىم دا, العاشقى تۇرعان كولىكتىڭ تەرەزەسىن توقىلداتىپ, سوڭىمنان ەر دەپ بەلگى بەردىم», دەيدى ول.
وسىلايشا, ول بىردە توقتاپ, بىردە العا جىلجيدى. كۇن ءسال اشىلعان ساتتە اۆتوكەرۋەننىڭ باسىندا كەلە جاتقان وزگە ايەل ادامنىڭ كولىگىنە جايعاسىپ, جىلىنىپ وتىرعان. شامامەن ءتورت شاقىرىم جولدى باسىپ وتكەندە اتامەكەن كەنتىنە كىرەبەرىستەگى كوپىرگە جەتەدى.
«مەن ءۇشىن ەڭ باستىسى بۇل كۇنى ۇيگە امان-ەسەن جەتۋ ەدى. ۇيدە بالالارىمىز كۇتىپ وتىرعان. سالوندا بىزبەن بىرگە قىزىم بولدى, ونىڭ ومىرىنە دە الاڭدادىم. ونىڭ ۇستىنە كولوننانىڭ الدىنداعى كولىكتى باسقارىپ كەلە جاتقان ايەل ادامنىڭ بويىنداعى ۇرەيىن باسقىم كەلدى. مەنى كورىپ, جۇرەگى ورنىنا ءتۇستى. ەڭ قىزىعى, مەندە قورقىنىش دەگەن مۇلدە بولعان جوق. ءالى اياز تۇرا قويماعان ۋاقىت ەدى, جاۋراعان دا جوقپىن», دەپ قوستى ماريا نيكولاەۆنا.
ماريا بەدرينانىڭ جاسى 49-دا. بۇگىندە تەرەڭكول اۋدانىنا قاراستى پەسچان №1 مەكتەبىندە ماتەماتيكا مەن ينفورماتيكا پاندەرىنەن ساباق بەرىپ ءجۇر. ءبىلىم سالاسىنداعى جالپى ەڭبەك ءوتىلى 25 جىلدان اسادى. كۇيەۋى ەكەۋى وتباسىندا ءۇش بالا تاربيەلەپ وتىر.
پاۆلودار وبلىسى