قازاقستاندا ينفلياتسيا قارقىنى بىرتىندەپ باياۋلاي باستادى. بۇل ءۇردىس, ەڭ الدىمەن, بازالىق ينفلياتسيا ديناميكاسىنان كورىنىپ وتىر. دەگەنمەن, جىلدىق كورسەتكىشتىڭ تومەندەۋى كوبىنە وتكەن جىلدىڭ جوعارى بازاسىنىڭ اسەرىمەن تۇسىندىرىلەدى. ال اي سايىنعى باعا ءوسىمى ءالى دە جوعارى دەڭگەيدە قالىپ, ينفلياتسيالىق قىسىم تولىق السىرەمەگەنىن اڭعارتادى, دەپ حابارلايدى Egemen.kz.
ينفلياتسيالىق كۇتۋلەر دە تۇراقتى ءارى جوعارى بولىپ وتىر. ولاردىڭ قۇرىلىمىندا ازداعان وڭ وزگەرىستەر بايقالعانىمەن, جالپى العاندا قوعامدا پروينفلياتسيالىق كوڭىل-كۇي ساقتالىپ, بەلگىسىزدىك دەڭگەيى جوعارى كۇيىندە قالۋدا. سونىمەن قاتار, نارىقتاعى كاسىبي قاتىسۋشىلار اراسىندا ينفلياتسيالىق كۇتۋلەر ءبىرشاما تومەندەپ كەلەدى. وسى جاعدايدى ەسكەرگەن ۇلتتىق بانك ءوز بولجامىن تومەندەتۋ جاعىن قايتا قارادى.
اقشا-كرەديت ساياساتى تۇرعىسىنان العاندا, بازالىق مولشەرلەمە وزگەرىسسىز ساقتالدى. ۇلتتىق بانك قاتاڭ انتينفلياتسيالىق ساياساتتى جالعاستىرىپ وتىر, الايدا 2026 جىلدىڭ ەكىنشى جارتىسىندا ساياساتتى ءبىرشاما جۇمسارتۋ مۇمكىندىگىن جوققا شىعارمايدى. سونىمەن بىرگە ارتىق وتىمدىلىكتى قىسقارتۋ شارالارى اقشا نارىعىندا ءوز اسەرىن كورسەتە باستادى.
ينفلياتسيا: قاتاڭدىق ەمەس, يكەمدىلىك كەرەك
سونىمەن قاتار قازاقستاننىڭ حالىقارالىق رەزەرۆتەرى ءوسىپ كەلەدى. الايدا ولاردىڭ قۇرىلىمىندا ءارتاراپتاندىرۋ دەڭگەيىنىڭ تومەندەپ, ءبىر اكتيۆ ءتۇرىنىڭ باسىمدىعى ارتىپ كەلە جاتقانى بايقالادى.
نەسيەلىك نارىقتا دا بىرقاتار ەرەكشەلىكتەر بار. كاسىپكەرلىك سەكتور مەن حالىقتى نەسيەلەۋ قارقىنى ايتارلىقتاي ەرەكشەلەنەدى. سوعان قاراماستان, بيزنەسكە بەرىلەتىن نەسيەلەر مەن تۇتىنۋشىلىق قارىزداردىڭ ورتاشا پايىزدىق مولشەرلەمەلەرى شامالاس دەڭگەيدە قالىپ وتىر.
AERC دەرەكتەرىنە سايكەس, 2026 جىلعى ناۋرىز ايىندا ينفلياتسيا 0,92% (ايلىق) جانە 11,35% (جىلدىق) دەڭگەيىندە بولادى دەپ كۇتىلەدى. بۇل كورسەتكىش بۇرىنعى بولجاممەن سالىستىرعاندا جوعارى, سەبەبى اقپان ايىنداعى ناقتى ينفلياتسيا كۇتكەننەن اسىپ تۇسكەن.
الداعى ءۇش ايدا ينفلياتسيانىڭ باياۋلاۋ ءۇردىسى ساقتالىپ, 2026 جىلعى مامىردا جىلدىق كورسەتكىش 11,01%-عا دەيىن تومەندەيدى دەپ بولجانىپ وتىر.
ينفلياتسياعا اسەر ەتەتىن نەگىزگى فاكتورلاردىڭ ءبىرى – رەسەيدەگى باعا ديناميكاسى. 2026 جىلدىڭ قاڭتارىندا 6,00%-عا دەيىن جەدەلدەگەن ينفلياتسيا اقپاندا 5,91%-عا دەيىن باياۋلاعان.
قازاقستاندا ينفلياتسيا 11,7%-عا دەيىن تومەندەدى
الەمدىك نارىقتا ازىق-ت ۇلىك باعاسىنىڭ ءوسۋى دە ماڭىزدى فاكتور بولىپ وتىر. 2026 جىلعى اقپاندا فاو يندەكسى 125,3 پۋنكتكە جەتىپ, الدىڭعى ايمەن سالىستىرعاندا ارتقانىمەن, وتكەن جىلمەن سالىستىرعاندا تومەن دەڭگەيدە قالدى.
ۆاليۋتا باعامىنا كەلسەك, اقپاندا دوللاردىڭ ورتاشا باعامى 496 تەڭگەنى قۇراپ, قاڭتارمەن سالىستىرعاندا 2,3%-عا تومەندەدى. رەسەي ءرۋبلى دە ازداپ السىرەدى. ناۋرىز ايىنىڭ ورتاسىنا قاراي مۇناي باعاسىنىڭ ءوسۋى اياسىندا تەڭگە ودان ءارى نىعايدى.
اقشا ماسساسىنىڭ ديناميكاسى دا ينفلياتسياعا اسەر ەتىپ وتىر. 2025 جىلدىڭ جەلتوقسانىندا م3 كورسەتكىشىنىڭ كۇرت ءوسۋى كەيىنگى ايلاردا ازايعانىمەن, ونىڭ كەشىكتىرىلگەن اسەرى ءالى دە ساقتالىپ وتىر.
سونداي-اق مۇناي باعاسىنىڭ جاھاندىق نارىقتا قىمباتتاۋى يمپورتتىق ارنالار ارقىلى ينفلياتسيانى كۇشەيتەدى.
ينفلياتسيامەن كۇرەس: ۇكىمەتتىڭ نەگىزگى قادامدارى قانداي؟
فيسكالدىق ساياسات تۇرعىسىنان العاندا, 2026 جىلعى بيۋدجەت ۇلتتىق قور ترانسفەرتتەرىن قىسقارتىپ, ققس تۇسىمدەرىن ارتتىرۋدى كوزدەيدى. بۇل ينفلياتسيالىق قىسىمدى تومەندەتۋى مۇمكىن. الايدا كۆازيفيسكالدىق ساياساتتىڭ ناقتى اۋقىمى ازىرگە بەلگىسىز.