بەيجىڭ قالاسىندا قازاقستان مەن قىتايدىڭ تەمىرجول سالاسى باسشىلارى كەزدەستى. كەلىسسوزدەر بارىسىندا قتج باسشىسى تالعات الدىبەرگەنوۆ پەن قىتاي تەمىرجول كورپوراتسياسىنىڭ جەتەكشىسى گو چجۋسيۋە ەكى ەل اراسىنداعى جۇك تاسىمالىن دامىتۋ ماسەلەلەرىن تالقىلادى, دەپ حابارلايدى Egemen.kz.
تاراپتار 2025 جىلى جۇك تاسىمالى كولەمىنىڭ تۇراقتى ءوسىمىن اتاپ ءوتىپ, 2026 جىلى بۇل كورسەتكىشتى ودان ءارى ارتتىرۋعا ۋاعدالاستى. اسىرەسە, مەملەكەتارالىق شەكارالىق وتكەلدەر ارقىلى پويىزداردى كوبىرەك الماستىرۋ جوسپارلانىپ وتىر.
كەلىسسوزدەردە نەگىزگى باعىتتار بويىنشا كونتەينەرلىك تاسىمالدى دامىتۋعا ەرەكشە ءمان بەرىلدى. ولار: ترانسكاسپي حالىقارالىق كولىك باعىتى (تمتم), «قىتاي – ەۋروپا», «قىتاي – ورتالىق ازيا» جانە «قىتاي – رەسەي» باعىتتارى.
ناۋرىز مەرەكەسىنە وراي ۇلتتىق ناقىشتا بەزەندىرىلگەن پويىزدار جولعا شىقتى
ترانزيتتىك الەۋەتتى كۇشەيتۋ ءۇشىن تاراپتار كونتەينەرلىك پويىزدار سانىن ارتتىرۋعا, تاسىمالدى باسقارۋ مەن جوسپارلاۋدا تسيفرلاندىرۋدى تەرەڭدەتۋگە, اقپارات الماسۋدى الدىن الا جۇرگىزۋگە كەلىستى.
سونىمەن قاتار, ينفراقۇرىلىمدى دامىتۋ ماسەلەلەرى دە قاراستىرىلدى. اتاپ ايتقاندا, «الاشانكوۋ – دوستىق» ۋچاسكەسىندە ەكىنشى تەمىرجول جەلىسىن سالۋ, تەرمينالدىق قۋاتتاردى كەڭەيتۋ, «التىنكول – قورعاس» جانە «قورعاس – تسزينحە» باعىتتارىن جاڭعىرتۋ.
كۇن تارتىبىندە «باقتى – تاچەن» ءۇشىنشى ترانسشەكارالىق تەمىرجول وتكەلىن ىسكە اسىرۋ جوباسى دا بولدى. بۇل جوبا بويىنشا جۇك كولەمى مەن تاسىمال تۇرلەرى انىقتالماق.
الاكولگە پويىز جانە اۋە بيلەتتەرى قاشان ساتىلا باستايدى؟
بۇدان بولەك, مادەني بايلانىستاردى نىعايتۋ ماقساتىندا قىتايدان قازاقستان قالالارى مەن ورتالىق ازيا ەلدەرىنە تۋريستىك پويىزدى ىسكە قوسۋ مۇمكىندىگى تالقىلاندى.