ەلىمىزدە مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىپ جاتقان «تازا قازاقستان» تۇجىرىمداماسى ءاياسىندا «مولدىر بۇلاق» ەكولوگيالىق اكتسياسى باستالدى. اكتسيانىڭ ۇيىمداستىرىلۋى ناۋرىزناما ونكۇندىگىنىڭ تازارۋ كۇنىمەن تۇسپا-تۇس كەلىپ وتىر, دەپ جازادى Egemen.kz.
ءىس-شارا بارىسىندا سۋ كوزدەرى, بۇلاقتار, وزەن-كولدەر مەن تەڭىز جاعالاۋلارى قوقىستان تازارتىلادى.
بۇل يگى باستاماعا ەلىمىزدىڭ مەكتەپ وقۋشىلارى, كوللەدج ستۋدەنتتەرى مەن ەرىكتى جاستار قولداۋ ءبىلدىرىپ جاتىر. اكتسيا اياسىندا بۇلاقتاردىڭ كوزىن اشۋ جانە اباتتاندىرۋ, جاعالاۋلاردى تۇرمىستىق قالدىقتاردان تازارتۋ, تابيعاتتى ايالاۋعا باعىتتالعان ەكولوگيالىق شارالار ۇيىمداستىرىلادى.
اكتسياعا العاشقىلاردىڭ ءبىرى بولىپ جامبىل وبلىسىنداعى ء«مولدىر بۇلاق» وقۋ-ساۋىقتىرۋ ورتالىعىندا كوكتەمگى كانيكۋلدا دەمالىپ جاتقان وقۋشىلار ۇلەس قوستى. ولار بۇلاق كوزىن اشىپ, ماڭايىن قوقىستان تازالادى. ال شىمكەنت قالاسىنىڭ ەرىكتى جاستارى, كوللەدج ستۋدەنتتەرى قوشقار اتا وزەنىنىڭ جاعالاۋىندا سەنبىلىك ۇيىمداستىردى.
تازارۋ كۇنى: پرەزيدەنت ازاماتتاردى تازالىق پەن ءتارتىپ ەستافەتاسىنا بەلسەنە قاتىسۋعا شاقىردى
ماڭعىستاۋ وبلىسىنىڭ ستۋدەنتتەرى دە كاسپي تەڭىزىنىڭ جاعالاۋىندا وتكەن اكتسياعا اتسالىستى. شاراعا قاتىسۋشىلار قورشاعان ورتانى تازا ۇستاۋدىڭ ماڭىزدىلىعىن اتاپ ءوتتى.
ايتا كەتەيىك, الداعى ءبىر اي ىشىندە ء«مولدىر بۇلاق» ەكولوگيالىق اكتسياسى ەلىمىزدىڭ باسقا وڭىرلەرىندە دە جالعاسادى.