بەلگىلى امەريكالىق اكتەر جانە جەكپە-جەك ونەرىنىڭ شەبەرى چاك نورريس 86 جاسىندا گاۆاي ارالدارىندا قايتىس بولدى. بۇل تۋرالى ونىڭ وتباسى حابارلادى, دەپ جازادى Egemen.kz.
اكتەردىڭ قازاسىنا بايلانىستى كوڭىل ايتقاندار قاتارىندا جان-كلود ۆان دامم, دونالد ترامپ جانە باسقا دا تانىمال تۇلعالار بار. ءولىمىنىڭ ناقتى سەبەبى جاريالانعان جوق.
وتباسىنىڭ مالىمەتىنشە, نورريس 20 ناۋرىز كۇنى تاڭەرتەڭ, گاۆايداعى كاۋاي ارالىندا دۇنيەدەن وتكەن. بۇعان دەيىن باق-تا ونىڭ اۋرۋحاناعا تۇسكەنى تۋرالى اقپارات تاراعان ەدى.
«چاك نورريس الەم ءۇشىن جەكپە-جەك شەبەرى, اكتەر جانە كۇش-جىگەردىڭ سيمۆولى بولدى. ال ءبىز ءۇشىن ول – ادال جار, قامقور اكە مەن اتا, سۇيىكتى باۋىر جانە وتباسىمىزدىڭ تىرەگى ەدى», دەلىنگەن وتباسى مالىمدەمەسىندە.
جاقىندارى ونىڭ وتباسىنىڭ ورتاسىندا, تىنىش جاعدايدا ومىردەن وتكەنىن ايتتى.
چاك ءنورريستىڭ شىن ەسىمى – كارلوس رەي نورريس. ول 1940 جىلى وكلاحوما شتاتىندا دۇنيەگە كەلگەن. اسكەري قىزمەتىن وڭتۇستىك كورەيادا وتەپ جۇرگەندە «چاك» دەگەن لاقاپ ات العان.
1960-جىلدارى جەكپە-جەك ونەرى ستۋدياسىن اشىپ, كەيىن كينو سالاسىنا قادام باستى. العاش رەت 1968 جىلى فيلمدە ەپيزودتىق رولدە كورىندى. 1972 جىلى بريۋس ليمەن بىرگە «ايداھار جولى» فيلمىندە ويناپ, كەڭىنەن تانىلدى.
ونىڭ ەڭ تانىمال جۇمىستارىنىڭ ءبىرى – «جالعىز قاسقىر ماككۋەيد» ءفيلمى جانە «ۋوكەر, تەحاس رەيندجەرى» تەلەحيكاياسىنداعى كوردەلل ۋوكەر ءرولى.
كينو سىنشىلارى ونىڭ فيلمدەرىن ءجيى سىناعانىمەن, كورەرمەندەر ءنورريستى ادىلدىك ءۇشىن كۇرەسەتىن باتىل كەيىپكەر رەتىندە ەرەكشە قابىلدادى.
چاك نورريس ءتورت بالانىڭ اكەسى بولعان. ول وتباسىن ءاردايىم باستى قۇندىلىق رەتىندە باعالاعان.