سەمەي قالاسىندا «ناۋرىزناما» ونكۇندىگى اياسىندا ايگىلى جىراۋ جامبىل جاباەۆتىڭ 180 جىلدىعىنا ارنالعان «جىر – جامبىل» اتتى وبلىستىق اقىندار ايتىسى ءوتتى. قالالىق مادەنيەت سارايىندا وتكەن ءسوز بارىمتاعى وڭىردەگى ايتىس ونەرىنىڭ كەڭ ءورىسىن تاعى ءبىر مارتە كورسەتتى, دەپ حابارلايدى Egemen.kz.
اباي وبلىسىنىڭ اكىمى بەرىك ءۋاليدىڭ باستاماسىمەن ۇيىمداستىرىلعان ءدۇبىرلى دوداعا ءوڭىردىڭ اۋدان-قالالارىنان 10 ايتىسكەر قاتىسىپ, ەكى اينالىم بويىنشا باق سىناستى. قۋانىش ەركىن ۇلى, جاسۇلان ماقاەۆ, ميراس سلامشايىق ۇلى, قۋاندىق كەنجەبەك ۇلى, ماناربەك ساتىبالدى, ايبەك جەڭىسقازين, فارحات مارات ۇلى, ەراسىل سارسەنباەۆ, ەرادىل ەرەجە, الىشەر قىدىربەك ۇلى سىندى جاس جانە تاجىريبەلى اقىندار ساحنا تورىندە سۋىرىپسالما سايىستىڭ كورىگىن قىزدىردى.
ايتىستىڭ ءادىل باعاسىن بەرگەن قازىلار قۇرامىندا حالىقتىق اقىندار ورتالىعىنىڭ جەتەكشىسى, اقىن دامەتكەن ومارباەۆا, ايتىسكەر اقىندار مەن جىرشى-تەرمەشىلەردىڭ حالىقارالىق وداعى اباي وبلىستىق فيليالىنىڭ توراعاسى, اقىن داۋلەت سمەتوۆ, بەلگىلى ايتىسكەر, ادەبيەتتانۋشى قارلىعاش اۋباكىروۆا, قايرات سابىرباەۆ, ۇلان ساعاديەۆ بولدى.
ءسوز سايسىنىڭ باس جۇلدەسى – (1 ملن تەڭگە) سەمەيلىك ايتىسكەر قۋاندىق كەنجەبەك ۇلىنا بۇيىردى. ءى ورىندى ايبەك جەڭىسقازين, ءىى ورىندى ماناربەك ساتىبالدى, ءىىى ورىندى جاسۇلان ماقاەۆ يەلەندى.
اباي وبلىسىندا 6-سىنىپ وقۋشىسى سمارت-سومكە ويلاپ تاپتى
حالىقتىق اقىندار ورتالىعىنىڭ جەتەكشىسى دامەتكەن ومارباەۆا ايتىس دەڭگەيىنە جوعارى باعا بەرىپ, بۇل جولعى دودادا اقىنداردىڭ دايىندىقپەن كەلگەنىن جەتكىزدى.
«بۇل جولعى ايتىسقا قاتىسقان اقىنداردىڭ دايىندىعى جاقسى بولدى. تاقىرىپتى يگەرۋدە, ءسوز ساپتاۋدا جيناقىلىق پەن وي تەرەڭدىگى بايقالدى. ايتىس جوعارى دەڭگەيدە ءوتتى دەپ سەنىممەن ايتۋعا بولادى. اسىرەسە جاس اقىنداردىڭ اياق الىسى جاقسى. بۇل – وڭىردەگى اقىندىق مەكتەپتىڭ الدەقاشان قالىپتاسقانىن, ءداستۇردىڭ ۇزىلمەي جالعاسىپ كەلە جاتقانىن كورسەتەدى», دەيدى ايتىستىڭ ابىز اناسى.
ال ايتىسكەر اقىندار مەن جىرشى-تەرمەشىلەردىڭ حالىقارالىق وداعى اباي وبلىستىق فيليالىنىڭ توراعاسى داۋلەت سمەتوۆ تە بايقاۋدىڭ ۇيىمداستىرىلۋىنا نازار اۋداردى.
«سوڭعى جىلدارى وبلىستىق دەڭگەيدەگى ايتىستارعا مۇنداي كولەمدە قارجى ءبولىنۋى بولماعان. بۇل جولعى جۇلدە قورىنىڭ قوماقتى بولۋى باسەكەنى كۇشەيتتى. اقىندار دا سوعان ساي جاۋاپكەرشىلىكپەن كەلىپ, تارتىستى ايتىس كورسەتتى. وسىنداي ناقتى قولداۋ بولسا, ايتىس ونەرىنىڭ ءورىسى كەڭەيىپ, جاڭا ەسىمدەر شىعارى ءسوزسىز. سوندىقتان بۇل باستاما جالعاسىپ, داستۇرگە اينالۋى ءتيىس», دەيدى داۋلەت سمەتوۆ.
مادەني ءىس-شارا سوڭىندا قالا اكىمى ادىلەت نۇرساعات ۇلى جەڭىمپازداردى قۇتتىقتاپ, كەلەسى جىلى وبلىستىق ايتىستىڭ اۋقىمىن كەڭەيتىپ, باس جۇلدەگە اۆتوكولىك تىگۋ مۇمكىن ەكەنىن ايتتى.
اباي وبلىسىندا اليمەنت ءوندىرۋ تەتىگى كۇشەيدى
سەمەي