باتىس قازاقستان وبلىسىنداعى شىڭعىرلاۋ اۋداندىق اكىمدىگىنىڭ قىزمەتكەرى, كامەلەتكە تولماعان قىزعا قاتىستى زورلىق جاسادى دەگەن كۇدىككە ىلىنگەن ەر ادام ورال قالاسىنداعى اۋرۋحانادا كوز جۇمدى. بۇل تۋرالى وڭىرلىك پوليتسيا دەپارتامەنتى حابارلادى, دەپ جازادى Egemen.kz.
پوليتسيانىڭ مالىمەتىنشە, 11 ناۋرىز كۇنى قاماۋدا بولعان كۇدىكتى دەنساۋلىعىنىڭ كۇرت ناشارلاۋىنا بايلانىستى ورال قالاسىنداعى وبلىستىق كوپسالالى اۋرۋحانانىڭ جانساقتاۋ بولىمىنە جاتقىزىلعان.
«دارىگەرلەر وعان باۋىردىڭ توكسيكالىق زاقىمدانۋى, باۋىر نەكروزى, ينسۋلينگە تاۋەلسىز قانت ديابەتى جانە كەتواتسيدوز دياگنوزىن قويعان. 16 ناۋرىز كۇنى ساعات 18:10-دا ەسىن جيماستان ەر ادام قايتىس بولدى», دەپ حابارلادى پوليتسيا.
وقيعا بويىنشا سوتقا دەيىنگى تەرگەۋ باستالدى. تەرگەۋ مۇددەسىنە بايلانىستى وزگە مالىمەتتەر جاريالانبايدى.
ايتا كەتەيىك, العاشقى مالىمەت بويىنشا, پوليتسياعا جابىرلەنۋشى قىزدىڭ اكەسى جۇگىنگەن. ونىڭ ايتۋىنشا, 2 قاڭتار كۇنى ەر ادام ونىڭ كامەلەتكە تولماعان قىزىن الداپ ۇيىنە شاقىرىپ, زورلاعان.
سول كەزدە بقو پوليتسيا دەپارتامەنتى ءباسپاسوز قىزمەتى بۇل اقپاراتتى راستاپ, اتالعان دەرەك بويىنشا قر قك 120-بابى «كامەلەتكە تولماعاندى زورلاۋ» بويىنشا قىلمىستىق ءىس قوزعالعانىن حابارلاعان.
كەيىن قۇقىق قورعاۋ ورگاندارى تەرگەۋ بارىسىندا حات الماسۋلار مەن باسقا دا ماتەريالداردى زەرتتەپ, كامەلەتكە تولماعانعا قاتىستى زورلىق فاكتىسى انىقتالماعانىن مالىمدەدى. ال 16 جاستاعى قىز بەن ونىڭ اناسى كۇدىكتىگە ەشقانداي شاعىمدارى جوق ەكەنىن ايتىپ, قارىم-قاتىناس ءوزارا كەلىسىممەن بولعانىن جەتكىزگەن.
الماتىدا 13 جاستاعى قىزدى زورلادى دەگەن كۇدىكتى قاماۋعا الىندى
الايدا قىزدىڭ اكەسى بۇل اقپاراتتىڭ شىندىققا سايكەس كەلمەيتىنىن مالىمدەدى. پوليتسيادا قىلمىستىق ءىس بويىنشا تەرگەۋ جالعاسىپ جاتقانى حابارلاندى. 27 اقپاندا بقو پروكۋراتۋراسى كۇدىكتىنىڭ ۇستالىپ, ۋاقىتشا ۇستاۋ يزولياتورىنا قامالعانىن مالىمدەگەن. ايتا كەتەيىك, كۇدىكتى شىڭعىرلاۋ اۋدانى اكىمدىگىنىڭ بولىمدەرىنىڭ بىرىندە جۇمىس ىستەگەن. ارىز تۇسكەننەن كەيىن ول قىزمەتىنەن بوساتىلعان.