اتىراۋ وبلىسىنداعى وتباسى ءولىمى: كۇدىكتىگە تاعى ءبىر ايىپ تاعىلدى

ىشكى ىستەر مينيسترلىگىنىڭ مالىمەتىنشە, كۇدىكتى سۇلتان سارسەماليەۆكە قاتىستى قىلمىستىق كودەكستىڭ ەكى بابى بويىنشا تەرگەۋ جۇرگىزىلىپ جاتىر:

99-باپتىڭ 2-بولىگى – «ەكى نەمەسە ودان دا كوپ ادامدى ءولتىرۋ»;

188-باپتىڭ 2-بولىگى – «الدىن الا ءسوز بايلاسۋ ارقىلى ادامدار توبى جاساعان ۇرلىق».

«اتىراۋ وبلىسى پوليتسيا دەپارتامەنتى ادام ءولتىرۋ جانە ولاردىڭ مۇلكىن ۇرلاۋ فاكتىلەرى بويىنشا قىلمىستىق ءىستى تەرگەپ جاتىر. كۇدىكتى ۇستالىپ, سوتتىڭ سانكتسياسىمەن قاماۋعا الىندى», دەپ حابارلادى ءىىم.

ۆەدومستۆو وكىلدەرى سوتقا دەيىنگى تەرگەۋ جالعاسىپ جاتقانىن مالىمدەدى. الايدا رەسمي جاۋاپتا كۇدىكتىنىڭ جۇبايى اقبايان مۇقانعاليەۆانىڭ ارەكەتىنە قۇقىقتىق باعا بەرىلەتىنى تۋرالى ناقتى ايتىلماعان.

ەسكە سالا كەتەيىك, اتىراۋ وبلىسىندا جانگەلدين اۋىلىندا تۇراتىن وتباسىنىڭ ءولىمى بويىنشا تەرگەۋ جۇرگىزىلىپ جاتىر. 2025 جىلدىڭ جەلتوقسان ايىنىڭ سوڭىندا جوعالىپ كەتكەن زەينەتكەرلەردىڭ تۋىستارى زەينەتكەر ەرلى-زايىپتى مەن ولاردىڭ ەرەسەك بالالارى جوعالىپ كەتكەنىن حابارلاعان.

ول كەزدە وتباسى بەلگىسىز باعىتتا ۇيدەن شىعىپ كەتكەنى ايتىلىپ, سودان بەرى ولاردىڭ قايدا ەكەنى بەلگىسىز بولعان. ىزدەۋدە ءتورت ادام بولدى:

66 جاستاعى ماقسوت قارابالين;

64 جاستاعى ناسيپ وتەشقاليەۆا;

35 جاستاعى قىزى ميرامگۇل قارابالينا;

32 جاستاعى ۇلى ناۋرىز مۇقانعاليەۆ.

كەيىن, 6 قاڭتاردا جانگەلدين اۋىلىندا زەينەتكەر ەرلى-زايىپتىلاردىڭ مايىتتەرى تابىلدى. قۇقىق قورعاۋ ورگاندارى ولاردىڭ دەنەلەرى ءۇي اۋلاسىنداعى شارۋاشىلىق قۇرىلىستىڭ استىنان تابىلعانىن حابارلادى.

8 قاڭتاردا پوليتسيا ءىس بويىنشا نەگىزگى كۇدىكتىنى جاريالادى. ول – وتباسىنىڭ 29 جاستاعى كۇيەۋ بالاسى سۇلتان سارسەماليەۆ. بەلگىلى بولعانداي, ول وتباسىنىڭ كەنجە قىزى اقبايان مۇقانعاليەۆامەن بىرگە ەلدەن قاشىپ كەتكەن.

كۇدىكتىگە حالىقارالىق ىزدەۋ جاريالاندى.

24 اقپاندا سارسەماليەۆ پەن مۇقانعاليەۆا يندونەزيانىڭ سەنارۋ اۋىلىنداعى قوناقۇيدە ۇستالدى.

25 اقپاندا ىشكى ىستەر ءمينيسترىنىڭ ورىنباسارى سانجار ءادىلوۆ اقبايان مۇقانعاليەۆا دا وسى ءىس بويىنشا كۇدىكتى رەتىندە تانىلعانىن مالىمدەدى.

9 ناۋرىز كەشكە كۇدىكتى ەرلى-زايىپتىلار الماتىعا ەكستراديتسيالانعانى بەلگىلى بولدى. سول جەردە سارسەماليەۆ ناۋرىز مۇقانعاليەۆ پەن ميرامگۇل قارابالينانى ولتىرگەنىن مويىنداپ, ولاردىڭ جەرلەنگەن ورنىن كورسەتكەن.

اعايىندىنىڭ مايىتتەرى اتىراۋ قالاسىنىڭ گەولوگ شاعىناۋدانىنان تابىلدى. ولار كۇدىكتى بۇرىن جالعا العان ءۇيدىڭ اۋلاسىنان شىققان.

11 ناۋرىزدا قىزىلقوعا اۋدانى جانگەلدين اۋىلىندا اعالى-قارىنداستىڭ جەرلەۋ ءراسىمى ءوتتى.

قازاقستانعا قايتارىلعاننان كەيىن اقبايان مۇقانعاليەۆا سوت-پسيحياتريالىق ساراپتاما جۇرگىزۋ ءۇشىن اتىراۋداعى پسيحياتريالىق مەكەمەگە جىبەرىلدى. بۇل تۋرالى مارقۇمداردىڭ تۋىستارى حابارلادى.

كەيىن ءىىم ونىڭ قىلمىسقا قاتىسى بار-جوعى تەكسەرىلىپ جاتقانىن مالىمدەدى. قازىرگى ۋاقىتتا تەرگەۋ جالعاسىپ جاتىر جانە ءىس ەرەكشە باقىلاۋعا الىنعان.

اتىراۋداعى وتباسىنىڭ قازاسى: قىلمىسقا تۇرمىستىق جانجال سەبەپ بولۋى مۇمكىن