ەرتىس-بايان وڭىرىندە وتكەن اپتادا بىرنەشە تاۋلىككە ۇلاسقان اقتۇتەك بوراننىڭ سالدارىنان 300-گە جۋىق مال قىرىلدى. كوپتەگەن ەلدى مەكەنگە ايتارلىقتاي ماتەريالدىق شىعىن كەلدى. ەكى قالا مەن ەكى اۋدان تابيعي سيپاتتاعى توتەنشە جاعداي رەجىمىن جاريالاۋعا ءماجبۇر بولدى.
وبلىستىق توتەنشە جاعدايلار جونىندەگى كوميسسيا وتىرىسىندا قولايسىز اۋا رايىنىڭ سالدارىن جويۋ شارالارى قارالدى. ءوڭىر اكىمدىگى اتاپ وتكەندەي, 9-12 ناۋرىز ارالىعىندا پاۆلودار وبلىسى اۋماعىندا جىلدامدىعى سەكۋندىنا 30 مەترگە دەيىن جەتكەن سولتۇستىك-باتىس تسيكلونى تىركەلگەن. بۇل وبلىس اۋماعىندا تۇسكەن قاردىڭ 80%-عا ۇلعايۋىنا اكەلىپ سوقتىرعان. قازگيدرومەتتىڭ دەرەگىنە سايكەس, كەيبىر جەرلەردە قاردىڭ قالىڭدىعى 2-دەن 20 سم-گە دەيىن ارتقان. اقتوعاي, شارباقتى اۋداندارىندا قاردىڭ قالىڭدىعى 10-20 سم شاماسىندا تىركەلىپ وتىر.
ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ دەرەگىنشە, قولايسىز اۋا رايى كەزەڭىندە وبلىستىڭ 96 اۋىلدىق ەلدى مەكەنى ەلەكتر قۋاتىنان اپاتتىق جاعدايدا اجىراتىلعان. قالپىنا كەلتىرۋ جۇمىستارىنا 43 اپاتتىق بريگادا, 100-دەن استام مامان تارتىلىپ, ەلەكترمەن جابدىقتاۋ قىسقا مەرزىمدە تولىقتاي قالپىنا كەلتىرىلدى.
«تابيعي اپاتتىڭ سالدارىنان ەكىباستۇز قالاسىندا 75 كوپقاباتتى تۇرعىن ءۇيدىڭ, 9 الەۋمەتتىك نىساننىڭ, ءبىر اكىمشىلىك عيماراتتىڭ شاتىرى زاقىمداندى. قازىردە عيماراتتارعا تەكسەرۋ جۇرگىزىلىپ, كەلتىرىلگەن شىعىن كولەمى ناقتىلانىپ جاتىر. قالادا جەرگىلىكتى اۋقىمداعى تابيعي سيپاتتاعى توتەنشە جاعداي جاريالاندى. تابيعي اپاتتان زارداپ شەككەن جەكە جانە زاڭدى تۇلعالاردان وتىنىشتەر قابىلداۋ جالعاسادى», دەپ حابارلادى وبلىس اكىمدىگىنەن.
اقسۋ قالاسىندا داۋىل سالدارىنان 32 نىساننىڭ, سونىڭ ىشىندە تۇرعىن ۇيلەر مەن ينفراقۇرىلىم نىساندارىنىڭ شاتىرلارى زاقىمداندانعان. اتالعان قالادا, باياناۋىل, پاۆلودار اۋداندارىندا دا تابيعي سيپاتتاعى توتەنشە جاعداي رەجىمى ەنگىزىلدى. باياناۋىل اۋدانى اۋماعىندا ينفراقۇرىلىم نىساندارى مەن تۇرعىن ءۇي قورى ب ۇلىنگەن. 38 اۋىلدىق ەلدى مەكەننىڭ 37-سىندە ەلەكتر قۋاتىنىڭ ءوشۋى تىركەلدى. سونىمەن قاتار بوراننىڭ سالدارىنان 198 باس ۇساق مال, 2 باس ءىرى قارا, 82 جىلقى قىرىلعان. قازىر بوراندا ىعىپ كەتكەن 600-دەن استام قوي ىزدەستىرىلىپ جاتىر.
ەلەكتر جارىعىنان اجىراۋ دەرەكتەرى اقتوعاي, اققۋلى اۋداندارىندا دا تىركەلگەن. وڭىرلىك توتەنشە جاعداي دەپارتامەنتىنىڭ اقپارىنشا, وبلىستاعى 58 ەلدى مەكەن سۋ تاسقىنى قاۋپى بار ايماقتارعا جاتقىزىلدى. بۇگىندە اۋىلدىق جەرلەردەن 196 مىڭ توننادان استام قار شىعارىلدى.
پاۆلودار وبلىسى