رەفەرەندۋم ۋچاسكەلەرى حالىقارالىق تالاپقا ساي جۇمىس ىستەپ جاتىر. بۇل تۋرالى تاجىكستان رەسپۋبليكاسى ورتالىق سايلاۋ جانە رەفەرەندۋم كوميسسياسىنىڭ توراعاسى باحتيور حۋدويورزودا مالىمدەدى, دەپ حابارلايدى Egemen.kz.
شەتەلدىك بايقاۋشى استانا قالاسى ۇلتتىق اكادەميالىق كىتاپحاناسىنداعى رەفەرەندۋمنىڭ №129 ۋچاسكەسىنە بارىپ, ەلدەگى جالپىۇلتتىق ناۋقان بارىسىن باقىلادى.
– ءبىز قازاقستان رەسپۋبليكاسى ورتالىق سايلاۋ كوميسسياسىنىڭ شاقىرۋىمەن كونستيتۋتسيانى قابىلداۋ جونىندەگى رەفەرەندۋمعا دايىندىق جانە ونى وتكىزۋ بارىسىن باقىلاۋ ءۇشىن كەلدىك. وسى شاقىرۋ ءۇشىن قازاقستان تاراپىنا العىسىمىزدى بىلدىرەمىز. استانادا بولعان ۋاقىتتا رەفەرەندۋمدى ۇيىمداستىرۋ جانە وتكىزۋ جۇمىسىنىڭ بارىسىمەن تانىستىق. بۇگىن ءبىز تىكەلەي داۋىس بەرۋ پروتسەسىن باقىلاپ وتىرمىز. كورىپ وتىرعانىمىزداي, رەفەرەندۋمدى دايىنداۋ جانە وتكىزۋ بويىنشا اۋقىمدى ءارى جۇيەلى ۇيىمداستىرۋشىلىق جۇمىس جۇرگىزىلگەن. ۋچاسكەلىك جانە اۋماقتىق كوميسسيا مۇشەلەرى رەفەرەندۋم وتكىزۋدىڭ بارلىق كەزەڭدەرى بويىنشا ءتيىستى دايىندىقتان وتكەن. بۇل قازاقستان رەسپۋبليكاسى ورتالىق سايلاۋ كوميسسياسىنىڭ اتالعان ساياسي شاراعا جوعارى دەڭگەيدە جانە جاۋاپكەرشىلىكپەن قاراعانىن كورسەتەدى, – دەدى تاجىكستان رەسپۋبليكاسى ورتالىق سايلاۋ جانە رەفەرەندۋم كوميسسياسىنىڭ توراعاسى.
سونداي-اق ول ءوز سوزىندە قالا تۇرعىندارى بۇل كۇننىڭ ماڭىزىن ءتۇسىنىپ, بەلسەندى قاتىسىپ جاتقانىن ايتتى.
– داۋىس بەرۋ قۇقىعىنا يە قازاقستان ازاماتتارى سايلاۋ ۋچاسكەلەرىنە ەركىن ءارى ءوز مۇددەلەرىمەن كەلىپ, ەشقانداي كەدەرگىسىز داۋىس بەرىپ جاتقانىن بايقادىق. بۇل رەفەرەندۋم وتكىزۋدىڭ نەگىزگى قاعيداتتارى – ازاماتتاردىڭ ەركىن ەرىك ءبىلدىرۋى مەن اشىقتىق پرينتسيپتەرىنىڭ ساقتالىپ وتىرعانىن ايعاقتايدى. ازاماتتاردىڭ ۋچاسكەلەرگە ۇيىمداسقان تۇردە كەلۋى دە رەفەرەندۋمعا جۇرگىزىلگەن ساپالى دايىندىقتىڭ ناتيجەسى ەكەنىن كورسەتەدى. كونستيتۋتسيانى قابىلداۋ ارقىلى قازاقستان حالقى ءوز بولاشاعىن, ياعني ەلدىڭ الداعى دامۋ باعىتىن ايقىندايدى. ويتكەنى كونستيتۋتسيا – مەملەكەتتىڭ نەگىزگى زاڭى جانە قوعام دامۋىنىڭ بارلىق نەگىزگى باعىتتارىن بەلگىلەيدى, – دەدى باحتيور حۋدويورزودا.
ءسوز سوڭىندا شەتەلدىك بايقاۋشى قازاقستان حالقىنىڭ بىرلىگى نىعايىپ, ەلدە ءاردايىم بەيبىتشىلىك پەن تۇراقتىلىق ساقتالىپ, مەملەكەتىمىز ودان ءارى دامىپ, وركەندەي بەرۋىنە تىلەكتەستىك ءبىلدىردى.
رەفەرەندۋم: تۇركىستان وبلىسىندا تۋعان كۇن يەسى العاش رەت داۋىس بەردى
ايتا كەتەيىك ەلدەگى رەفەرەندۋمدى 38 مەملەكەتتەن كەلگەن 359 بايقاۋشى باقىلاپ وتىر.
ماڭعىستاۋلىق جاس جۇبايلار تاڭداۋىن جاسادى