قازاقستان ەلدىڭ دارىلىك قاۋىپسىزدىگىن قامتاماسىز ەتۋ باعىتىندا ەلەۋلى ناتيجەگە قول جەتكىزدى. دارىلىك زاتتاردى تاڭبالاۋ جانە قاداعالاۋ جۇيەسىنىڭ دەرەكتەرى بويىنشا وتاندىق وندىرىستەگى دارىلىك پرەپاراتتاردىڭ ۇلەسى زاتتاي كورسەتكىشتە (قاپتاما مەن دوزالار سانى بويىنشا) 40%-عا جەتتى, دەپ حابارلايدى Egemen.kz.
بۇل كورسەتكىش حالىقتىڭ وتاندىق وندىرىستەگى دارىلىك زاتتارمەن ناقتى قامتاماسىز ەتىلۋ دەڭگەيىن كورسەتىپ, ۇلتتىق فارماتسەۆتيكالىق سالانىڭ كەزەڭ-كەزەڭىمەن دامىپ كەلە جاتقانىن ايعاقتايدى.
دەنساۋلىق ساقتاۋ مينيسترلىگىندە اتاپ وتكەندەي, نارىقتى زاتتاي كورسەتكىشتەر ارقىلى باعالاۋ دارىلىك زاتتاردى تۇتىنۋ قۇرىلىمىن بارىنشا وبەكتيۆتى تۇردە تالداۋعا مۇمكىندىك بەرەدى.
قۇندىق ماندە وتاندىق پرەپاراتتاردىڭ ۇلەسى شامامەن 15%-دى قۇرايدى. بۇل پاتەنتتىك قورعاۋدا تۇرعان يننوۆاتسيالىق يمپورتتىق دارىلىك زاتتاردىڭ جوعارى قۇنىمەن بايلانىستى.
نارىقتى زاتتاي كورسەتكىشتەر ارقىلى تالداۋعا كوشۋ حالىق ءۇشىن دارىلىك زاتتاردىڭ قولجەتىمدىلىك دەڭگەيىن جانە دەنساۋلىق ساقتاۋ جۇيەسىن قامتاماسىز ەتۋدەگى وتاندىق وندىرۋشىلەردىڭ ناقتى ءرولىن دالىرەك باعالاۋعا مۇمكىندىك بەرەدى.
ءدارى-دارمەك باعاسى قىمباتتادى ما؟ مينيسترلىك مونيتورينگ دەرەكتەرىن جاريالادى
دارىلىك قامتاماسىز ەتۋ سالاسىنداعى جۇيەلى رەفورمالار بىرقاتار ماڭىزدى ناتيجەگە قول جەتكىزۋگە مۇمكىندىك بەردى. اتاپ ايتقاندا, باعا بەلگىلەۋ جۇيەسىن رەفورمالاۋ ناتيجەسىندە تمككك جانە ءمامس شەڭبەرىندە دارىلىك زاتتاردىڭ شەكتى باعاسى ورتا ەسەپپەن 15%-عا, ال كوتەرمە جانە بولشەك ساۋدا سەگمەنتتەرىندە 26%-عا تومەندەدى. بۇل حالىق ءۇشىن ءدارى-دارمەكتەردىڭ قولجەتىمدىلىگىن ارتتىردى.
ماڭىزدى باعىتتاردىڭ ءبىرى ساتىپ الۋ جۇيەسىن وڭتايلاندىرۋ بولدى. بىرىڭعاي ديستريبيۋتور ءوندىرۋشى زاۋىتتارمەن تىكەلەي كەلىسىمشارتتار تاجىريبەسىن ايتارلىقتاي كەڭەيتتى, بۇل دەلدالدار سانىن قىسقارتۋعا مۇمكىندىك بەردى. سونىمەن قاتار بۇۇ جۇيەسىنىڭ حالىقارالىق ۇيىمدارى – پروون, يۋنيسەف جانە STOP-TB ارقىلى جۇرگىزىلەتىن ساتىپ الۋلار كولەمى 87%-عا ارتتى, ال وتاندىق وندىرۋشىلەرمەن ۇزاق مەرزىمدى كەلىسىمشارتتار كولەمى 43%-عا ءوستى.
15 تاۋلىككە دەيىن: قازاقستاندا دارىلەردى تىركەۋ مەرزىمى قىسقارتىلۋى مۇمكىن
وسى شارالاردىڭ ناتيجەسىندە بيۋدجەت قاراجاتى ايتارلىقتاي ۇنەمدەلدى. 2025 جىلدىڭ قورىتىندىسى بويىنشا ۇنەمدەۋ 70,5 ملرد تەڭگەنى, ال 2026 جىلدىڭ العاشقى ايلارىندا 47 ملرد تەڭگەنى قۇرادى. بوساتىلعان قاراجات پاتسيەنتتەردى دارىلىك قامتاماسىز ەتۋدى كەڭەيتۋگە باعىتتالادى.
دارىلىك قامتاماسىز ەتۋ جۇيەسىن دامىتۋدا تسيفرلاندىرۋ دا ماڭىزدى ءرول اتقارادى. دارىلىك زاتتاردى تاڭبالاۋ جانە قاداعالاۋ جۇيەسىن ەنگىزۋ پرەپاراتتاردىڭ قوزعالىسىنىڭ بۇكىل تىزبەگىنىڭ – ءوندىرىس جەلىسىنەن باستاپ پاتسيەنتكە جەتكىزىلەتىن ءاربىر قاپتاماعا دەيىن – اشىقتىعىن قامتاماسىز ەتەدى. بۇل باقىلاۋ ساپاسىن ارتتىرىپ, ەلدەگى دارىلىك قامتاماسىز ەتۋ جۇيەسىنە دەگەن سەنىمدى كۇشەيتۋگە ىقپال ەتەدى.