كوكشەتاۋ قالاسىندا مەملەكەتتىك-جەكەمەنشىك ارىپتەستىك ء(مجا) شەڭبەرىندە 630 ورىندىق زاماناۋي كوپبەيىندى اۋرۋحانا سالۋ جونىندەگى ستراتەگيالىق ماڭىزى بار جوبا ىسكە اسىرىلىپ جاتىر, دەپ حابارلايدى Egemen.kz.
مەديتسينالىق كەشەن 17 گەكتار جەر ۋچاسكەسىندە ورنالاستىرىلادى, ال قۇرىلىستىڭ جالپى اۋدانى 111 مىڭ شارشى مەتردى قۇرايدى. قازىرگى ۋاقىتتا نىساننىڭ قۇرىلىس دايىندىعى 50%-عا جەتتى.
جوبالاۋ جانە قۇرىلىس جۇمىستارى قولدانىستاعى ۇلتتىق تالاپتار مەن مەديتسينالىق مەكەمەلەردى جوسپارلاۋدىڭ زاماناۋي حالىقارالىق تاسىلدەرىن ەسكەرە وتىرىپ جۇرگىزىلىپ جاتىر.
قىزىلوردا وبلىسىندا 300 ورىندىق كوپبەيىندى اۋرۋحانا سالىنىپ جاتىر
بولاشاق اۋرۋحانا ەمدەۋ-دياگنوستيكالىق كومەكتىڭ تولىق تسيكلىن قامتاماسىز ەتەتىن زاماناۋي ينتەگراتسيالانعان مەديتسينالىق كەشەن رەتىندە جوبالانعان. جوبا ەكى نەگىزگى ستاتسيونارلىق كورپۋستى – تەراپيالىق جانە حيرۋرگيالىق كورپۋستاردى قامتيدى.
كەشەننىڭ نەگىزگى ەلەمەنتى ەكى ستاتسيونارلىق كورپۋستىڭ اراسىندا ورنالاساتىن ءۇش قاباتتى كلينيكالىق-دياگنوستيكالىق ورتالىق بولادى. بۇل ورتالىق اۋرۋحانانىڭ كلينيكالىق جانە قوسالقى بولىمشەلەرىن بىرىكتىرەتىن بىرىڭعاي پلاتفورما قىزمەتىن اتقارادى.
بولاشاق مەديتسينالىق كەشەننىڭ قۇرامىنا سونداي-اق 38 توسەككە ارنالعان قارقىندى تەراپيا بولىمشەسى, 10 توسەككە ارنالعان پەرزەنتحانا بولىمشەسى جانە 63 توسەككە ارنالعان كۇندىزگى ستاتسيونار كىرەدى. جاڭا اۋرۋحانادا جىل سايىن 20 مىڭنان استام پاتسيەنت ەم الادى دەپ كۇتىلەدى.
جوبادا مەديتسينالىق كەشەننىڭ ءتيىمدى جۇمىس ىستەۋىن قامتاماسىز ەتەتىن زاماناۋي اۆتونومدى ينفراقۇرىلىم قۇرۋ دا كوزدەلگەن. اتاپ ايتقاندا, جەدەل جاردەم كولىكتەرىن دەزينفەكتسيالاۋ پۋنكتىن جانە شۇعىل مەديتسينالىق ەۆاكۋاتسياعا ارنالعان تىكۇشاق الاڭىن سالۋ جوسپارلانىپ وتىر. بۇل اۋىر جاعدايداعى پاتسيەنتتەرگە جەدەل مەديتسينالىق كومەك كورسەتۋگە مۇمكىندىك بەرەدى.
اتالعان جوبانى ىسكە اسىرۋ وڭىردە مامانداندىرىلعان جانە جوعارى تەحنولوگيالىق مەديتسينالىق كومەكتى كورسەتۋ مۇمكىندىكتەرىن ايتارلىقتاي كەڭەيتىپ, مەديتسينالىق قىزمەتتەردى كۇتۋ ۋاقىتىن قىسقارتىپ, پاتسيەنتتەردىڭ اۋرۋحانادا بولۋ جايلىلىعىن ارتتىرۋعا مۇمكىندىك بەرەدى.
ەكى جىلعا جوسپارلانعان قۇرىلىس جۇمىستارىنىڭ نەگىزگى كەزەڭى اياقتالعاننان كەيىن جوبادا نىسانعا بەس جىلدىق تەحنيكالىق قىزمەت كورسەتۋ كەزەڭى دە كوزدەلگەن. بۇل ينفراقۇرىلىمنىڭ سەنىمدى جۇمىسىن قامتاماسىز ەتىپ, مەديتسينالىق ورتانىڭ جوعارى ساپاسىن ساقتاۋعا مۇمكىندىك بەرەدى.
قازىرگى ۋاقىتتا نىسانداعى قۇرىلىس جۇمىستارى جوسپارلى رەجيمدە جۇرگىزىلىپ جاتىر, ال جاڭا كوپبەيىندى اۋرۋحانا 2027 جىلى پايدالانۋعا بەرىلەدى.
ايتا كەتەيىك, بۇعان دەيىن سولتۇستىك قازاقستاندا دونور ءۇش پاتسيەنتتىڭ ءومىرىن ساقتاپ قالعانىن حابارلاعان ەدىك.