ەلىمىزدە ەلەكتر ەنەرگياسىن ءوندىرۋ كولەمى تۇراقتى ءوسىم كورسەتىپ وتىر. 2025 جىلدىڭ قورىتىندىسى بويىنشا ەلدەگى گەنەراتسيا كولەمى 123,1 ملرد كۆت/ساع-قا جەتىپ, جوسپارلانعان كورسەتكىشتەن 4,4 پايىزعا جوعارى بولدى. بۇل ەلدىڭ ەنەرگەتيكالىق قاۋىپسىزدىگىن قامتاماسىز ەتۋ باعىتىنداعى جۇيەلى جۇمىستىڭ ناتيجەسىن اڭعارتادى, دەپ جازادى Egemen.kz.
سالىستىرمالى تۇردە قاراساق, 2019 جىلى قازاقستاندا 106 ملرد كۆت/ساع ەلەكتر ەنەرگياسى وندىرىلگەن ەدى. سوڭعى التى جىلدا بۇل كورسەتكىش 16 پايىزعا ارتتى. مۇنداي ءوسىم ەنەرگەتيكا سالاسىنىڭ جوسپارلى دامۋىن جانە جاڭا قۋات كوزدەرىنىڭ ىسكە قوسىلىپ جاتقانىن كورسەتەدى.
جاسىل ەنەرگيانىڭ جاردەمى
2025 جىلعى وڭ ناتيجەلەر بىرقاتار جاڭا جوبانىڭ جۇزەگە اسۋىمەن بايلانىستى. اتاپ ايتقاندا, تەكەلى ەنەرگيا كەشەنى مەن توپار گرەس-ىندەگى نىساندار پايدالانۋعا بەرىلىپ, جالپى قۋاتى 166 مۆت بولاتىن ءداستۇرلى گەنەراتسيا كوزدەرى ىسكە قوسىلدى.
2027 جىلدىڭ ءبىرىنشى توقسانىنىڭ سوڭىنا قاراي قازاقستان ەنەرگيا تاپشى ەلدەر قاتارىنان شىعادى
ەنەرگەتيكا سالاسىنداعى دامۋ قارقىنى الداعى جىلدارى دا جالعاسىن تابادى. 2026 جىلى ەلەكتر ەنەرگياسىن ءوندىرۋ كولەمىن 126,5 ملرد كۆت/ساع-قا دەيىن جەتكىزۋ جوسپارلانىپ وتىر. بۇل ءوسىم نەگىزىنەن جالپى قۋاتى 2,4 مىڭ مۆت بولاتىن جاڭا نىسانداردى پايدالانۋعا بەرۋ ەسەبىنەن قامتاماسىز ەتىلەدى.
جىلدىڭ نەگىزگى جوبالارى قاتارىندا قىزىلورداداعى 240 مۆت بۋ-گاز قوندىرعىسىن جانە تۇركىستانداعى 1000 مۆت قۋاتتاعى وسىنداي ستانسانى ىسكە قوسۋ بار. سونىمەن قاتار الماتىداعى 2-جەو مەن 3-جەو-نى جاڭعىرتۋ جۇمىستارى جۇرگىزىلەدى. بۇل ەكى نىساننىڭ جيىنتىق قۋاتى 1100 مۆت-تان اسادى. بۇعان قوسا اتىراۋ مەن تەكەلىدەگى ەنەرگيا كوزدەرىنىڭ قۋاتىن كەڭەيتۋ جوسپارلانعان.
پرەزيدەنت: اەس-ءتىڭ اياقتالعانىن كۇتپەي جاڭا ەنەرگيا كوزدەرىن ىسكە قوسۋ كەرەك
مامانداردىڭ ايتۋىنشا, جاڭا جوبالاردىڭ جۇزەگە اسۋى ەلدىڭ ەلەكتر ەنەرگياسىنا دەگەن سۇرانىسىن قامتاماسىز ەتىپ قانا قويماي, ەنەرگەتيكالىق جۇيەنىڭ تۇراقتىلىعىن ارتتىرۋعا مۇمكىندىك بەرەدى.