ۇمىتقان يساحانوۆانىڭ ءبىلىمى ورتا بولسا دا, قول قۋسىرىپ بوس وتىرعاندى جانى سۇيمەيدى. وسىدان ءبىراز ۋاقىت بۇرىن الىس-جاقىن شەتەلدەردەن كيىم-كەشەكتەر اكەلىپ, ونىسىن تۇرعىندارعا قولجەتىمدى باعادا ساۋدالاپ, ءارتۇرلى ساۋدا-ساتتىقپەن اينالىسقان ەدى. ءسويتىپ, وتباسىنا كىرىس كىرگىزىپ, وتاعاسىنا ەداۋىر كومەكشى بولادى. بىراق ءۇش جىل بۇرىن اياق استىنان دەنساۋلىعى سىر بەرىپ, دارىگەرلەر جۇمىسقا جارامسىزسىڭ دەپ, ءۇشىنشى توپ مۇگەدەكتىگىن بەرەدى. قۇر دارىمەن ەمدەلگەننەن گورى دەنساۋلىعىن ساۋىقتىرۋ ءۇشىن ۇمىتقانعا دارىگەرلەر قىمىز, ساۋمال ءىشىڭىز دەپ كەڭەس بەرەدى.
مەملەكەتتىڭ جۇمىسقا جارامسىزدىعىنا بەرىلەتىن جاردەماقىسى دەنساۋلىعىن تۇزەۋگە, كۇنكورىس جاساۋىنا جەتكىلىكسىز ەكەنىن بايقاعان ول بوس وتىرۋدى ءجون كورمەي, وزىنە ءبىر كاسىپپەن اينالىسۋ قاجەت دەپ شەشەدى. بايقاپ قاراساڭىز, ەڭبەك ەتەمىن دەگەن ادامعا ەشقانداي دا سىلتاۋ كەرەك ەمەس ەكەن. ويلانا كەلە وتاعاسىمەن جانە بالالارىممەن اقىلداسىپ, بيە ۇستاپ, قىمىز ءوندىرۋدى جوسپارلايدى.
كەز كەلگەن ءىستى باستاۋ ءۇشىن قاراجاتتىڭ قاجەتتىگى ايتپاسادا تۇسىنىكتى ەدى. وسى جاعدايدا «جۇمىسپەن قامتۋ جول كارتاسى-2020» باعدارلاماسى پايداسىن تيگىزدى دەپ ەسكە الادى ۇمىتقان. وتكەن جىلدىڭ ناۋرىز ايىندا سەمەي قالاسى اكىمدىگىنىڭ جۇمىسپەن قامتۋ ورتالىعىنا ءوتىنىش پەن بيزنەس جوسپارىن ۇسىنىپ, تامىز ايىندا ءبىر ميلليون جەتى ءجۇز مىڭ تەڭگە شاعىن نەسيە الادى.
ۇمىتقان اپايدىڭ ۇيىندە بولىپ, بال تاتىعان قىمىزىنان بۇگىندە تالايلار ءدام تاتقان. شارۋاسى بۇل كۇندەرى دوڭگەلەپ, تابىستى كاسىپكەرگە اينالعان. ايتۋىنشا, العاش رەت بەرىلگەن قاراجاتقا ءۇش ق ۇلىندى بيە, ءبىر بايتال ساتىپ الىپ, قىمىز ءوندىرۋدى باستايدى. ساۋىلعان ءسۇتتى ساۋمال تۇرىندە دە, اشىعان قىمىز كۇيىندە دە ءوزى پايدالانىپ, ارتىلعانىن قاجەت ەتكەن تۇرعىندارعا قولجەتىمدى باعامەن ساتۋمەن اينالىسۋدا. وسى ارقىلى تۇرعىندارعا جۇمىس ورنىن دا اشىپ وتىر. قىمىز قاسيەتتى سۋسىن بولعاندىقتان اسا تازالىقتى, اشىتۋ تەحنولوگياسىن ءجىتى ساقتاۋدى, ىدىستىڭ ساپالى بولۋىن جانە ۋاقىتىندا ىستاپ وتىرۋدى قاجەت ەتەدى. مىنە, وسى تالاپتار ورىندالعاندىقتان دا, ونىڭ اشىتقان قىمىزىنا سۇرانىس كوپتەپ تۇسە باستايدى. بيە ساۋ دا وڭاي كاسىپ ەمەس. كىرگەن كىرىسىن جەمشوپكە, مالعا قارايتىن كومەكشى ادامنىڭ ەڭبەگىنە جانە نەسيەنى دەر كەزىندە جابۋعا جۇمساپ وتىر. ەندىگى ماقساتى ساۋىلاتىن بيەلەردىڭ سانىن ونعا جەتكىزىپ, قوسىمشا جۇمىس ورىندارىن اشىپ, تۇرعىندار سۇرانىستارىن تولىعىمەن قامتاماسىز ەتسەم دەيدى نەسيە الۋشى.
جۇمىسپەن قامتۋ ورتالىعىنىڭ مامانى ءماۋلىت قيلىباەۆتىڭ ايتۋىنشا, ەلباسىمىز بيىلعى جولداۋىندا مۇمكىندىگى شەكتەۋلى ادامدارعا كوبىرەك كوڭىل ءبولۋ كەرەك, ولار ءۇشىن قازاقستان كەدەرگىسىز ايماققا اينالۋى ءتيىس دەپ تاپسىردى دەيدى. ياعني مۇمكىندىگى شەكتەۋلى ادامدار تۇرمىستىق قىزمەت كورسەتۋدە, تاعام وندىرۋدە, اۋىل شارۋاشىلىعىندا جۇمىس ءىستەي الادى دەلىنگەن. ولاي بولسا يساحانوۆانىڭ اينالىسىپ وتىرعان كاسىبى وسىنىڭ دالەلى رەتىندە باسقالارعا ۇلگى بولارلىقتاي ءىس ەكەنى داۋسىز.
راۋشان نۇعمانبەكوۆا.
سەمەي.